កីឡាជាតិ
ជាតិ
លោក មាស ចាន់ណា រំពឹងទទួលបាន៣ពិន្ទុនៅល្ងាចនេះ ក្រោយរងរបួសផ្លូវចិត្តនៅវៀតណាម
× លោក មាស ចាន់ណា គ្រូបង្វឹកក្រុមបាល់ទាត់ណាហ្គាវើលរំពឹងកូនក្រុមធ្វើបានល្អនិងទទួលបាន៣ពិន្ទុ ពីជំនួបតទល់ជាមួយក្រុម Yangon United របស់មីយ៉ាន់ម៉ា ក្នុងព្រឹត្តិការណ៍ AFC Cup នៅម៉ោង៦:៣០នាទីល្ងាច ថ្ងៃទី១២ ខែមីនា ឆ្នាំ២០១៩ នាពហុកីឡដ្ឋានជាតិ។ ជាមួយការអះអាងគ្មានកីឡាករមានបញ្ហារបួស លោក ចាន់ណា ថា នឹងមានការផ្លាស់ទម្រង់លេងមួយចំនួនក្នុងជំនួបល្ងាចនេះ។
ក្រោយរងបរាជ័យយ៉ាងធ្ងន់ធ្ងរក្រោមថ្វីជើងម្ចាស់ផ្ទះ Hanoi FC នាជំនួបបើកឆាកកាលពីពេលថ្មីៗ លោក មាស ចាន់ណា គ្រូបង្វឹកក្រុមណាហ្គាវើលជឿជាក់ថា កូនក្រុមលោកនឹងធ្វើបានល្អក្នុងជំនួបតទល់ជាមួយ Yongon United នៅល្ងាចនេះ។ លើសពីនេះលោករំពឹងថា ក្រុមណាហ្គាវើលនឹងទទួលបាន៣ពិន្ទុ សម្រាប់ជំនួបក្នុងដីមួយនេះ។ កត្តាដែលធ្វើឲ្យ លោក មានជំនឿចិត្តបែបនេះ ដោយសារវាជាការប្រកួតក្នុងដី ដែលមានលក្ខណៈអំណោយផលទាំងបរិស្ថាន អាកាសធាតុ និងទីលាន ពិសេសទទួលបានការលើកទឹកចិត្តពីអ្នកគាំទ្រ។
«ពេលនេះយើងពុំមានកីឡាកររបួសនោះទេ តែមុនជួបប្រកួតជាមួយក្រុម Yangon United ពេលយើងត្រឡប់មកពីវៀតណាម មានកីឡាកររបួសដែរ តែរបួសផ្លូវចិត្ត។ ប៉ុន្តែពេលនេះអ្វីៗបានត្រឡប់មករកភាពដើមវិញហើយ ក្រោយយើងហ្វឹកហាត់និងជជែកគ្នាពីបញ្ហានេះ។ យើងជឿជាក់ថា វានឹងប្រសើរជាងការប្រកួតនៅហាណូយ»។ ការលើកឡើងបែបនេះរបស់លោក មាស ចាន់ណា ធ្វើឡើងក្នុងសន្និសីទសារព័ត៌មានមុនការប្រកួតកាលពីថ្ងៃទី១១ ខែមីនា ឆ្នាំ២០១៩ នៅពហុកីឡដ្ឋានជាតិ។
សម្រាប់ការប្រកួតដែលធ្វើឡើងនៅម៉ោង៦:៣០នាទីល្ងាចថ្ងៃទី១២ ខែមីនា នាពហុកីឡដ្ឋានជាតិ លោក មាស ចាន់ណា អះអាងថា លោកនឹងផ្លាស់ប្តូរទម្រង់ និងប្រព័ន្ធលេងមួយចំនួនពិសេសក្នុងតំបន់ការពារ និងប្រយុទ្ធ។ តាមរយៈការផ្លាស់ប្តូរនេះ លោករំពឹងថា ក្រុមណាហ្គាវើលនឹងធ្វើបានល្អជាងការប្រកួតបើកឆាកជាមួយក្រុម Hanoi FC ដែលពួកគេបានចាញ់រហូត ១០-០។
«បន្ទាប់ពីបរាជ័យនៅទីក្រុងហាណូយ យើងនឹងកែប្រែទម្រង់ការពារ ព្រោះទម្រង់ការពារពេលលេងនៅហាណូយកីឡាករយើងទាំងបីធ្វើខុសទាំងបី។ ប៉ុន្តែបន្ទាប់ពីជជែកវែកញែករួចមក ពួកគាត់ទទួលស្គាល់ថា ពួកគាត់ពិតជាធ្វើខុសមែន ព្រោះមានការភាន់ច្រឡំចំពោះទម្រង់ការពារ តែក្រោយកែប្រែយើងសង្កេតឃើញថា ពួកគាត់មានភាពល្អប្រសើរជាងមុន»។ នេះជាការលើកឡើងរបស់គ្រូបង្វឹកកាន់សញ្ញាបត្របង្វឹកកម្រិត A License ខាងលើ។
ទន្ទឹមនឹងក្តីរំពឹង លោក មាស ចាន់ណា បានបង្ហាញក្តីបារម្ភយ៉ាងដូច្នេះថា៖«អ្វីដែលជាក្តីបារម្ភរបស់ខ្ញុំ គឺបារម្ភពីការគ្មានសំណាងពេលយើងមានឱកាស។ តែខ្ញុំជឿជាក់ថា កូនក្រុមខ្ញុំនឹងធ្វើបានល្អឆ្ងាយជាងការប្រកួតនៅហាណូយ ក្រោយយើងផ្លាស់ប្តូរទម្រង់លេង។ សម្រាប់ទម្រង់លេងនៅហាណូយ យើងផ្លាស់ប្តូរទម្រង់ថ្មីតែម្តង»។
ពូល F នេះដែរ ក្រុមម្ចាស់ផ្ទះ Tampines Rovers FC ត្រូវស្វាគមន៍ភ្ញៀវ Hanoi FC នៅម៉ោង៦:៣០នាទី(ម៉ោងនៅកម្ពុជា)នាកីឡដ្ឋាន Jalan Besar Stadium។ សម្រាប់ជំនួបបើកឆាកពូល F កាលពីថ្ងៃទី២៦ ខែកុម្ភៈ ក្រុមណាហ្គាវើលបានចាញ់ក្រុមម្ចាស់ផ្ទះ Hanoi FC ១០-០ ខណៈ Yangon United ចាញ់ភ្ញៀវ Tampines Rovers FC របស់សិង្ហបុរី ៣-១៕
Tag:
បាល់ទាត់
មាស ចាន់ណា
AFC Cup
© រក្សាសិទ្ធិដោយ thmeythmey.com