ជាតិ
សង្គមជាតិ
ការងារជំរឿននៅបណ្តាខេត្តបញ្ចប់បណ្តើរៗ តែនៅភ្នំពេញ និងខេត្តព្រះសីហនុ អាចយឺតយ៉ាវ
រូបភាពពីរដ្ឋបាលរាជធានីភ្នំពេញ
×![]()
ភ្នំពេញ៖ គិតត្រឹមថ្ងៃទី១៣មីនានេះ ជាថ្ងៃបញ្ចប់កិច្ចការងារធ្វើជំរឿននៅតាមរាជធានី-ខេត្តទូទាំងប្រទេសកម្ពុជា។ នៅតាមបណ្តាខេត្តមួយចំនួន មន្ត្រីជំរឿនបានបញ្ចប់ការងារនេះបណ្តើរៗហើយ ប៉ុន្តែនៅរាជធានីភ្នំពេញ និងខេត្តព្រះសីហនុ ការធ្វើជំរឿនទំនងយឺតយ៉ាវបន្តិច ដោយសារកំណើនប្រជាជនច្រើន។ លោក ណុប កនណាវុឌ្ឍ អ្នកនាំពាក្យក្រសួងផែនការបញ្ជាក់ប្រាប់សារព័ត៌មានថ្មីៗដូច្នេះ។ 
មន្ត្រីជំរឿន កំពុងតែញាប់ដៃញាប់ជើង បញ្ចប់ការងាររបស់ខ្លួនឲ្យទាន់ពេលវេលាដែលកំណត់ត្រឹមថ្ងៃទី១៣ ខែមីនានេះ។ លោក ណុប កនណាវុឌ្ឍ អ្នកនាំពាក្យក្រសួងផែនការ បានប្រាប់អ្នកសារព័ត៌មានថ្មីៗតាមទូរសព្ទថា មកដល់ថ្ងៃនេះខាងមន្ត្រីជំរឿនកំពុងតែបន្តកិច្ចការងារជំរឿនយ៉ាងមមាញឹក។ បើតាមអ្នកនាំពាក្យដដែល នៅតាមបណ្តាខេត្តមួយចំនួន មន្ត្រីជំរឿនបានបញ្ចប់ការងារនេះបណ្តើរៗហើយ លើកលែងតែរាជធានីភ្នំពេញ និងខេត្តព្រះសីហនុ ដែលទំនងជាចប់យឺតជាងគេ ដោយសារកំណើនប្រជាជនច្រើន។ លោក ណុប កនណាវុឌ្ឍ បញ្ជាក់ដូច្នេះ៖«ការធ្វើជំរឿននៅរាជធានីភ្នំពេញ ងខេត្តព្រះសីហនុ យើងបានបញ្ជូនមន្ត្រីជំរឿនបន្ថែមទៀត ដើម្បីឲ្យកិច្ចការការងារមួយនេះប្រព្រឹត្តទៅយ៉ាងរលូន»។
បើតាមលោក លោក ណុប កនណាវុឌ្ឍ រយៈពេលធ្វើជំរឿនរយៈពេល១០ថ្ងៃមកនេះ មន្ត្រីជំរឿនបានប្រទះនឹងបញ្ហាមួយចំនួនដូចជាគ្រោះថ្នាក់ចរាចរណ៍, សត្វឆ្កែខាំ ពេលចុះទៅប្រមូលព័ត៌មានផ្ទាល់ដល់ផ្ទះប្រជាពលរដ្ឋនៅ និងការរារាំងមន្ត្រីជំរឿនមិនឲ្យធ្វើកិច្ចការនេះជាដើម។ ទោះជាយ៉ាងនេះក្តីអ្នកនាំពាក្យក្រសួងផែនការ អះអាងថា ការធ្វើជំនរឿនប្រជាជនលើកទី៣នេះ នឹងបញ្ចប់ទៅដោយរលូនល្អ។
សូមបញ្ជាក់ថា ការធ្វើជំរឿនលើកទី៣នេះ បានចាប់ផ្តើមពីថ្ងៃទី៣ ដល់ថ្ងៃទី១៣ ខែមីនា ដោយគ្រោងចំណាយថវិការដ្ឋជាង៨លានដុល្លារ។ ការងារជំរឿនប្រជាជនកម្ពុជា បានធ្វើរួច២ដងហើយគឺនៅឆ្នាំ១៩៩៨ និងឆ្នាំ២០០៨។ ជំរឿននៅឆ្នាំ១៩៩៨ មានប្រជាជនចំនួន១១,៤៣៧,៦៥៦នាក់ ហើយឡើងដល់ ១៣,៣៩៥,៦៨២នាក់ នៅឆ្នាំ២០០៨។ នៅឆ្នាំ២០១៥ អង្គការសហប្រជាជាតិ បានប៉ាន់ប្រមាណថា ចំនួនប្រជាជនកម្ពុជាកើនដល់១៥,៥៨លាននាក់៕
Tag:
ជំរឿន
© រក្សាសិទ្ធិដោយ thmeythmey.com
