នាយករដ្ឋមន្ត្រីវៀតណាម បញ្ជាឲ្យចាត់វិធានការគ្រប់គ្រងការឆ្លងជំងឺប៉េស្តជ្រូកអាហ្វ្រិក

អន្តរជាតិ

នាយករដ្ឋមន្ត្រីវៀតណាម បញ្ជាឲ្យចាត់វិធានការគ្រប់គ្រងការឆ្លងជំងឺប៉េស្តជ្រូកអាហ្វ្រិក

22, Feb 2019 , 9:59 pm

រូបភាព

រូបភាព Laodong.vn

ដោយ:

នាយករដ្ឋមន្ត្រីវៀតណាម ង្វៀន ស៊ួនហ្វុក (Nguyễn Xuân Phúc) បានណែនាំឲ្យក្រសួងអភិវឌ្ឍន៍ជនបទ និងកសិកម្ម, ភ្នាក់ងារពាក់ព័ន្ធ និងមន្ត្រីមូលដ្ឋានចាត់វិធានការទប់ស្កាត់ការឆ្លងជំងឺប៉េស្តជ្រូកអាហ្វ្រិក (African swine fever) ក្នុងប្រទេសវៀតណាម។ បទបញ្ជានេះ គឺធ្វើឡើងក្រោយពីមានករណីជំងឺឆ្លងប្រភេទនេះផ្ទុះឡើងនៅភាគខាងជើងនៃប្រទេសវៀតណាមកាលពីដើមសប្តាហ៍នេះ។

នៅថ្ងៃពុធទី២០ ខែកុម្ភៈ លោកនាយករដ្ឋមន្ត្រីវៀតណាម ង្វៀន ស៊ួនហ្វ៊ុក បានបញ្ជាឲ្យគណៈកម្មាធិការអចិន្ត្រៃយ៍ណែនាំដល់មន្ត្រីទាំងថ្នាក់ខេត្ត និងទីក្រុងឲ្យពង្រឹងការត្រួតពិនិត្យនិងឃ្លាំមើលឲ្យកាន់តែល្អិតល្អន់នៅតាមបណ្តោយច្រកព្រំដែន និងទីសត្តឃាដ ព្រមទាំងអប់រំប្រជាជនមូលដ្ឋានស្តីពីវិធានការទប់ស្កាត់ជំងឺឆ្លងប្រភេទនេះ។ នេះបើតាមការចុះផ្សាយរបស់សារព័ត៌មាន Vietnam News ។

ទន្ទឹមនឹងគ្នានេះ ប្រមុខរដ្ឋាភិបាលវៀតណាម បានស្នើឲ្យក្រសួងអភិវឌ្ឍន៍ជនបទនិងកសិកម្មសហការជាមួយភ្នាក់ងារពាក់ព័ន្ធត្រួតពិនិត្យចំពោះជំងឺរាតត្បាតនេះ ជាពិសេសនៅតាមបណ្តោយព្រំដែននៃប្រទេសជិតខាង ដើម្បីទប់ស្កាត់កុំឲ្យវារាលដាលចូលទៅក្នុងប្រទេស។ ជាមួយគ្នានេះ ក្រសួងក៏មានទំនួលខុសត្រូវសហការជាមួយអង្គការអន្តរជាតិ និងប្រទេសជិតខាងដើម្បីទប់ទល់នឹងការរាតត្បាតនៃជំងឺប៉េស្តជ្រូកអាហ្វ្រិក។

បើតាមលោក ង្វៀន ស៊ួនហ្វ៊ុក គណៈកម្មធិការអចិន្ត្រៃយ៍ជាតិប្រយុទ្ធប្រឆាំងនឹងការរត់ពន្ធទំនិញខុសច្បាប់ ត្រូវដាក់ពិន័យឲ្យបានតឹងរ៉ឹងលើជនណា ដែលធ្វើចរាចរណ៍សត្វជ្រូកមានជំងឺដោយខុសច្បាប់ពីប្រទេសផ្សេងចូលទៅកាន់ប្រទេសវៀតណាម។ លើសពីនេះ ក្រសួងដឹកជញ្ជូន, ការពារជាតិ, ឧស្សាហកម្ម និងពាណិជ្ជកម្ម, ព័ត៌មាននិងទូរគមនាគមន៍ ក៏ត្រូវរួមដៃគ្នាអនុវត្តវិធានការទប់ទល់ និងអប់រំប្រជាជនមូលដ្ឋាន់អំពីជំងឺប៉េស្តជ្រូកអាហ្វ្រិកផងដែរ។

សូមបញ្ជាក់ថា ករណីជំងឺគ្រុនជ្រូកអាហ្វ្រិកបានកើតឡើងក្នុងប្រទេសចំនួន២០ ហើយជ្រូកជាង១លានក្បាលត្រូវបានសម្លាប់ចោលដើម្បីការពារកុំឲ្យជំងឺរាលដាល។ នេះបើយោងតាមអង្គការពិភពលោកសម្រាប់សុខភាពសត្វ (OIE)។ ចាប់ពីថ្ងៃទី៣ ឆ្នាំ២០១៨ ដល់ថ្ងៃទី ១៧ ខែកុម្ភៈ ឆ្នាំនេះ ជំងឺគ្រុនជ្រូកអាហ្វ្រិកច្រើនជាង១០០ករណីបានផ្ទុះឡើងក្នុងខេត្តនិងក្រុងចំនួន២៥នៃប្រទេសចិន រួមមានខេត្ត យូណាន (Yunnan) និងគ័ងតុង (Guangdong) ក្បែរនៅព្រំដែរវៀតណាម។ សត្វជ្រូកជិតមួយលានក្បាលត្រូវបានសម្លាប់ចោល។

អត្ថបទទាក់ទង

រកឃើញករណី«ជំងឺគ្រុនជ្រូកអាហ្វ្រិក»នៅវៀតណាម

គួររម្លឹកផងដែរថា នៅថ្ងៃទី១៩ ខែកុម្ភៈ អាជ្ញាធរវៀតណាមបានរកឃើញវត្តមាន ជំងឺប៉េស្តជ្រូកអាហ្វ្រិកក្នុងកសិដ្ឋានចំនួនបី។ នេះជាករណីទីមួយដែលអាជ្ញាធរជំនាញបានចេញមុខបញ្ជាក់ពីជំងឺឆ្លងប្រភេទនេះក្នុងបណ្តាប្រទេសក្នុងតំបន់អាស៊ីអាគ្នេយ៍មួយនេះ។ សត្វជ្រូកទាំងអស់នៅកសិដ្ឋានចំនួនបីដែលស្ថិតក្នុងខេត្ត Hung Yen និង ខេត្ត Thai Binh ភាគអាគ្នេយ៍នៃទីក្រុងហាណូយត្រូវបានសម្លាប់ចោល ក្រោយពីរកឃើញថាសត្វទាំងនោះឆ្លងជំងឺប៉េស្តជ្រូកអាហ្វ្រិក៕