អន្តរជាតិ
World Bank៖ វៀតណាមជាប់លំដាប់ទី២នៅអាស៊ាន បន្ទាប់ពីសិង្ហបុរីលើការវិនិយោគធនធានមនុស្ស
×![]()
ការវិនិយោគលើការកសាងមូលធនមនុស្ស ឬធនធានមនុស្ស គឺជាធាតុចូលដ៏សំខាន់បំផុតមួយសម្រាប់ការបង្កើនសង្វាក់ផលិតកម្មការងារ និងជាពិសេសនោះ លើការអភិវឌ្ឍប្រទេសក្នុងរយៈពេលវែង។ នៅក្នុងប្រទេសអភិវឌ្ឍ ការកសាងមូលធនមនុស្ស មិនមែនជាបញ្ហាចោទនោះទេ ខណៈប្រទេសកំពុងតែអភិវឌ្ឍន៍ ចាត់ទុកវា ជាកិច្ចការអាទិភាពជានិច្ច។
តាមរបាយការណ៍ស្តីពីសន្ទស្សន៍មូលធនមនុស្សរបស់ធនាគារពិភពលោក វៀតណាម បានជាប់ចំណាត់ថ្នាក់លេខ ៤៨ ក្នុងចំណោមប្រទេស និងអធិបតេយ្យ១៥៧ របស់ពិភពលោក ហើយបើនិយាយក្នុងក្របខណ្ឌអាស៊ានវិញ វៀតណាម ស្ថិតលំដាប់ទី២ ក្រោយតែសិង្ហបុរីប៉ុណ្ណោះ។
របាយការណ៍ដដែលនោះ បានវាយតម្លៃថា ខណៈប្រទេសកំពុងព្យាយាមធ្វើសមាហរណកម្មខ្លួនទៅក្នុងសង្វាក់ការងារសកល កម្មករវៀតណាម ក៏បានអភិវឌ្ឍសមត្ថភាពរបស់ខ្លួនពាក់ព័ន្ធនឹងភាសាបរទេស ហើយរដ្ឋាភិបាលវៀតណាម ក៏បានព្យាយាមកសាងមូលធនមនុស្សបន្ថែម ដើម្បីជាការផ្តល់ឱកាស និងលទ្ធភាពដល់ប្រជាជនខ្លួនពង្រីកការងារទៅកាន់ទីផ្សារកាន់តែច្រើន។
របាយការណ៍ ក៏បានបញ្ជាក់ និងព្យាករថា កុមារវៀតណាម ដែលបានទទួលការអប់រំ និងសេវាសុខភាពពេញលេញ អាចបង្កើតផលិតភាពការងារ រហូតដល់ ៦៧ ភាគរយ ស្មើនឹងចិន ខណៈផលិតភាពការងាររបស់កុមារសិង្ហបុរី អាចបង្កើតបាន៨៨ភាគរយ, ម៉ាឡេស៊ី ៦២ ភាគរយ, ថៃ ៦០ ភាគរយ, ហ្វីលីពីន ៥៥ ភាគរយ និងឥណ្ឌូណេស៊ី ៥៣ ភាគរយប៉ុណ្ណោះ។
សម្រាប់ធនាគារពិភពលោក ការអប់រំ និងសេវាសុខភាព គឺជាសមាសធាតុចម្បងសម្រាប់ការវាយតម្លៃទៅលើសន្ទស្សន៍នៃមូលធនមនុស្ស ហើយធនាគារពិភពលោក ក៏បានព្រមានពីការព្រងើយកន្តើយក្នុងការអភិវឌ្ឍធនធានមនុស្ស ឬមូលធនមនុស្ស ថានឹងជះឥទ្ធិពលខ្លាំងដល់ផលិតភាពការងារសម្រាប់អនាគតសម្រាប់ប្រទេសមួយចំនួន ដែលមានការវិនិយោគតិចតួចបំផុតលើមូលធនមនុស្ស៕
Tag:
វៀតណាម
សិង្ហបុរី
អាស៊ាន
© រក្សាសិទ្ធិដោយ thmeythmey.com
