កីឡាអន្តរជាតិ
អន្តរជាតិ
គ្រូ Bayern Munich ៖ ក្រុមខ្ញុំសមនឹងត្រូវ Liverpool ទម្លាក់ពីក្របខណ្ឌ UEFA Champions League
× លោក Niko Kovac គ្រូបង្វឹក Bayern Munich បាននិយាយថាក្រុមរបស់លោកសមនឹងត្រូវ Liverpool ទម្លាក់ពីក្របខណ្ឌ UEFA Champions League នៅវគ្គ១៦ក្រុមចុងក្រោយនេះហើយ។
វាជារឿងដែលត្រូវបំភ្លេចបានសម្រាប់ក្រុម Bayern Munich បន្ទាប់ពីពួកគេរងបរាជ័យដោយលទ្ធផល ៣-១ ក្រោមស្នាដៃក្រុម Liverpool ក្នុងដីខ្លួនឯងនាកីឡដ្ឋាន Allianz Arena នៅរាត្រីថ្ងៃទី១៣ ខែមីនា។
ចាប់តាំងពីរដូវកាល ២០១០-១១ មក នេះជាលើកទី១ហើយដែលក្រុមម្ចាស់ជើងឯក Bundesliga ធ្លាក់ចេញពីពានរង្វាន់កំពូលអឺរ៉ុបត្រឹមវគ្គ១៦ក្រុមចុងក្រោយ។
លោក Kovac បានប្រាប់ទូរទស្សន៍ Sky ក្រោយចប់ការប្រកួតថា៖ «យើងមានគូប្រជែងខ្លាំងហើយយើងត្រូវអបអរ Liverpool និងលោក Jurgen Klopp។ ពួកគេលេងបានល្អជាងយើងសម្រាប់ការប្រកួតទាំងពីរជើង ហើយយើងសមនឹងទទួលបរាជ័យ។ គូប្រជែងមួយនេះបានវាយសម្រុកយើងយ៉ាងខ្លាំងស្ទើរតែដកឃ្លាមិនបាន ដែលធ្វើឲ្យយើងពិបាក»។
គ្រូសញ្ជាតិក្រូអាស៊ី វ័យ៤៧ឆ្នាំរូបនេះ បានសរសើរក្រុមរបស់លោក Klopp ទៀតថា Liverpool ជាក្រុមកំពូលមួយនៅទ្វីបអឺរ៉ុប ដែលពួកគេបានធ្វើឲ្យក្រុម Bayern Munich បានដឹងពីកម្រិត និងសមត្ថភាពលេងរបស់ខ្លួន។ចំណុចពិសេសដែលជាការអះអាងនូវអ្វីដែលលោក Kovac ទទួលស្គាល់បរាជ័យនេះ គឺនៅក្រោយពេលខ្សែបម្រើ Sadio Mane បានប្រើសមត្ថភាពដ៏អស្ចារ្យដោយញាក់ផុតអ្នកចាំទី Manuel Neuer រួចស៊ុតបញ្ចូលទីឲ្យ Liverpool នាំមុខនៅនាទី២៦នោះ ក្នុងចំណោម២គ្រាប់របស់គេ។
ការសម្រេចទីគ្រាប់ទី១របស់ Mane នេះសូម្បីតែ Neuer ខ្លួនឯងផ្ទាល់ក៏ទទួលស្គាល់ និងកោតសរសើរពីភាពរហ័សរបស់ខ្សែបម្រើសញ្ញាតិសេណេហ្គាល់រូបនេះដែរ៕
Tag:
បាល់ទាត់
UEFA Champions League
Niko Kovac
© រក្សាសិទ្ធិដោយ thmeythmey.com