សុខភាព
អន្តរជាតិ
×![]()
ដោយ: ធីតា
ការផ្សារភ្ជាប់ក្មេងទៅនឹងបច្ចេកវិទ្យាឌីជីថល គឺជារឿងដែលឪពុកម្តាយគ្រប់រូប មិនគួរមើលរំលងនោះឡើយ។ ប៉ុន្តែទោះបីជាយ៉ាងណាក៏ដោយ ក្រុមវេជ្ជបណ្ឌិតជាន់ខ្ពស់មួយក្រុមរបស់ចក្រភពអង់គ្លេស បានផ្តល់ដំបូន្មានថា ពេលញ៉ាំបាយ និងពេលចូលគេង មិនគួរអនុញ្ញាតឲ្យកុមារប្រើប្រាស់ទូរសព្ទ ឬអេក្រង់ភ្លឺផ្សេងៗនោះឡើយ។
ការសិក្សារបស់ក្រុមវេជ្ជបណ្ឌិតជំនាញនៃសាកលវិទ្យាល័យ University College London បានលើកឡើងថា ពេលញ៉ាំ និងពេលគេង គប្បីនាំកុមារប្តូរបរិយាកាសទៅនិយាយឲ្យច្រើន និងលើកទឹកចិត្តពួកគេឲ្យបង្ហាញនូវកង្វល់ផ្សេងៗ ជាពិសេសបញ្ហាសុវត្ថិភាពអនឡាញ ជាដើម។
បន្ថែមពីលើនេះ ក្រុមវេជ្ជបណ្ឌិត បានលើកឡើងថា ក្មេងមិនគួរត្រូវបានអនុញ្ញាតឲ្យប្រើប្រាស់ទូរសព្ទ នៅពេលមានសកម្មភាពធ្វើកិច្ចការណាមួយនោះឡើយ ដោយតម្រូវឲ្យពួកគេរៀនផ្តោតយកចិត្តទុកដាក់លើកិច្ចការទាំងនោះ។ ប្រសិនបើមិនអាចជៀសរួច ឪពុកម្តាយត្រូវឲ្យកូនៗសម្រាកពីការលេងទូរសព្ទ នៅរៀងរាល់ពីរម៉ោងម្តង។
វេជ្ជបណ្ឌិត Catherine Calderwood បានលើកឡើងថា កុមារដែលចូលចិត្តមើលទូរសព្ទពេលគេង និងពេលញ៉ាំបាយ ភាគច្រើនមានបញ្ហាសុខភាព ហើយក៏ជះឥទ្ធិពលដល់កិច្ចសាលារបស់ពួកគេផងដែរ។ បន្ថែមពីលើនេះ វាជាកត្តាដែលបង្ហាញពីគម្លាតនៃទំនាក់ទំនងរវាងកូនៗ និងឪពុកម្តាយ។
អ្នកស្រី បានរៀបរាប់ប្រាប់វិទ្យុ BBC Radio Scotland ថា ការលេងទូរសព្ទនឹងក្លាយជាទម្លាប់ដោយក្មេងៗ ក្រចូលគេង និងប្រញាប់ក្រោកដើម្បីឆែកមើលសារជាច្រើន។ បើតាមអ្នកស្រី Catherine ទូរសព្ទគួរតែត្រូវដាក់នៅក្រៅបន្ទប់គេង។
«ពិតណាស់ ការលេងទូរសព្ទពេលបាយ និងពេលគេង ជះផលអវិជ្ជមានដល់សុខភាពកុមារ ហើយក៏បានធ្វើឲ្យពួកគេខ្វះការផ្តោតអារម្មណ៍នៅពេលសិក្សានៅសាលារៀនផងដែរ»។ នេះជាការអះអាងរបស់វេជ្ជបណ្ឌិតជំនាញរបស់ចក្រភពអង់គ្លេស។
ទោះបីជាមិនមានតឹកតាងច្បាស់លាស់ក៏ដោយ ប៉ុន្តែក្រុមវេជ្ជបណ្ឌិតនៃសាកលវិទ្យាល័យ University College London បានបញ្ជាក់ថា កត្តាដែលធ្វើឲ្យកុមារឆាប់មួម៉ៅ និងឡើងកម្រិតថប់អារម្មណ៍ ក៏ដោយសារតែការចំណាយពេលច្រើននៅមុខអេក្រង់។
អ្នកស្រី Catherine បានអះអាងថា៖ «យើងដឹងថា កុមារម្នាក់ក្នុងចំណោម៥នាក់ បានក្រោកនៅពេលយប់ដើម្បីបើកទូរសព្ទដៃ ហើយចូលទៅមើលសារផ្សេងៗនៅក្នុងបណ្តាញសង្គម។ វាជាពិតជាប៉ះពាល់ខ្លាំងលើគុណភាពនៃការអប់រំ ជាពិសេសនៅថ្ងៃបន្ទាប់»៕
Tag:
ការសិក្សា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
