អន្តរជាតិ
×![]()
ដោយ: តន ចាន់រិទ្ធារ៉ា
រដ្ឋមន្ត្រីទទួលបន្ទុកការងាររៀបចំកីឡាអូឡាំពិករបស់ជប៉ុន Yoshitaka Sakurada នៅថ្ងៃទី២១ ខែកុម្ភៈ បានប្រកាសសុំទោសជាសាធារណៈ បន្ទាប់ពីលោកទៅប្រជុំសភាយឺតចំនួនបីនាទី។ សមាជិកសភាមកពីបក្សប្រឆាំង បានខឹងសម្បារយ៉ាងខ្លាំងនឹងសកម្មភាពរបស់រដ្ឋមន្ត្រីរូបនេះ ហើយក៏ធ្វើពហិការកិច្ចប្រជុំចំនួនប្រាំម៉ោង ជាការតវ៉ាវិញ។
លោក Yoshitaka Sakurada រដ្ឋមន្ត្រីទទួលបន្ទុកព្រឹត្តិការណ៍អូឡាំពិក និងប៉ារ៉ាឡាំពិកក្រុងតូក្យូឆ្នាំ២០២០ និងទទួលបន្ទុកសន្តិសុខបច្ចេកវិទ្យាផងនោះ បានរងការរិះគន់ជាបន្តបន្ទាប់ ដោយសារសម្ដី និងអាកប្បកិរិយាមិនសមរម្យរបស់ខ្លួន។ លោកកាន់តំណែងសំខាន់ៗនេះកាលពីឆ្នាំមុន បន្ទាប់ពីលោក ស៊ីនហ្សូ អាបេ ឈ្នះការបោះឆ្នោតធ្វើជានាយករដ្ឋមន្ត្រីម្ដងទៀត។
កាលពីសប្ដាហ៍មុន លោក Sakurada បានប្រកាសសុំទោសជាសាធារណៈម្ដងហើយ បន្ទាប់ពីបង្ហាញការខកចិត្តចំពោះកីឡាការិនីហែលទឹក Rikako Ikee ដែលប្រកាសថា នាងមានជំងឺមហារីកឈាម (Leukaemia) ។ អត្តពលិករូបនេះ មានសក្តានុពលខ្ពស់ក្នុងការដំណើរមេដាយឲ្យជប៉ុននាព្រឹត្តិការណ៍អូឡាំពិកឆ្នាំ២០២០ ដែលជប៉ុនជាម្ចាស់ផ្ទះ។
នៅថ្ងៃទី២១ ខែកុម្ភៈ រដ្ឋមន្ត្រីដដែលនេះ ក៏សុំទោសម្ដងទៀត ព្រោះយឹតយ៉ាវក្នុងចូលរួមកិច្ចប្រជុំគណៈកម្មាធិការថវិកានៃសភាជប៉ុនទៀត។ តាមពិតទៅ លោក Sakurada ទៅយឺតបីនាទី ប៉ុនសមាជិកសភាបក្សប្រឆាំង ចាត់ទុកការយឺតយ៉ាវនេះ ជាទង្វើមិនគោរពការងារ។ នេះបើតាមការផ្សាយរបស់សារព័ត៌មាន BBC ។
កាលពីឆ្នាំ២០១៨ លោក Sakurada ដែលជារដ្ឋមន្ត្រីសន្តិសុខបច្ចេកវិទ្យានោះ ក៏រងការរិះគន់ដូចព្យុះ បន្ទាប់ពីថ្លែងក្នុងសភាថា លោកមិនដែលធ្លាប់ប្រើប្រាស់កុំព្យូទ័រនោះឡើយ។ ជំនួសវិញ លោកធ្វើការជាមួយលេខា និងមន្ត្រីថ្នាក់ក្រោម។ លោកថា វាមិនមែនជាបញ្ហាចោទអ្វីទេ ហើយលោកមានជំនឿចិត្តលើខ្លួនឯងថា នឹងមិនមានបញ្ហាអ្វីនោះឡើយក្នុងការអនុវត្តការងារខ្លួន៕
Tag:
ជប៉ុន
Yoshitaka Sakurada
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
