អគ្គលេខាធិការសហព័ន្ធខ្មែរកីឡាហែលទឹកលោក ហែម គីរី រំពឹងថា សិក្ខាកាមទាំង២០រូបដែលទទួលបានការបណ្តុះបណ្តាលវគ្គគ្រូបង្វឹកបាល់ទឹក(Water Polo)កម្រិតមួយ មានសមត្ថភាព និងលទ្ធភាពខ្ពស់ក្នុងការបង្វឹកកីឡាករនៅតាមមូលដ្ឋាន។ លោកបានចាត់ទុកវគ្គនេះ គឺជាជំហានមួយដ៏សំខាន់ក្នុងការពង្រីកធនធានគ្រូបង្វឹកកម្រិតមូលដ្ឋាននៅតាមខេត្ត ដែលនឹងក្លាយជាផ្នែកមួយក្នុងការអភិវឌ្ឍន៍កីឡាបាល់ទឹកនៅកម្ពុជា។
មន្ត្រី អតីត និងកីឡាកររបស់សហព័ន្ធខ្មែរកីឡាហែលទឹកចំនួន២០រូប ទទួលបានការបណ្តុះបណ្តាលទាំងទ្រឹស្តី និងការអនុវត្តពីបច្ចេកទេសបង្វឹកកីឡាបាល់ទឹកពីគ្រូបង្វឹកជនជាតិគុយបា លោក Alexander dela Celda Brokina។ ការបណ្តុះបណ្តាលនេះ ធ្វើឡើងក្នុងវគ្គ«គ្រូបង្វឹកកីឡាបាល់ទឹកកម្រិត១»ដែលរៀបចំរយៈពេល៣ថ្ងៃចាប់ពីថ្ងៃទី៥-៧ ខែមីនា ឆ្នាំ២០១៩ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹករំពឹងថា សិក្ខាកាមទាំងអស់ នឹងទទួលបានចំណេះដឹងថ្មីៗពីវគ្គនេះ ដើម្បីអភិវឌ្ឍសមត្ថភាពរបស់ពួកគេឲ្យកាន់តែប្រសើរ។ លើសពីនេះ ពួកគេនឹងយកចំណេះដឹងទាំងនោះទៅចែករំលែក និងបង្វឹកដល់កីឡាករកីឡាការិនីថ្នាលនៅតាមមូលដ្ឋាន ដើម្បីពង្រីកកីឡាបាល់ទឹកឲ្យកាន់តែទូលំទូលាយ។
«អ្វីដែលខ្ញុំគិតថាជាផលចំណេញតបទៅវិញនោះ គឺពេលគាត់បានបញ្ចប់វគ្គនេះ នឹងមានលទ្ធភាពខ្ពស់ក្នុងការបង្ហាត់កីឡាករ ឬក៏ក្មេងៗដែលចូលចិត្តបាល់ទឹក ពីបច្ចេកទេសមូលដ្ឋានគ្រឹះនៃកីឡានេះ។ គោលបំណងមួយទៀតដែលយើងចង់បាន គឺចង់ឲ្យគាត់បណ្តុះបណ្តាលកីឡាករក្មេងៗនៅតាមក្លិប ឬទីកន្លែងដែលគាត់នៅ។ និយាយរួមយើងបើកវគ្គនេះ គឺចង់ឲ្យមានគ្រូបង្វឹក»។ នេះជាលើកឡើងរបស់លោក ហែម គីរី។
អគ្គលេខាធិការរូបនេះបន្ថែមថា ក្រោយវគ្គបណ្តុះបណ្តាលគ្រូបង្វឹកនេះ លោក នឹងស្នើសុំទៅប្រធានសហព័ន្ធខ្មែរកីឡាហែលទឹកគឺលោក ស៊ុន ចាន់ថុល ដើម្បីរៀបចំឲ្យការប្រកួតកីឡាបាល់ទឹកជ្រើសរើសពានរង្វាន់ណាមួយនៅកម្ពុជា។ ការគ្រោងធ្វើសំណើរនេះ គឺដើម្បីពង្រឹងសមត្ថភាពកីឡាករ និងមន្ត្រីបច្ចេកទេសអាជ្ញាកណ្តាលចៅក្រម ដើម្បីមើលពីលទ្ធភាពក្នុងការបញ្ចូលកីឡានេះក្នុងការប្រកួតកីឡាស៊ីហ្គេមនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
នេះជាលើកទី២ហើយ ដែលសហព័ន្ធ រៀបចំឲ្យមានវគ្គបណ្តុះបណ្តាលគ្រូបង្វឹកកីឡាបាល់ទឹកនេះ ខណៈលើកមុនវគ្គនេះផ្តោតសំខាន់លើការបណ្តុះបណ្តាលក្បួនច្បាប់ និងបទបញ្ជាការប្រកួត។ ចំណែកលើកទី២នេះ ផ្តោតលើបច្ចេកទេសនៃការបង្វឹកកីឡាបាល់ទឹកតែម្តង ដោយមានការអនុវត្តជាក់ស្តែង៦០ភាគរយ និងទ្រឹស្តី៤០ភាគរយ។
ពាក់ព័ន្ធរូបមន្តលេងបាល់ទឹក គឺស្រដៀងនឹងការលេងបាល់ទាត់ហ្វូតសាល និងបាល់បោះ ដោយក្រុមនីមួយៗមានគ្នា១០រូបលេងលើទីលាន៧រូប និងបម្រុង៣រូប។ សម្រាប់ការលេងចែកចេញជា៤វគ្គដោយ១វគ្គមាន៨នាទី បើក្រុមណាអាចស៊ុតបាល់ចូលបានច្រើនជាងគេ គឺក្រុមនោះជាអ្នកឈ្នះ ហើយក្នុងអំឡុងពេលលេងក្រុមនីមួយៗអាចដោះដូរកីឡាករបានដោយសេរី។
សិក្ខាកាមទាំង២០រូបខាងលើមកពី៦រាជធានីខេត្តរួមមានបាត់ដំបង, ត្បូងឃ្មុំ, កំពង់ចាម, កណ្តាល, សៀមរាប និងរាជធានីភ្នំពេញ ដែលមានក្លិបក្រសួងមហាផ្ទៃ, ក្រសួងសេដ្ឋកិច្ចនិងហិរញ្ញវត្ថុ, ក្រសួងសាធារណការនិងដឹកជញ្ជូន និងក្រសួងព័ត៌មាន៕