អន្តរជាតិ
បងធំអាស៊ានឥណ្ឌូណេស៊ី ប្តេជ្ញាប្រែខ្លួនជាមជ្ឈមណ្ឌលឌីជីថលប្រចាំអាស៊ីអាគ្នេយ៍ក្នុងឆ្នាំ២០២០ រូបភាព៖ Jakarta Post
× រដ្ឋាភិបាលក្រុងហ្សាការតា បានបង្ហាញពីការប្តេជ្ញាចិត្តក្នុងការពង្រឹង និងកែទម្រង់ក្របខណ្ឌបទបញ្ញត្តិច្បាប់ពាក់ព័ន្ធនឹងដំណើរការនៃសេដ្ឋកិច្ចរេខូបនីយកម្ម ឬសេដ្ឋកិច្ចតាមប្រព័ន្ធឌីជីថល ខណៈដែលក្រុងហ្សាការតា មានមហិច្ឆតាក្នុងការកែប្រែប្រទេសខ្លួនឲ្យក្លាយជាមជ្ឈមណ្ឌលសេដ្ឋកិច្ចឌីជីថលប្រចាំតំបន់អាស៊ីអាគ្នេយ៍នៅឆ្នាំក្រោយ។
មន្ត្រីជាន់ខ្ពស់ឥណ្ឌូណេស៊ីទទួលបន្ទុកផ្នែកសេដ្ឋកិច្ច Rudy Salahuddin បានឲ្យដឹងថា រដ្ឋាភិបាលឥណ្ឌូណេស៊ី នឹងពិនិត្យឡើងវិញលើបទបញ្ញត្តិមួយចំនួនរបស់រដ្ឋាភិបាលស្តីពាណិជ្ជកម្មអេឡិចត្រូនិក, ការការពារទិន្ន័យបុគ្គល និងការគ្រប់គ្រងពន្ធតាមប្រព័ន្ធពាណិជ្ជកម្មអេឡិចត្រូនិក ដែលផែនការពិនិត្យឡើងវិញនេះ ត្រូវឥណ្ឌូណេស៊ីរំពឹងខ្ពស់ថា នឹងធ្វើឲ្យខ្លួនអាចក្លាយជាមជ្ឈមណ្ឌលឌីជីថលប្រចាំតំបន់។
តាមការចុះផ្សាយរបស់សារព័ត៌មានឥណ្ឌូណេស៊ី Jakarta Post មន្ត្រីជាន់ខ្ពស់រដ្ឋាភិបាលឥណ្ឌូណេស៊ីដដែលនេះ បានអះអាងថាដើម្បីបំពេញមហិច្ឆតានេះ រដ្ឋាភិបាលឥណ្ឌូណេស៊ីបានរៀបចំសេចក្តីព្រាងច្បាប់ពាក់ព័ន្ធនឹងពាណិជ្ជកម្មអេឡិចត្រូវតាំងពីឆ្នាំ២០១៥មកម្ល៉េះ ក៏ប៉ុន្តែដោយសារតែមានការផ្លាស់ប្តូរពាក់ព័ន្ធនឹងវិស័យឧស្សាហកម្ម រួមទាំងការចង់ធានាឲ្យបានពីការការពារលើទិន្នន័យរបស់សហគ្រាសតូច និងមធ្យម និងចលនាពាណិជ្ជកម្មឆ្លងកាត់ព្រំដែនផងនោះ រដ្ឋាភិបាល ត្រូវពន្យារពេលនីតិវិធី។
ការធានាពីការប្តេជ្ញាចិត្តប្រែក្លាយឥណ្ឌូណេស៊ីឲ្យទៅជាមជ្ឈមណ្ឌលឌីជីថលប្រចាំតំបន់ ស្របពេលដែលក្រុមអ្នកស្រាវជ្រាវយុទ្ធសាស្ត្រអន្តរជាតិ បានចេញរបាយការណ៍មួយ ដោយព្យាករថា ឥណ្ឌូណេស៊ី អាចទទួលបានផលប្រយោជន៍ និងឱកាសកាន់តែច្រើននៅត្រឹមឆ្នាំ២០៣០ តាមរយៈពាណិជ្ជកម្មឌីជីថលមួយនេះ។
គួរជម្រាបផងថា ប្រព័ន្ធបច្ចេកវិទ្យាឌីជីថល គឺជាធាតុចូលដ៏សំខាន់បំផុតមួយសម្រាប់សេដ្ឋកិច្ចពិភពលោក ជាពិសេសសម្រាប់ប្រទេសកំពុងតែមានសេដ្ឋកិច្ចងើបឡើង និងកំពុងតែព្យាយាមសម្របខ្លួនទៅនឹងបដិវត្តន៍ឧស្សាហកម្មជំនាន់ទី៤ផងនោះ។
តាមការលើកឡើងរបស់លោកប្រធានាធិបតីឥណ្ឌូណេស៊ី ចូកូ វីដូដូ (Joko Widodo) ក្នុងពេលលោក ធ្វើវាគ្មិនក្នុងកម្មវិធីរបស់កិច្ចសហប្រតិបត្តិការសេដ្ឋកិច្ចអាស៊ីប៉ាហ្វិកក្នុងឆ្នាំ២០១៧ ដែលជាពេលវៀតណាមជាម្ចាស់ផ្ទះ ឥណ្ឌូណេស៊ី មានអ្នកប្រើប្រាស់អិនធ័រណែតរហូតដល់ ១៣២.៧ លាននាក់ ដែលចំណុចនេះ លោកប្រធានាធិបតី ចាត់ទុកថា ជាសក្តានុពលមួយនៃសេដ្ឋកិច្ចឌីជីថល៕
© រក្សាសិទ្ធិដោយ thmeythmey.com