អន្តរជាតិ
ដាច់ភ្លើងទ្រង់ទ្រោយធំនៅវ៉េណេស៊ុយអេឡា រដ្ឋាភិបាលទម្លាក់កំហុសលើអ្នកប្រឆាំង
× ករណីដាច់ភ្លើងទ្រង់ទ្រោយធំ វាយប្រហារវ៉េណេស៊ុយអេឡានៅថ្ងៃទី៧ ខែមីនា ដោយរដ្ឋយ៉ាងហោចណាស់១៨ក្នុងចំណោមរដ្ឋសរុបទាំង២៣របស់ខ្លួនពុំមានអគ្គិសនីប្រើប្រាស់។ ភ្លាមៗក្រោយហេតុការណ៍នេះ រដ្ឋាភិបាលបានចោទប្រកាន់ក្រុមអ្នកប្រឆាំងថាជាអ្នកបង្ករឿងនេះ។
ប្រជាជននៅក្នុងរដ្ឋធានីការ៉ាកាស់ ត្រូវបង្ខំចិត្តដើរដោយថ្មើរជើងរាប់ម៉ោងពីកន្លែងធ្វើការទៅកាន់លំនៅឋានរបស់ពួកគេ ក្រោយពីសេវាកម្មរថភ្លើងក្រោមដីក្នុងទីក្រុងត្រូវបានផ្អាកដោយសារគ្មានថាមពលអគ្គិសនី។ អាកាសយានដ្ឋានអន្តរជាតិត្រូវបានរាយការណ៍ថាស្ថិតក្នុងសភាពងងឹតផងដែរ។
វេបសាយព័ត៌មានវ៉េណេស៊ុយអេឡា El Pitazo បានចុះផ្សាយថា ការដាច់ចរន្តអគ្គិសនីនេះគឺបណ្តាលមកពីការខូចខាតនៃទំនប់វារីអគ្គិសនី Simón Bolívar ដែលស្គាល់ថា Guri ក្នុងរដ្ឋ Bolívar ។ រដ្ឋមន្ត្រីក្រសួងអគ្គិសនីវ៉េណេស៊ុយអេឡា Luis Motta Domínguez និយាយថា៖«ពួកគេ (អ្នកប្រឆាំង) បានបំផ្លាញទំនប់វារីអគ្គិសនីនៅ Guri ដែលជាឆ្អឹងខ្នងនៃប្រព័ន្ធអគ្គិសនីរបស់ប្រទេស។ ហើយនេះមិនមែនជាការវាយប្រហារលើរដ្ឋាភិបាលទេ ប៉ុន្តែវាគឺជាវាយប្រហារលើប្រជាជនតែម្តង»។
ក្នុងសារដាច់ដោយឡែកមួយនៅលើបណ្តាញសង្គម Twitter ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ បានចោទប្រកាន់ «ចក្រពត្ដិនិយមសហរដ្ឋអាមេរិក» ចំពោះបញ្ហានេះ និងបានប្តេជ្ញាថាលោកនឹងកម្ទេចអ្នកទាំងនោះចោល។ ទន្ទឺមនឹងគ្នានេះ ក្រុមហ៊ុនថាមពលអគ្គិសនីរដ្ឋវ៉េណេស៊ុយអេឡា Corpoelec បានអះអាងថា ការដាច់ចរន្តអគ្គិសនីនេះគឺជាផ្នែកមួយនៃសង្គ្រាមអគ្គិសនីប្រឆាំងនឹងរដ្ឋ ហើយខ្លួនកំពុងដុតដៃដុតជើងដើម្បីស្តារការផ្គត់ផ្អង់នេះឡើងវិញ។
ឲ្យពិតទៅ ការដាច់ចរន្តអគ្គិសនីកើតឡើងជារឿយៗក្នុងប្រទេសវ៉េណេស៊ុយអេឡា។ អ្នកជំនាញយល់ឃើញ អំពើពុករលួយ និងការគ្រប់គ្រងលុយវិនិយោគមិនត្រឹមត្រូវ គឺជាមូលហេតុចម្បងនៃរឿងនេះ។ កំពុងប្រឈមនឹងវិបត្តិសេដ្ឋកិច្ចធ្ងន់ធ្ងរ ប្រទេសក្នុងតំបន់អាមេរិកឡាទីនមួយនេះខ្វះខាតទឹក, អាហារហូបចុក និងថ្នាំសង្កូវ ដែលបណ្តាលឲ្យប្រជាជនរាប់លាននាក់សម្រេចចិត្តធ្វើចំណាកស្រុកទៅកាន់ប្រទេសជិតខាង៕
Tag:
វ៉េណេហ្ស៊ុយអេឡា
© រក្សាសិទ្ធិដោយ thmeythmey.com