វៀតណាមបិទដែនអាកាសមិនឲ្យយន្តហោះប៊ូអុីង 737 MAX ហោះឆ្លងកាត់

អន្តរជាតិ

វៀតណាមបិទដែនអាកាសមិនឲ្យយន្តហោះប៊ូអុីង 737 MAX ហោះឆ្លងកាត់

13, Mar 2019 , 9:19 pm

រូបភាព

ដោយ:

អាជ្ញាធរអាកាសចរណ៍វៀតណាម បានសម្រេចហាមប្រាមយន្តហោះប៊ូអ៊ីង 737 MAX ពីការហោះឆ្លងកាត់ដែនអាកាសខ្លួន ដោយលើកឡើងពីកង្វល់ជុំវិញបញ្ហាសុវត្ថិភាពនៃយន្តហោះប្រភេទនេះ។ ការដាក់ចេញចំណាត់ការនេះ គឺធ្វើឡើងក្រោយពីមានហេតុការណ៍គ្រោះថ្នាក់ធ្លាក់យន្តហោះប្រភេទប៊ូអុីង 737 MAX កើតឡើងចំនួន២ដងទៅហើយ ក្នុងរយៈពេលមិនដល់៦ខែផងនោះ។

ការហាមប្រាមនេះ បានចូលជាធរមាននៅម៉ោង១០ព្រឹក ថ្ងៃពុធទី១៣ ខែមីនា។ នេះបើតាមសេចក្តីថ្លែងការណ៍របស់អាជ្ញាធរអាកាសចរណ៍ស៊ីវិលវៀតណាម។ ក្នុងសេចក្តីថ្លែងការណ៍ដដែលនេះ លោក Dinh Viet Thang ប្រធាននៃភ្នាក់ងារនេះ គូសបញ្ជាក់ថា៖«ក្រុមហ៊ុនអាកាសចរណ៍ នឹងត្រូវរងផលប៉ះពាល់ដោយសារចំណាត់ការនេះ ដ្បិតពួកគេនឹងត្រូវប្រើប្រាស់យន្តហោះប្រភេទផ្សេង។ ប៉ុន្តែទាំងអស់នេះគឺដើម្បីមូលហេតុសុវត្ថិភាព»។

យោងតាមការចុះផ្សាយរបស់សារព័ត៌មាន Vietnam Express ក្រុមហ៊ុនអាកាសចរណ៍ Eastar Jet របស់កូរ៉េខាងត្បូង, ក្រុមហ៊ុន Thai Lion Air របស់ថៃ និងក្រុមហ៊ុន Malindo Air របស់ម៉ាឡេស៊ី ធ្វើប្រតិបត្តិការជើងហោះហើរដោយប្រើប្រាស់យន្តហោះ Boeing 737 MAX ទៅកាន់ប្រទេសវៀតណាម។ យ៉ាងណាមិញ ភ្លាមៗក្រោយមានហេតុការណ៍ធ្លាក់យន្តហោះប្រភេទនេះនៅអេត្យូពី ក្រុមហ៊ុនអាកាសចរណ៍ទាំងនេះ សម្រេចផ្អាកប្រតិបត្តិការជាបណ្តោះអាសន្នសិន ដើម្បីរង់ចាំលទ្ធផលនៃការស៊ើបអង្កេតរកមូលហេតុនៃការធ្លាក់។

ខណៈបច្ចុប្បន្ននេះ ពុំមានក្រុមហ៊ុនអាកាសចរណ៍វៀតណាមណាមួយបើកប្រតិបត្តិការយន្តហោះ ប៊ូអុីង 737 MAX 8 ទេ។ ក្រុមហ៊ុនអាកាសចរណ៍ Vietjet កាលពីថ្មីៗនេះ បានបញ្ជាទិញយន្តហោះប្រភេទនេះចំនួន ២០០គ្រឿងពីក្រុមហ៊ុនយក្សរបស់អាមេរិក។ ហើយយន្តហោះ ប៊ូអុីង 737 MAX 8 ដំបូង នឹងត្រូវបញ្ជូនទៅដល់ប្រទេសវៀតណាម នាខែតុលាខាងមុខ។

អត្ថបទទាក់ទង

ក្រុមហ៊ុនអាមេរិក«ប៊ូអុីង» ប្រឈមនឹងការបាក់មុខ និងខាតចំណូល ក្រោយការធ្លាក់យន្តហោះស៊េរី 737 MAX8

អាមេរិក បន្តប្រើយន្តហោះរបស់ប៊ូអ៊ីង តែប្រាប់ក្រុមហ៊ុនឲ្យបង្កើនគុណភាព

មកដល់ពេលនេះ ប្រទេស៨សម្រេចផ្អាកប្រតិបត្តិការយន្តហោះ Boeing 737 MAX

ក្រោយហេតុការណ៍នៅអេត្យូពី ចិនបញ្ជាឲ្យផ្អាកការប្រើប្រាស់យន្តហោះ Boeing 737 Max

សូមបញ្ជាក់ថា ការធ្លាក់យន្តហោះកាលពីថ្ងៃអាទិត្យសប្តាហ៍មុននៅអេត្យូពី គឺជាឧប្បទ្ទវហេតុលើកទីពីរហើយក្នុងរយៈពេលមិនដល់៦ខែផង ដែលពាក់ព័ន្ធនឹងយន្តហោះប៊ូអុីង 737 MAX 8 ។ ឧប្បទ្ទវហេតុទីមួយ បានកើតឡើងកាលពីខែតុលាឆ្នាំ២០១៨កន្លងទៅ ដោយយន្តហោះប្រភេទដូចគ្នានេះដែលប្រតិបត្តិការរបស់ក្រុមហ៊ុន Lion Air របស់ឥណ្ឌូណេស៊ីបានធ្លាក់ចុះ ត្រឹម១៣នាទីប៉ុណ្ណោះបន្ទាប់ហោះឡើងផុតដី។ ក្នុងហេតុការណ៍នេះបានសម្លាប់មនុស្សទាំងអស់ ១៨៩នាក់។