អន្តរជាតិ
អតីតមន្ត្រីCIA៖ លោក គីម ជុងអ៊ុន ប្រាប់លោក ប៉ុមប៉េអូ ថា ចង់រំសាយនុយក្លេអ៊ែរដើម្បីអនាគតកូនៗ រូបភាព Sky News
× នៅសល់មិនដល់មួយសប្ដាហ៍ទៀតឡើយ ជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នឹងមកដល់។ ប្រធានបទសំខាន់នៃជំនួបលើកទីពីរ គឺការរំសាយនុយក្លេអ៊ែរ ដែលលោក គីម ផ្ទាល់ ប្រកាសជារឿយៗថា លោកមានឆន្ទៈធ្វើកិច្ចការនេះ។ អតីតមន្ត្រីម្នាក់នៃទីភ្នាក់ងារចារកម្មកណ្ដាល (CIA) បានទម្លាយថា មេដឹកនាំកូរ៉េខាងជើងវ័យក្មេងរូបនេះពិតជាមានបំណងបោះបង់នុយក្លេអ៊ែរមែន គឺដើម្បីអនាគតកូនរបស់ខ្លួន។
លោក Andrew Kim អតីតប្រធានមជ្ឈមណ្ឌលបេសកកម្មកូរ៉េនៃទីភ្នាក់ងារចារកម្មកណ្ដាល (CIA) និយាយថា មេដឹកនាំកូរ៉េខាងជើង គីម ជុងអ៊ុន បានបង្ហាញឆន្ទៈរំសាយនុយក្លេអ៊ែរនៅចំពោះមុខលោក ម៉ៃ ប៉ុមប៉េអូ អំឡុងពេលទស្សនកិច្ចសម្ងាត់នៅព្យុងយ៉ាងកាលពីខែមេសា ឆ្នាំ២០១៨ ។ កាលនោះ លោក ប៉ុមប៉េអូ នៅកាន់តំណែងនាយក CIA នៅឡើយ ដោយមិនទាន់ឡើងតំណែងជារដ្ឋមន្ត្រីការបរទេសឡើយ។
បើតាមទីភ្នាក់ងារព័ត៌មានកូរ៉េខាងត្បូង Yonhap លោក Kim ដែលចូលនិវត្តន៍កាលពីចុងឆ្នាំ២០១៨ និយាយថា ប្រតិភូអាមេរិក ពិសេសលោក ប៉ុមប៉េអូ ផ្ទាល់ បានសួរប្រមុខដឹកនាំកូរ៉េខាងជើងចំៗពីបំណងពិតប្រាកដក្នុងការរំសាយនុយក្លេអ៊ែរ។ ក្នុងកម្មវិធីមួយនៅសាកលវិទ្យា Stanford អតីតមន្ត្រី CIA បានប្រាប់ចម្លើយលោក គីម ថា៖ «ខ្ញុំជាឪពុក និងជាប្ដីម្នាក់ ហើយខ្ញុំមិនចង់ឲ្យកូនរបស់ខ្ញុំស្ពាយនុយក្លេអ៊ែររស់នៅពេញមួយជីវិតរបស់ពួកគេឡើយ។»
សូមបញ្ជាក់ថា លោក គីម ជុងអ៊ុន ដែលដឹកនាំកូរ៉េខាងជើងតាំងពីមរណភាពឪពុកខ្លួនលោក គីម ជុងអ៊ីល នៅចុងឆ្នាំ២០១១ មានកូនចំនួនបីនាក់ និងមានភរិយាឈ្មោះ រី ស៊ុលជូ ។ ព័ត៌មានលម្អិតទាក់ទងគ្រួសាររបស់មេដឹកនាំកូរ៉េខាងជើងរូបនេះ មិនត្រូវបានបញ្ចេញជាសាធារណៈឡើយ ហើយគេដឹងតិចតួចបំផុតពីមែកធាងរបស់ត្រកូល គីម ដែលដឹកនាំកូរ៉េខាងជើងបីតំណមកហើយ។
ក្រៅពីការប្ដេជ្ញាចិត្តបោះបង់នុយក្លេអ៊ែរដើម្បីកូនៗ អតីតមន្ត្រី CIA ខាងលើក៏បានបញ្ចេញព័ត៌មានមួយចំនួនទៀតនាជំនួបរវាងលោក គីម និងលោក ប៉ុមប៉េអូ កាលពីខែមេសាកន្លងទៅ។ បើតាមមន្ត្រីអ្នកជំនាញកិច្ចការកូរ៉េរូបនេះ មេដឹកនាំកូរ៉េខាងជើងក៏លើកឡើងពីសារសំខាន់ក្នុងការពង្រឹងទំនាក់ទំនងទ្វេភាគីអាមេរិក-កូរ៉េខាងជើងដើម្បីកសាងទំនុកចិត្តទៅវិញទៅមក មុននឹងកូរ៉េខាងជើងរំសាយនុយក្លេអ៊ែររបស់ខ្លួន។
លោក គីម នឹងត្រូវជួបលោក ត្រាំ លើកទីពីរនៅវៀតណាមចាប់ពីថ្ងៃទី២៧ ដល់ទី២៨ ខែកុម្ភៈ។ មន្ត្រីប្រទេសទាំងពីរកំពុងជជែកគ្នាពីការរៀបចំ ប្រធានបទសម្រាប់ការចរចា និងបញ្ហាពាក់ព័ន្ធដទៃទៀត។ ច្បាស់ណាស់ថា ការជំរុញល្បឿនរំសាយនុយក្លេអ៊ែរជាប្រធានបទសំខាន់ ដ្បិតដំណើរការរំសាយនុយក្លេអ៊ែរតាមការព្រមព្រៀងនៅជំនួបលើកទីមួយ មិនទៅមុខសោះ ដោយសារការខ្វែងគំនិតគ្នាច្រើនពេក៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com