ក្រុមបាល់ទាត់ចំនួន១៤ នឹងត្រូវប្រជែងគ្នាដណ្តើមជើងឯកក្នុងព្រឹត្តិការណ៍មិត្តហ្វូនខេមបូឌានលីករដូវកាលឆ្នាំ២០១៩ បន្ទាប់ពីគណៈកម្មការប្រកួតបាល់ទាត់ជាតិកម្ពុជា(CNCC)បន្ថែមសមាជិកថ្មីចំនួន៣។ លោក ឆាំង ពិសិដ្ឋ អះអាងថា ការបន្ថែមសមាជិកថ្មីរហូតដល់៣ដោយមិនឆ្លងកាត់ការប្រកួតនេះ គឺដើម្បីបង្កើនការប្រកួតប្រជែងឲ្យកាន់តែស្វិតស្វាញនារដូវកាលថ្មី។ សម្រាប់រូបមន្តប្រកួតត្រូវបានរក្សាដូចឆ្នាំមុខដដែល ខណៈប្រាក់រង្វាន់លើកទឹកចិត្តអាចមានការប្រែប្រួល។ ការបន្ថែមនេះដែរ អាចធ្វើឲ្យរូបមន្តប្រកួតក្នុងរង្វាន់សម្តេច ហ៊ុន សែន នៅឆ្នាំនេះមានការប្រែប្រួលផងដែរ ពាក់ព័ន្ធការជ្រើសរើសក្រុមពីថ្នាក់ខេត្ត។
ក្រុមគីរីវង់សុខសែនជ័យ យុវជនសាលាបាល់ទាត់ជាតិបាទីអាយុក្រោម១៨ឆ្នាំនិងក្រុមមកពីខេត្តកំពង់ចាម ត្រូវបានដំឡើងឲ្យមកលេងក្នុងពានរង្វាន់ក្របខណ្ឌមិត្តហ្វូនខេមបូឌានលីកក្នុងរដូវកាលឆ្នាំ២០១៩។ ការបន្ថែមសមាជិកថ្មីដោយមិនឆ្លងកាត់ការប្រកួតលីកទី២នេះ ត្រូវបានលោក ឆាំង ពិសិដ្ឋ លេខាប្រតិបត្តិរបស់ CNCC អះអាងថា គឺដើម្បីបង្កើនចំនួនការប្រកួត និងភាពតានតឹងក្នុងការប្រកួតប្រជែង ពិសេសផ្តល់ឱកាសឲ្យក្លិបទាំងនោះបានបង្ហាញសមត្ថភាព។
លេខាប្រតិបត្តិរូបនេះបានបន្ថែមថា ការណ៍ដែលសហព័ន្ធកីឡាបាល់ទាត់កម្ពុជាសម្រេចដំឡើងក្រុមគីរីវង់សុខសែនជ័យនិងខេត្តកំពង់ចាមឲ្យឡើងមកលេងក្នុងក្របខណ្ឌកំពូលនេះ ដោយសារក្រុមទាំងពីរមានមហិច្ឆតាខ្ពស់ចង់លេងក្នុងក្របខណ្ឌលីកទី២រដូវកាលមុន ដែលសហព័ន្ធបានផ្អាករៀបចំដោយគ្មានប្រាប់មូលហេតុ។ ចំណែកការដំឡើងក្រុមយុវជនសាលាបាល់ទាត់ជាតិបាទីអាយុក្រោម១៨ឆ្នាំ គឺដើម្បីផ្តល់ឱកាស និងបទពិសោធប្រកួតថ្មីៗដល់ពួកគេ ដែលជាធនធានដ៏សំខាន់សម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣នៅកម្ពុជា។
«ដោយសារសហព័ន្ធមិនបានរៀបចំការប្រកួតលីក២ ហើយមើលឃើញថាមានក្លិបពីរ(ខេត្តកំពង់ចាម, គីរីវង់សុខសែនជ័យ)មានចិត្តចង់លេងនៅលីកកំពូល ពេលនោះឯកឧត្តមប្រធាន សៅ សុខា ក៏ដូចជាសមាជិកប្រតិបត្តិទាំង១១រូប ក៏បានសម្រេចជំរុញឲ្យក្លិបទាំងពីរឲ្យចូលរួមប្រកួតក្នុងលីកតែម្តង បូករួមទាំង U18 បាទីឲ្យចូលរួមដែរ គឺដើម្បីឲ្យពួកគាត់មានបទពិសោធប្រកួតចាប់ពីឆ្នាំ២០១៩នេះតទៅ រហូតដល់ឆ្នាំ២០២៣ ដែលកម្ពុជាធ្វើជាម្ចាស់ផ្ទះកីឡាស៊ីហ្គេម»។ ការលើកឡើងបែបនេះរបស់លោក ឆាំង ពិសិដ្ឋ ធ្វើឡើងក្នុងសន្និសីទសារព័ត៌មានបើករដូវកាលថ្មីនៅថ្ងៃទី៦ ខែមីនា ឆ្នាំ២០១៩នេះ។
ទោះបីក្នុងចំណោមក្រុមទាំងបីមានពីរជាសមាជិកថ្មី និងមួយជាសមាជិកចាស់ក៏ដោយ ប៉ុន្តែលោក ឆាំង ពិសិដ្ឋ ជឿជាក់ថា ទាំងពានរង្វាន់ក្របខណ្ឌមិត្តហ្វូនខេមបូឌានលីក និងពានរង្វាន់សម្តេច ហ៊ុន សែន នៅឆ្នាំនេះ នឹងមានការប្រកួតស្វិតស្វាញជាងមុន។ ហើយ លោកក៏ជឿជាក់ផងដែរថា ក្រុមថ្មីនេះនឹងមិនក្លាយជាក្រុមដែលត្រូវបានកាត់ចេញ ឬដកខ្លួនចេញនៅរដូវកាលក្រោយ។
គួររំលឹកថា ការផ្អាកការរៀបចំលីកទី២នេះដែរ បានធ្វើឲ្យមានការប្រែប្រួលចំពោះរូបមន្តនៃការកាត់ក្រុមចេញពីក្របខណ្ឌកំពូលរដូវកាលមុន ដោយ CNCC សម្រេចរក្សាក្រុមទាំង១២នៅដដែល។ ទោះបីយ៉ាងនេះក្តី ក្រុមវេស្ទើនភ្នំពេញដែលបញ្ចប់ក្នុងចំណាត់ថ្នាក់បាតតារាងក្នុងរដូវកាលឆ្នាំ២០១៨ បានប្រកាសដកខ្លួនចេញនៅរដូវកាលនេះ ក្រោមហេតុផលជួបបញ្ហាហិរញ្ញវត្ថុ។
សម្រាប់រូបមន្តប្រកួតនៅឆ្នាំនេះត្រូវបានលេខាប្រតិបត្តិខាងលើអះអាងថា គឺមិនមានការប្រែប្រួលឡើយដោយរក្សានៅដដែលដូចរដូវកាលមុន។ ពោលគឺមិនមានការប្រកួតវគ្គខ្វែង៤ក្រុមចុងក្រោយឡើយ ដោយក្រុមមានពិន្ទុខ្ពស់ជាងគេក្នុងការប្រកួតសន្សំពិន្ទុនឹងក្លាយជាម្ចាស់ជើងឯកតែម្តង ហើយក្រុមមានពិន្ទុខ្ពស់ជាបន្តបន្ទាប់ទទួលបានចំណាត់ថ្នាក់លេខ២, ៣ និងលេខ៤រៀងគ្នា។
ពាក់ព័ន្ធនឹងប្រាក់រង្វាន់លើកទឹកចិត្តមិនទាន់ត្រូវបានបង្ហាញនៅឡើយទេ តែទំនងអាចមានការប្រែប្រួលនៅឆ្នាំនេះ។ លោក ឆាំង ពិសិដ្ឋ បានបញ្ជាក់ថា ពាក់ព័ន្ធនឹងបញ្ហានេះ CNCC នឹងធ្វើសន្និសីទនៅពេលឆាប់ៗខាងមុខនេះ។ ពានរង្វាន់លីកកំពូលរដូវកាលឆ្នាំ២០១៩ នឹងចាប់ផ្តើមប្រកួតនៅថ្ងៃទី១៥ ខែមីនា ឆ្នាំ២០១៩ ខាងមុខ ដោយមួយសប្តាហ៍ការប្រកួតចំនួន៧គូ។ លោកបន្ថែមថា នៅឆ្នាំនេះមិនអនុញ្ញាតឲ្យក្រុមទាំងអស់ប្រើប្រាស់ពហុកីឡដ្ឋានជាតិដើម្បីរៀបចំការប្រកួតនោះឡើយ។ ពោលគឺក្រុមនីមួយៗត្រូវមានទីលានដោយផ្ទាល់ ឬជួលពហុកីឡដ្ឋានរបស់ក្រុមផ្សេងៗ ពេលខ្លួនធ្វើជាម្ចាស់ផ្ទះការប្រកួត។
ក្រុមទាំង១៤នោះរួមមាន៖ ណាហ្គាវើល, បឹងកេត, ភ្នំពេញក្រោន, ក្រសួងការពារជាតិ, អគ្គស្នងការនគរបាលជាតិ, វិសាខា, អង្គរថាយហ្គឺរ, សូលទីឡូអង្គរ, អគ្គិសនីកម្ពុជា, ព្រះខ័នរាជស្វាយរៀង, អាស៊ីអឺរ៉ុប, គីរីវង់សុខសែនជ័យ, យុវជនបាទីអាយុក្រោម១៨ឆ្នាំ និងខេត្តកំពង់ចាម៕