អន្តរជាតិ
×![]()
តាមរបាយការណ៍អង្គការតម្លាភាពអន្តរជាតិ (Transparency International) ប្រចាំឆ្នាំ២០១៨ ដែលទើបចេញផ្សាយដើមឆ្នាំ ២០១៩នេះ ក្នុងចំណោមប្រទេសចំនួន ១៨០ គ្មានប្រទេសណាមួយ ដែលស្អាតស្អំគ្មានអំពើពុករលួយនោះទេ ក៏ប៉ុន្តែកម្រិតនៃអំពើពុករលួយ មានស្ថានភាពតិចតួច មធ្យម និងធ្ងន់ធ្ងរបំផុត ដោយអាស្រ័យលើយុទ្ធសាស្ត្រ និងការដឹកនាំរបស់រដ្ឋាភិបាលនីមួយៗ។
ជារៀងរាល់ឆ្នាំ តម្លាភាពអន្តរជាតិ ដែលជាអង្គការមួយបង្កើតដើម្បីជាផ្នែកមួយនៃការប្រយុទ្ធប្រឆាំងអំពើពុករលួយ តែងតែធ្វើចំណាត់ថ្នាក់ទៅលើប្រទេសនីមួយៗលើកម្រិតនៃអំពើពុករលួយតាមរយៈការវាយតម្លៃទៅលើកម្រិតអំពើពុករលួយនៅក្នុងវិស័យសាធារណៈរបស់អ្នកជំនាញ និងអ្នកជំនួញជាដើម ។ លទ្ធផលនៃការវាយតម្លៃ ត្រូវបានផ្តល់ជាពិន្ទុពី ០ (អាក្រក់បំផុត) ទៅ ១០០ (ល្អបំផុត)។
តាមការអះអាងរបស់លោកស្រីប្រធានអង្គការតម្លាភាពអន្តរជាតិ Delia Ferreira Rubio អំពើពុករលួយ ភាគច្រើនរីកដុះដាលនៅទីន្លែងណា ដែលមូលដ្ឋានគ្រឹះនៃប្រជាធិបតេយ្យ មានភាពទន់ខ្សោយ ហើយទីនោះហើយ ដែលជាកន្លែងអ្នកនយោបាយប្រភេទឧបាយនិយម និងគ្មានលក្ខណៈប្រជាធិបតេយ្យ កេងចំណេញ និងទាញផលប្រយោជន៍សម្រាប់តែខ្លួនឯង។
ខាងក្រោមនេះ គឺជាប្រទេសទាំង៥ ដែលមានអំពើពុករលួយតិចតួចបំផុតរបស់ពិភពលោកប្រចាំឆ្នាំ២០១៨ ៖
១. ដាណឺម៉ាក ទទួលបានពិន្ទុ ៨៨/១០០
២. ណូវែលហ្សេឡង់ ទទួលបានពិន្ទុ ៨៧/១០០
៣. ហ្វាំងឡង់ ទទួលបានពិន្ទុ ៨៥/១០០
៤. សិង្ហបុរី ទទួលបានពិន្ទុ ៨៥/១០០
៥. ស៊ុយអ៊ែត ទទួលបានពិន្ទុក ៨៥/១០០
គួរឲ្យកត់សម្គាល់នោះ នៅក្នុងប្រទេសអភិវឌ្ឍ និងមានលទ្ធិប្រជាធិបតេយ្យរឹងមាំ មានកម្រិតនៃអំពើពុករលួយតិច ខណៈប្រទេសកំពុងអភិវឌ្ឍ និងជួបសង្គ្រាមរ៉ាំរ៉ៃ មានកម្រិតអំពើពុករលួយខ្លាំង។ ខាងក្រោមនេះ ជាប្រទេសដែលមានកម្រិតអំពើពុករលួយធ្ងន់ធ្ងរបំផុតរបស់ពិពភលោក៖
១. សូម៉ាលី ទទួលបានពិន្ទុ ១០/១០០
២. ស៊ីរី ទទួលបានពិន្ទុ ១៣/១០០
៣. ស៊ូដង់ខាងត្បូង ទទួលបានពិន្ទុ ១៣/១០០
៤. យេមែន ទទួលបានពិន្ទុ ១៤/១០០
៥. កូរ៉េខាងជើង ទទួលបានពិន្ទុ ១៤/១០០ ៕
Tag:
អំពើពុករលួយ
© រក្សាសិទ្ធិដោយ thmeythmey.com
