ផ្លូវល្បឿនលឿន នឹងត្រូវបើកការដ្ឋានសាងសង់នៅថ្ងៃទី២២ខែមីនានេះ

ជាតិ

រថយន្ត

04, Mar 2019 , 12:19 pm

រូបភាព

រូបពីក្រសួងសាធារណការ និងដឹកជញ្ជូន

ដោយ:

ភ្នំពេញ៖ ក្រសួងសាធារណការ និងដឹកជញ្ជូន បានជូនដំណឹងនៅលើទំព័រហ្វេសប៊ុករបស់ខ្លួនថា ផ្លូវល្បឿនលឿនភ្នំពេញ-ព្រះសីហនុ នឹងត្រូវបើកការដ្ឋានសាងសង់នៅថ្ងៃទី២២ខែមីនា ឆាប់ខាងមុខនេះ។

ផ្លូវនេះមានប្រវែង ១៩០គីឡូម៉ែត្រ និងទទឹង ២៤,៥ម៉ែត្រ ដែលត្រូវសាងសង់ជាពីរគន្លងទៅ ពីរគន្លងមក។ ផ្លូវ Express way ដែលតភ្ជាប់ទៅតំបន់ឆ្នេរកម្ពុជាមួយនេះ ជាប្រភេទផ្លូវក្រាលបេតុងកៅស៊ូ (AC) កម្រាស់ ១០សង់ទីម៉ែត្រ និងថ្មលាយកៅស៊ូ (ATB) ១២ សង់ទីម៉ែត្រ។

ផ្លូវល្បឿនលឿននេះ ត្រូវបានខណ្ឌដោយសួនច្បារនៅកណ្ដាលទ្រូងផ្លូវ និងមានរបាំងអមសងខាងផ្លូវការពារសត្វ និងមនុស្សឆ្លងកាត់ និងមានកន្លែងឈប់សម្រាប់ដែលមានលក្ខណៈងាយស្រួល មិនបង្កការកកស្ទះ។

គម្រោងនេះនឹងចំណាយថវិកាប្រមាណ ១៩០០លានដុល្លារ និងប្រើពេលវេលា ៤៨ខែដើម្បីបញ្ចប់ការស្ថាបនាផ្លូវ។ នេះជាគម្រោងដែលវិនិយោគដោយភាគីចិន ដែលត្រូវបានចុះហត្ថលេខារួចរាល់នាពេលកន្លងមក។ ក្រសួងបានកាសថា នេះជាគម្រោង BOT ដែលក្រុមហ៊ុនវិនិយោគនឹងសាងសង់ ហើយប្រតិបត្តិការ រួចផ្ទេរមករដ្ឋាភិបាល។

ខាងក្រោមនេះជាគំរូផ្លូវល្បឿនលឿនភ្នំពេញ-ព្រះសីហនុ៖