សង្គមអន្តរជាតិ
អន្តរជាតិ
ប៉ូលិសឥណ្ឌាចាប់ខ្លួនយុវជន១០នាក់ ដែលលួចលេងហ្គេម PUBG
× មួយសប្តាហ៍ក្រោយពីប្រកាសហាមប្រាមការលេងហ្គេមទូរសព្ទដៃដ៏ពេញនិយមឈ្មោះថា PUBG ប៉ូលិសក្រុង Rajkot របស់ឥណ្ឌាបានសម្រេចឃាត់ខ្លួនមនុស្ស១០នាក់ ក្រោយពីពួកគេត្រូវបានអាជ្ញាធររកឃើញថា លួចលេងហ្គេម PUBG ។ ក្នុងចំណោមអ្នកទាំង១០នាក់នោះ ៦នាក់គឺជានិស្សិតសកលវិទ្យាល័យ។ ការចាប់ខ្លួននេះ ត្រូវបានធ្វើឡើងកាលពីថ្ងៃពុធទី១៣ខែមីនា ក្នុងទីក្រុង Rajkot ភាគខាងលិចរដ្ឋ Gujarat។
ស្នងការប៉ូលិសប្រចាំក្រុង Rajkot នៃរដ្ឋ Gujarat លោក Manoj Agrawal ដែលចេញបញ្ជាហាមហ្គេមនេះក្នុងទីក្រុងកាលពីថ្ងៃទី៦ ខែមីនាកន្លងទៅ បាននិយាយនៅថ្ងៃទី១៤ខែមីនាថា ករណីបែបនេះបានកើតឡើងចំនួន១២ដងហើយ គិតចាប់ពីសេចក្តីប្រកាសបានដាក់ចេញមក។ ប៉ុន្តែក្រោយចាប់ខ្លួនរួច តាមនិតិវិធីច្បាប់ ជនល្មើសទាំងនោះ ត្រូវបានដោះលែងឲ្យនៅក្រៅឃុំវិញ និងរង់ចាំឡើងតុលាការនាពេលខាងមុខ។
យោងតាមការចុះផ្សាយរបស់សារព័ត៌មាន The Indian Express សមត្ថកិច្ចម្នាក់ទៀតឈ្មោះថា Rohit Raval អះអាងថា ហ្គេមប្រភេទនេះ គឺមានលក្ខណៈញៀនខ្លាំង ហើយអ្នកដែលត្រូវសមត្ថកិច្ចឃាត់ខ្លួនគឺសុទ្ធវក់លេងហ្គេមខ្លាំងនេះ ពោលគឺដល់ថ្នាក់មិនដឹងថា ក្រុមសមត្ថកិច្ចដើរទៅក្បែរពួកគេថែមទៀតផង។
សូមបញ្ជាក់ថា Gujarat គឺជារដ្ឋតែមួយកត់ក្នុងប្រទេសឥណ្ឌាដែលហាមប្រាមការលេងហ្គេម PUBG ដោយបារម្ភពីឥទ្ធិពលរបស់វាប៉ះពាល់ដល់អ្នកញៀនលេង។ យ៉ាងណាមិញ គេមានលើកឡើងពីកង្វល់ដូចគ្នានេះ នៅក្នុងផ្នែកផ្សេងៗទៀតក្នុងប្រទេសឥណ្ឌា ទីដែលប្រជាជនប្រមាណ៥០០លាននាក់ មានទូរសព្ទទំនើបប្រើប្រាស់។ គ្រូបង្រៀន និងឳពុកម្តាយ និយាយថា ហ្គេមនេះ បង្កជាអំពើហិង្សា និងបង្វក់សិស្សពីការសិក្សារៀនសូត្ររបស់ពួកគេថែមទៀតផង៕
© រក្សាសិទ្ធិដោយ thmeythmey.com