ជាតិ
បទយកការណ៍ / បទសម្ភាសន៍
អ្នកចិត្តសាស្ត្របានញែក «មិនសប្បាយចិត្ត បាក់ទឹកចិត្ត និងជំងឺបាក់ទឹកចិត្ត»
× ភ្នំពេញ៖ ជំងឺបាក់ទឹកចិត្តអាចបណ្ដាលពីការជួបនូវភាពបរាជ័យច្រើន រងការម៉ាក់ងាយ បន្ទោសបង្អាប់ ជាដើម។ បុគ្គលដែលមានការវិវឌ្ឍឈានដល់កើតជំងឺនេះ អាចស្ដែងនូវអាការមួយចំនួន ចូលចិត្តនៅស្ងៀមស្ងាត់ ស្រងូតស្រងាត់លែងសកម្មដូចមុន ការគិតច្រើនក្នុងផ្លូវអវិជ្ជមាន បន្ទោសខ្លួនឯង អស់សង្ឃឹម គេងមិនលក់ ទ្រុឌទ្រោមផ្នែករាងកាយជាដើម។ អ្នកដែលដឹងថាខ្លួនកំពុងស្ថិតក្នុងបញ្ហាផ្លូវចិត្ត គួរកត់សម្គាល់ខ្លួនឯង និងរកដំណោះស្រាយ ចៀសវាងការវិវឌ្ឍដល់ជំងឺបាក់ទឹកចិត្តនេះ។ អ្នកកើតជំងឺនេះ គឺជាអ្នកមិនអាចទប់ទល់នឹងវិបត្តិដែលកើតឡើងចំពោះខ្លួន រហូតអ្នកខ្លះជ្រើសរើសផ្លូវធ្វើអត្តឃាតក៏មានដែរ។
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក ហឿ សេធុល អ្នកឯកទេសចិត្តសាស្ត្រ និងជានាយកប្រឹក្សាជំងឺផ្លូវចិត្តនៃក្រុមហ៊ុន KCPS វគ្គ១ ដូចតទៅនេះ៖
លោក ហឿ សេធុល ដែលជាអ្នកឯកទេសចិត្តសាស្ត្រ បានញែកជាអារម្មណ៍មិនសប្បាយចិត្ត បាក់ឬធ្លាក់ទឹកចិត្ត និងជំងឺបាក់ទឹកចិត្ត។ អារម្មណ៍មិនសប្បាយចិត្ត កើតឡើងជាធម្មតាក្នុងជីវិតមនុស្ស កើតឡើងភ្លាមៗ និងបាត់ទៅវិញភ្លាមៗ ឬរយៈពេលខ្លីណាមួយ ដែលវាខុសពីបញ្ហាបាក់ទឹកចិត្ត។ តែគួរឲ្យចាប់អារម្មណ៍នោះ អ្នកជំនាញរូបនេះបានបែងចែកបាក់ទឹកចិត្ត និងជំងឺបាក់ទឹកចិត្ត។ បាក់ទឹកចិត្ត ជាដំណាក់កាលអាចឈានដល់ជំងឺបាក់ទឹកចិត្ត។ គេកើតទុក្ខស្រងូតស្រងាត់ តែស្ថិតក្នុងសភាពអាចគ្រប់គ្រងបាន ដូចជានៅអាចធ្វើការបានជាដើម។ ចំពោះជំងឺបាក់ទឹកចិត្ត លោក ហឿ សេធុល ពន្យល់ដូច្នេះថា៖«នៅពេលអ្នកនោះវិវឌ្ឍនទៅជាជំងឺបាក់ទឹកចិត្ត មានន័យថាបុគ្គលនោះចាប់ផ្ដើមពិបាកក្នុងការគ្រប់គ្រងខ្លួនឯង ពិបាកប្រឈមមុខខ្លួនឯងចំពោះសង្គមខាងក្រៅ ចាប់ផ្ដើមបោះបង់ការងារចោល បោះបង់ទំនាក់ទំនងជាមួយមនុស្សជុំវិញ»៕
Tag:
ហឿ សេធុល
បាក់ទឹកចិត្ត
© រក្សាសិទ្ធិដោយ thmeythmey.com