ជនសង្ស័យដែលបាញ់សម្លាប់មនុស្សអស់ជាង ៤០ នាក់នៅវិហារឥស្លាមក្រុង Christchurch ប្រទេសនូវែលសេឡង់នៅថ្ងៃ ១៥ ខែមីនា មានវ័យ ២៨ ឆ្នាំ និងជាសមាជិកក្រុមជ្រុលនិយម «ស្បែកសរើសអើងពូជសាសន៍» ផងដែរ។ ជននេះត្រូវបានចោទប្រកាន់នៅតុលាការពីបទឃាតកម្មនៅព្រឹកថ្ងៃសៅរ៍ទី ១៦ខែមីនានេះ។
ករណីបាញ់ប្រហារនៅវិហារឥស្លាមពីរកន្លែងនៅថ្ងៃសុក្រទី ១៥ ខែមីនា បានសម្លាប់រង្គាល់មនុស្សអស់ចំនួនសរុប ៤៩នាក់។ អាជ្ញាធរ និងមេដឹកនាំនូវែលសេឡង់បានចាត់ទុកថា វាជាថ្ងៃដ៏អាក្រក់និងខ្មៅងងឹតសម្រាប់នូវែលសេឡង់ផង។
បើតាមទីភ្នាក់ងារព័ត៌មាន AFP ជនដែលប៉ូលិសចាប់ខ្លួនបានក្រោយប្រព្រឹត្តអំពើព្រៃផ្សៃនេះត្រូវបានគេកំណត់អត្តសញ្ញាណច្បាស់លាស់។ ជននេះមានឈ្មោះថា Brenton Tarrant មានដើមកំណើតអូស្ត្រាលី និងមានវ័យ ២៨ឆ្នាំ។ អ្វីដែលសំខាន់រូបគេជាជនជ្រុលនិយម និងជាសមាជិកក្រុមស្បែកសរើសអើងពូជសាសន៍ (White Supremacist) ថែមទៀតផង។
Brenton Tarrant ដែលធ្លាប់ជាអ្នកអតីតអ្នកបង្ហាត់កីឡានោះ បានបង្ហាញខ្លួននៅតុលាការនៅព្រឹកថ្ងៃសៅរ៍ដើម្បីទទួលការប្រកាន់ជាផ្លូវការ ដោយចៅក្រមគ្រាន់តែកំណត់បទចោទ «ឃាតកម្ម»តែមួយប៉ុណ្ណោះ។ ប៉ុន្តែទោះជាបែបនេះក៏ដោយ គេអាចរំពឹងបានថា ការចោទប្រកាន់បន្ថែមទៀតនឹងត្រូវធ្វើឡើងជាបន្តបន្ទាប់ទៀតដែរ។
ត្រឡប់មកវិញ អ្វីដែលគួរឲ្យចាប់អារម្មណ៍ក្នុងករណីបាញ់ប្រហារសម្លាប់រង្គាលនេះ ខ្មាន់កាំភ្លើងរូបនេះក៏បានថតវីដេអូ Live តាមហ្វេសប៊ុកពីសកម្មភាពបាញ់ប្រហាររបស់ខ្លួនលើជនរងគ្រោះផងដែរ។ វីដេអូទាំងនោះត្រូវបានគេចែកចាយពាសពេញបណ្តាញសង្គមមុននឹងត្រូវបានហ្វ៊េសប៊ុកលុបចេញអស់ប្រហែល ២០នាទីក្រោយ។ យ៉ាងណាក៏ដោយវីដេអូទាំងត្រូវបានគេទាញយកនិងចែកចាយយ៉ាងទូលំទូលាយរួចទៅហើយ។
ករណីវាយប្រហារនៅលើវិហារ Al Noor និង Linwood នេះក្លាយជាសោកនាដកម្មយ៉ាងធំធេងមួយសម្រាប់ប្រជាជននូវែលសេឡង់ ហើយនាយករដ្ឋមន្ត្រី Jacinda Ardern បានហៅករណីនេះថាជាចលនាភេរវកម្មមួយដែលបង្កើតឡើងក្នុងគោលដៅប្រឆាំងប្រជាជនម៉ូស្លីមក្នុងលោកខាងលិចនាសម័យកាលថ្មីផង។
-រដ្ឋាភិបាលនូវែលសេឡង់សន្យាប្តូរច្បាប់គ្រប់គ្រងអាវុធ
ជុំវិញអត្តសញ្ញាណជនបង្កនេះ លោកស្រី Ardern ដែលមានវត្តមាននៅទីក្រុង Christchurch នៅព្រឹកថ្ងៃសៅរ៍ បានបញ្ជាក់ប្រាប់អ្នកកាសែតថា Brenton Tarrant មិនស្ថិតក្នុងបញ្ជីឃ្លាំមើល ឬមានប្រវត្តិធ្លាប់ប្រព្រឹត្តបទឧក្រិដ្ឋពីមុនឡើយ។
បើតាមនាយករដ្ឋមន្ត្រី ជននេះបានទទួលសិទ្ធិកាន់អាវុធស្របច្បាប់កាលពីខែវិច្ឆិកាឆ្នាំ ២០១៧ ហើយជននេះបន្តទិញអាវុធជាបន្តបន្ទាប់។ លោកស្រីសន្យាថា នឹងផ្លាស់ប្តូរច្បាប់គ្រប់គ្រងអាវុធឆ្លើយតបនឹងករណីនេះ។
«ខណៈដែលកិច្ចការខ្លះកំពុងត្រូវបានអនុវត្តពាក់ព័ន្ធរឿងរ៉ាវមួយចំនួនដែលនាំឲ្យមានការកាន់កាប់លិខិតអនុញ្ញាតឲ្យប្រើប្រាស់អាវុធ និងការកាន់កាប់អាវុធច្រើនសន្ធឹករបស់ជនបង្កនេះ អ្វីដែលខ្ញុំអាចនិយាយបាននៅពេលនេះគឺច្បាប់គ្រប់គ្រងអាវុធយើងនឹងត្រូវផ្លាស់ប្តូរ»។ AFP ដកស្រង់សម្តីលោកស្រី Ardern ដូច្នេះ។
តាមពិតទៅ ក្នុងពេលធ្វើសកម្មភាពសម្លាប់រង្គាលមនុស្សនេះ អាវុធពាក់កណ្តាលស្វ័យប្រវត្តិពីរដើម កាំភ្លើងខ្លីពីរដើម និងកាំភ្លើងវែងត្រូវបានប្រើប្រាស់ដោយជនល្មើស។ ចំណែកគ្រឿងផ្ទុះពីរផ្សេងទៀតត្រូវបានប៉ូលិសរកឃើញ និងត្រូវបានកម្ទេចចោលដោយកងកម្លាំងជំនាញផងដែរក្នុងប្រតិបត្តិការថ្ងៃសុក្រ៕