ជាតិ
សេដ្ឋកិច្ច
រដ្ឋាភិបាលមិនទាន់បង្ហាញទីតាំងបង្កើតព្រលានយន្តហោះអន្តរជាតិភ្នំពេញថ្មី លោក ជា សុផារ៉ា ដឹកនាំប្រជុំ នៅថ្ងៃទី២៨ ខែកុម្ភៈ ឆ្នាំ២០១៩ ជំវិញគម្រោងបង្កើតព្រលានយន្តហោះអន្តរជាតិភ្នំពេញថ្មី។ រូបពីក្រសួងដែនដី
× រាជរដ្ឋាភិបាល គ្រោងកសាងអាកាសយានដ្ឋានអន្តរជាតិភ្នំពេញថ្មី ដែលមានទំហំដី២៦០០ហិកតា ស្ថិតនៅខេត្តកណ្ដាលនិងខេត្តតាកែវ។ នេះបើយោងសេចក្តីប្រកាសព័ត៌មាន ក្រោយកិច្ចប្រជុំនៅថ្ងៃទី២៨ ខែកុម្ភៈ ឆ្នាំ២០១៩ ដែលដឹកនាំដោយលោក ជា សុផារ៉ា រដ្ឋមន្ត្រីក្រសួងរៀបចំដែនដី និងជាប្រធានគណៈកម្មការរៀបចំទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី។
សេចក្តីប្រកាសព័ត៌មាន បញ្ជាក់យ៉ាងដូច្នេះថា៖«រដ្ឋាភិបាល សម្រចបង្កើតអាកាសយន្តដ្ឋានអន្តរជាតិភ្នំពេញថ្មីខ្នាត 4F លើផ្ទៃដីទំហំ ២៦00ហិកតា ដែលអាចទទួលយន្តហោះខ្នាតធំបាន ស្ថិតនៅក្នុងភូមិសាស្ត្រខេត្តកណ្តាលនិងខេត្តតាកែវ»។ ប៉ុន្តែសេចក្តីប្រកាសព័ត៌មាន ពុំបានបញ្ជាក់ថា ស្ថិតក្នុងស្រុកឬតំបន់ណាមួយ នៃខេត្តកណ្តាលនិងខេត្តតាកែវនោះទេ។
ចំណែក លោក សេង ឡូត អ្នកនាំពាក្យក្រសួងដែន សុំមិនបកស្រាយអ្វីទាំងអស់។ លោក និយាយយ៉ាងខ្លីថា៖«សួរខ្ញុំក៏អត់មានអីលើសហ្នឹងដែរ។ សរសេរតាមសេចក្តីប្រកាសព័ត៌មានហ្នឹងទៅ»។
យ៉ាងណាក៏ដោយ កាលពីដើមឆ្នាំ២០១៩នេះ លោក ពុង ឃាវសែ ប្រធានក្រុមប្រឹក្សាភិបាលក្រុមហ៊ុនវិនិយោគទុនអាណិកជនកម្ពុជា (OCIC) និងលោក ហ៊ូ ហ៊ួយប៉ាង ប្រធានធនាគារអភិវឌ្ឍន៍ចិន (CDB) បានចុះហត្ថលេខាលើកិច្ចព្រមព្រៀងក្របខណ្ឌស្តីពីកិច្ចសហប្រតិបត្តិការហិរញ្ញប្បទានសម្រាប់គម្រោងអាកាសយានដ្ឋានថ្មី នៅភូមិសាស្ត្រក្រុងតាខ្មៅ និងស្រុកកណ្តាលស្ទឹង ខេត្តកណ្តាល។ គម្រោងនេះ សាងសង់ឡើង ដែលមានផ្ទៃដីទំហំ២៦០០ហិកតានេះ មានទុនវិនិយោគ១៥០០លានដុល្លារ។
សេចក្តីប្រកាសព័ត៌មានខាងលើ បានឲ្យដឹងទៀតថា ក្រោយកិច្ចប្រជុំ គណៈកម្មការ បានសម្រេចឲ្យក្រុមការងារចុះកំណត់ទីតាំងបោះបង្គោលព្រំ កំណត់តំបន់លំនៅដ្ឋាន និងកម្ពស់អគារ រៀបចំប្លង់លម្អិត និងប្លង់ហេដ្ឋានរចនាសម្ព័ន្ធ។ គណៈកម្មការ ក៏បានស្នើឲ្យរដ្ឋបាលខេត្តកណ្តាល និងខេត្តតាកែវ និងអគ្គនាយកដ្ឋានសុរិយោដី ត្រូវកំណត់អត្តសញ្ញាណប្រជាពលរដ្ឋ ដែលមានដីនៅក្នុងទីតាំងគម្រោងឲ្យបានច្បាស់លាស់ ដោយផ្អែកទៅតាមការកាន់កាប់ជាក់ស្តែង និងឯកសារពាក់ព័ន្ធ ដើម្បីមានមូលដ្ឋានក្នុងការដោះស្រាយផលប៉ះពាល់ជូនប្រជាពលរដ្ឋ។ ជំហានបន្ទាប់ តាមការចាំបាច់ ផ្អាកជាបណ្តោះអាសន្ននូវការធ្វើចរន្តការដីស្ថិតក្នុងទីតាំង ដែលបង្កការលំបាក និងរាំងស្ទះដល់ដំណើរការអនុវត្តគម្រោង។
លោក ជា សុផារ៉ា ក៏បានស្នើឲ្យស្ថាប័នពាក់ព័ន្ធ គិតគូរជាមុនអំពីហេដ្ឋារចនាសម្ព័ន្ធគាំទ្រជាអាទិ៍ ការបង្កប់បំពង់ហ្គាស បណ្តាញផ្គត់ផ្គង់ទឹកស្អាត ប្រព័ន្ធអគ្គិសនី ប្រព័ន្ធលូ ខ្សែកាបអុបទិក អាងប្រព្រឹត្តកម្មទឹកកខ្វក់ ឲ្យបានត្រឹមត្រូវមុនបង្ហូរចូលលូសាធារណៈ អង់តែនទូរសព្ទ និងហេដ្ឋារចនាសម្ព័ន្ធក្រោមដីផ្សេងទៀត ចៀសវាងរៀបចំតាមក្រោយដែលបង្កឲ្យខូចខាតដល់ផ្លូវថ្នល់ ជាពិសេស ប្រព័ន្ធការពារ និងរំដោះទឹកជំនន់៕
Tag:
កម្ពុជា
អាកាសយានដ្ឋានអន្តរជាតិថ្មី
© រក្សាសិទ្ធិដោយ thmeythmey.com