នយោបាយជាតិ
លោក មូន ចេអ៊ីន នឹងបង្កើនការជ្រោមជ្រែងកម្ពុជា ក្រោម«គោលនយោបាយភាគខាងត្បូងថ្មី»
សម្តេច ហ៊ុន សែន ស្វាគមន៍លោក មូន ចេអ៊ីន នៅវិមានសន្តិភាពព្រឹកថ្ងៃសុក្រទី ១៥ ខែមីនា (AFP)
×![]()
ប្រធានាធិបតីកូរ៉េខាងត្បូង មូន ចេអ៊ីន និងនាយករដ្ឋមន្ត្រីកម្ពុជាសម្តេច ហ៊ុនសែន បានឯកភាពគ្នាពង្រីកទំនាក់ទំនងសេដ្ឋកិច្ចទ្វេភាគីដើម្បីវិបុលភាពនិងការរីកចម្រើនរួមគ្នា។ មេដឹកនាំកូរ៉េខាងត្បូងក៏សន្យាបង្កើនការជួយជ្រោមជ្រែងការអភិវឌ្ឍរបស់កម្ពុជាបន្ថែមទៀតដែរក្រោមគោលនយោបាយ «ភាគខាងត្បូងថ្មី» ឬ New Southern Policy។
ក្នុងជំនួបទ្វេភាគីរវាងមេដឹកនាំកូរ៉េខាងត្បូង និងកម្ពុជានៅព្រឹកថ្ងៃសុក្រទី ១៥ ខែមីនា សម្តេច ហ៊ុន សែន និងលោក មូន ចេអ៊ីន បានឯកភាពគ្នាពង្រីកទំនាក់ទំនងទ្វេភាគី និង ធ្វើយ៉ាងណាលើកស្ទួយទំនាក់ទំនងរវាងកូរ៉េខាងត្បូងជាមួយសមាគមន៍ប្រជាជាតិអាស៊ីអាគ្នេយ៍ហៅកាត់ថាអាស៊ានផងដែរ។
តាមការផ្សាយរបស់ទីភ្នាក់ងារព័ត៌មានកូរ៉េខាងត្បូង Yonhap សេចក្តីប្រកាសព័ត៌មានរបស់ វិមានប្រធានាធិបតីកូរ៉េខាងត្បូង Cheong Wa Dae បញ្ជាក់ថា លោក មូន ចេអ៊ីន បានបង្ហាញការប្តេជ្ញាចិត្តចូលរួមអភិវឌ្ឍបន្តការអភិវឌ្ឍទំនាក់ទំនងនិងកិច្ចសហប្រតិបត្តិការដែលមានជាមួយកម្ពុជាចាប់ចាប់ពីឆ្នាំ ១៩៩៧ឲ្យកាន់តែរឹងមាំក្រោមគោលនយោបាយ«ភាគខាងត្បូងថ្មី»របស់លោកដែរ។
«លោក មូន សន្យាបង្កើនការគាំទ្រដល់កម្ពុជា ក្រោមគោលនយោបាយភាគខាងត្បូងថ្មី ហើយលោកកត់សម្គាល់ថា កម្ពុជាបច្ចុប្បន្នជាប្រទេសដែលទទួលជំនួយអភិវឌ្ឍន៍ផ្លូវការរបស់កូរ៉េខាងត្បូងធំបំផុតលេខរៀងទីពីរលើពិភពលោក»។ សេចក្តីប្រកាសព័ត៌មាននោះបញ្ជាក់ដូច្នេះ។
ឆ្លើយតបនឹងការលើកឡើងរបស់លោក មូន នាយករដ្ឋមន្ត្រីកម្ពុជាសម្តេច ហ៊ុន សែន បានថ្លែងអំណរគុណដល់មិត្តភក្តិកូរ៉េខាងត្បូងក្នុងការបន្តជួយកម្ពុជា ហើយសម្តេចក៏ស្នើឲ្យកូរ៉េខាងត្បូងបន្តគាំទ្រការអភិវឌ្ឍសេដ្ឋកិច្ចរបស់កម្ពុជាបន្តទៅមុខទៀតដែរ។
ក្រៅពីនេះមេដឹកនាំកម្ពុជាក៏បានបង្ហាញជំហរជាថ្មីក្នុងការគាំទ្រដល់គោលនយោបាយការបរទេសថ្មីរបស់លោក មូន ក៏ដូចជាកិច្ចខិតខំប្រឹងប្រែងរបស់កូរ៉េខាងត្បូងក្នុងការជំរុញឲ្យមានការរំសាយអាវុធនុយក្លេអ៊ែរនៅឧបទ្វីបកូរ៉េផងដែរ។ សម្តេចសង្ឃឹមថា ទំនាក់ទំនងទ្វេភាគី ក៏ដូចជាទំនាក់ទំនងរវាងអាស៊ាន និងកូរ៉េខាងត្បូងនឹងរីកលូតលាស់កាន់តែឆាប់រហ័សថែមទៀត។ នេះបើតាមការបញ្ជាក់ក្នុងសេចក្តីប្រកាសព័ត៌មានរបស់វិមានប្រធានាធិបតីដដែល។
ដោយឡែក ក្នុងទំនាក់ទំនងទ្វេភាគី មេដឹកនាំដឹកនាំទាំងពីរបានសន្យាពង្រឹងការខិតខំប្រឹងប្រែងបន្ថែមទៀតដើម្បីពង្រីកកិច្ចការសហប្រតិបត្តិការលើវិស័យសំខាន់ជាច្រើនមានដូចជាកសិកម្ម ហេដ្ឋារចនាសម្ព័ន្ធ ការផលិត និងវិស័យហិរញ្ញវត្ថុជាដើម។ សម្តេច ហ៊ុន សែន និងលោក មូន ចេអ៊ីនក៏ជំរុញឲ្យមានការពន្លឿនការបង្កើតកិច្ចព្រមព្រៀងលើបញ្ហាពន្ធដើម្បីលើកស្ទួយការវិនិយោគផងដែរ។
សូមបញ្ជាក់ថា កម្ពុជា និងកូរ៉េខាងត្បូងបង្កើតទំនាក់ទំនងការទូតនៅឆ្នាំ ១៩៧០ ហើយទំនាក់ទំនងនោះត្រូវបានកាត់ផ្តាច់ចាប់ពីឆ្នាំ ១៩៧៥ពេលកម្ពុជាធ្លាក់ក្រោមរបប ប៉ុល ពត។ នៅឆ្នាំ រដ្ឋាភិបាលកម្ពុជាស្ថិតក្រោមការដឹកនាំសម្តេច ហ៊ុន សែន បានសម្រេចស្តារចំណងការទូតផ្លូវការជាមួយកូរ៉េខាងត្បូងឡើង ។ ទំនាក់ទំនងនេះនេះកាន់តែស្និទ្ធស្នាលក្នុងវិស័យជាច្រើនទាំងវិស័យនយោបាយ សេដ្ឋកិច្ច ពាណិជ្ជកម្ម និងវប្បធម៌មកដល់បច្ចុប្បន្ន៕
Tag:
មូន ចេអ៊ីន
សម្តេច ហ៊ុន សែន
កម្ពុជា
កូរ៉េខាងត្បូង
New Southern Policy
© រក្សាសិទ្ធិដោយ thmeythmey.com
