Kylie Jenner ជំនួស Mark Zuckerberg សម្រាប់តំណែងមហាសេដ្ឋីវ័យក្មេងជាងគេលើលោក

អន្តរជាតិ

Kylie Jenner ជំនួស Mark Zuckerberg សម្រាប់តំណែងមហាសេដ្ឋីវ័យក្មេងជាងគេលើលោក

06, Mar 2019 , 10:36 am

រូបភាព

ដោយ: ធីតា

ត្រឹមអាយុ២១ឆ្នាំប៉ុណ្ណោះ Kylie Jenner បានក្លាយជាអ្នកមានទ្រព្យសម្បត្តិមហាសាល ដែលវ័យក្មេងជាងគេលើលោក (The Youngest Self-Made Billionaire Ever)។ នេះបើតាមបញ្ជីចំណាត់ថ្នាក់របស់ទស្សនាវដ្តី Forbes ដោយតារាបង្ហាញម៉ូត តារាទូរទស្សន៍ និងអ្នកជំនួញអាមេរិករូបនេះ បានបំបែកកំណត់ត្រារបស់ស្ថាបនិកហ្វេសប៊ុក Mark Zuckerberg ដែលស្ថិតក្នុងបញ្ជីឈ្មោះមហាសេដ្ឋីកាលពីអាយុ២៣ឆ្នាំ។

ទោះស្ថិតក្នុងអំបូរគ្រួសារអ្នកមាននៃត្រកូល Kardashian តែ Kylie Jenner ទទួលបានជោគជ័យដ៏ធំធេងក្នុងអាជីព និងជំនួញផ្ទាល់ខ្លួន ជាមួយក្រុមហ៊ុនផលិតផលកែសម្ផស្ស Kylie Cosmetics ដែលមានជាង១០០០សាខា។

យោងតាមបញ្ជីឈ្មោះ 2019 BILLIONAIRES NET WORTH របស់ទស្សនាវដ្តី Forbes នាង Kylie មានទ្រព្យសម្បត្តិសរុបប្រមាណ១ពាន់លានដុល្លារអាមេរិក ហើយបានក្លាយខ្លួនជាមហាសេដ្ឋិនីដែលមានបានដោយខ្លួនឯង ដ៏វ័យក្មេងជាងគេបំផុត (Youngest Self-Made Billionaire Ever)។

ក្រៅពីជាតារាបង្ហាញម៉ូតដែលមានតម្លៃខ្លួនខ្ពស់ជាងគេ Kylie ជោគជ័យដ៏ធំធេងក្នុងមុខជំនួញ ដោយសារនាងមានបណ្តាញសង្គម (Snapchat, Instagram, Facebook និង Twitter) ដែលមានអ្នកគាំទ្រប្រមាណ១៧៧លាននាក់។

វត្តមានរបស់ Kylie ក្នុងបញ្ជី Forbes ជំនួសតំណែងរបស់លោក Mark Zuckerberg ស្ថាបនិកបណ្តាញសង្គមហ្វេសប៊ុក ដែលបានក្លាយជាមហាសេដ្ឋីកំពូលលើលោកក្នុងអាយុ២៣ឆ្នាំ ពោលគឺកាលពីប្រមាណ១០ឆ្នាំមុន។

មហាសេដ្ឋីលើកលោកដែលមានអាយុលើស Kylie រួមមាន Alexandra Andresen អាយុ២២ឆ្នាំ (១,៤ពាន់លានដុល្លារអាមេរិក), Katharina Andresen អាយុ២៣ឆ្នាំ (១,៤ពាន់លានដុល្លារអាមេរិក), Gustav Magnar Witzoe អាយុ២៤ឆ្នាំ (៣ពាន់លានដុល្លារអាមេរិក)៕