សហរដ្ឋអាមេរិក នឹងពន្យារពេលការដំឡើងពន្ធនាំចូលលើទំនិញចិន គិតជាទឹកប្រាក់២០០ពាន់លានដុល្លារបន្ថែម ក្រោយពីកិច្ចពិភាក្សាពាណិជ្ជកម្មទទួលបានផ្លែផ្កាល្អ។ នេះបើតាមការបញ្ជាក់របស់ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែកុម្ភៈ ដោយបន្ថែមថា លោកក៏មានគម្រោងរៀបចំជំនួបកំពូលជាមួយប្រធានាធិបតីចិន ស៊ី ជិនភីង ដើម្បីបញ្ចប់កិច្ចព្រមព្រៀងផងដែរ។
សរសេរនៅលើបណ្តាញសង្គម Twitter លោក ដូណាល់ ត្រាំ គូសបញ្ជាក់ថា សហរដ្ឋអាមេរិកទទួលបានផ្លែផ្កាល្អក្នុងជំនួបពាណិជ្ជកម្មលើបញ្ហាសំខាន់ៗមួយចំនួន រួមមាន ការពារកម្មសិទ្ធិបញ្ញា, ការផ្ទេរបច្ចេកវិទ្យា, កសិកម្ម, សេវាកម្ម និងរូបិយវត្ថុជាដើម។
«ជាលទ្ធផលនៃជំនួបដែលមានផ្លែផ្កាទាំងនេះ ខ្ញុំនឹងពន្យារពេលការបង្កើនពន្ធនាំចូលលើទំនិញចិន ដែលគ្រោងធ្វើឡើងនាថ្ងៃទី១ខែមីនាខាងមុខ»។ នេះបើតាមការបញ្ជាក់របស់លោក ត្រាំ ដោយបន្ថែមថា ក្រុងវ៉ាស៊ីនតោនគ្រោងរៀបចំកិច្ចប្រជុំកំពូលមួយសម្រាប់លោកនិងលោកស៊ី ជីនភីង នៅឯភូមិគ្រឹះ Mar-a-Lago របស់លោកក្នុងរដ្ឋ Florida ក្នុងគោលដៅបញ្ចប់កិច្ចព្រមព្រៀងមួយ។
កាលពីថ្ងៃសុក្រកន្លងទៅ ប្រធានាធិបតីអាមេរិកទី ៤៥ រូបនះ ក៏បានបង្ហាញនូវសុទិដ្ឋិនិយម ក្រោយជំនួបជាមួយឧបនាយករដ្ឋមន្ត្រីចិន លោក លីវ ហឺ ។ កិច្ចពិភាក្សាពាណិជ្ជកម្មនេះបានបិទបញ្ចប់កាលពីថ្ងៃអាទិត្យ។ បើតាមការចុះផ្សាយរបស់ទីភ្នាក់ងារព័ត៌មាន AFP លោក ដូណាល់ ត្រាំ និយាយថា បញ្ហាការកំណត់តម្លៃលុយដោយខុសច្បាប់ ក៏នឹងត្រូវរាប់បញ្ចូលនៅក្នុងកិច្ចព្រមព្រៀងពាណិជ្ជកម្មនោះផងដែរ។
សូមបញ្ជាក់ថា ការប្រកាសពន្យារពេលនេះ គឺធ្វើឡើងខណៈដែលបទឈប់បាញ់ក្នុងសង្គ្រាមពាណិជ្ជកម្មរយៈពេល៩០ថ្ងៃ ជិតដល់ពេលបញ្ចប់ ពោលគឺនៅសល់ពេលមិនដល់មួយសប្តាហ៍ផងនោះ។ គិតចាប់ពីការផ្អាកដំឡើងពន្ធរវាងអាមេរិកនិងចិនត្រូវបានបង្កើតឡើងមក កិច្ចពិភាក្សាពាណិជ្ជកម្មកម្រិតខ្ពស់រវាងមហាអំណាចសេដ្ឋកិច្ចទាំងពីរ ត្រូវបានរៀបចំឡើងចំនួនបីលើករួចមកហើយ។
កាលពីដើមខែធ្នូ ឆ្នាំ២០១៨ លោក ត្រាំ និងលោក ស៊ី បានយល់ព្រមផ្អាកការដំឡើងពន្ធលើទំនិញគ្នាទៅវិញទៅមក រយៈពេល៩០ថ្ងៃ ហើយពេលវេលាកំណត់នៃបទឈប់បាញ់នេះ គឺត្រូវនឹងថ្ងៃទី១ ខែមីនាខាងមុខ។ គោលបំណងនៃការបង្កើតបទឈប់បាញ់ក្នុងសង្គ្រាមពាណិជ្ជកម្ម គឺដើម្បីទុកពេលឲ្យភាគីទាំងពីរបង្កើតការចរចាពាណិជ្ជកម្ម ក្នុងគោលដៅរកច្រកផ្លូវដោះស្រាយជម្លោះដ៏តានតឹងមួយនេះ។
ក្រោយពីការយល់ព្រមផ្អាកដំឡើងពន្ធលើទំនិញគិតជាទឹកប្រាក់រាប់ពាន់លានដុល្លារ ជំនួបចរចាពាណិជ្ជកម្មត្រូវបានធ្វើឡើងជាបន្តបន្ទាប់។ លទ្ធផលវិជ្ជមានជាច្រើនក៏បានលេចឡើងផងដែរក្រោយជំនួបទាំងនេះ។ តួយ៉ាង ដូចបានលើកឡើង ចិនបានបង្កើនការបញ្ជាទិញផលិតផលកសិកម្មពីអាមេរិក និងក៏មានជំហរកែប្រែគោលនយោបាយមួយចំនួនផងដែរ ទាក់ទងនឹងការពារកម្មសិទ្ធិបញ្ញា និងការបង្ខំផ្ទេរបច្ចេកវិទ្យាជាដើម ដែលជាបញ្ហារសើបនៅក្នុងសង្គ្រាមពាណិជ្ជកម្ម៕