អន្តរជាតិ
មន្ត្រីការទូតថៃដែលដឹកនាំការចរចាទាមទារប្រាសាទព្រះវិហារ ទទួលមរណភាព លោក Virachai Plasai (រូបភាព Khaosad English)
× មន្ត្រីការទូតជើងចាស់របស់ថៃ Virachai Plasai ដែលដើរតួនាទីសំខាន់ក្នុងសំណុំរឿងទាមទារប្រាសាទព្រះវិហារ បានទទួលបានមរណភាពនៅអាមេរិក។ នេះបើតាមការប្រកាសរបស់ក្រសួងការបរទេសថៃនៅថ្ងៃទី១៦ ខែមីនា។ លោក Plasai មានមហារីកខួរឆ្អឹងម្យ៉ាង។
លោក Virachai Plasai ចូលសម្រាកព្យាបាលក្នុងមន្ទីរពេទ្យ Johns Hopkins ក្នុងរដ្ឋ Maryland សហរដ្ឋាអាមេរិកតាំងពីថ្ងៃទី៣ ខែមីនាមក ដោយលោកមានជំងឺកម្រម្យ៉ាង។ មកទល់ថ្ងៃទី១៦ ខែមីនា អ្នកនាំពាក្យក្រសួងការបរទេសថៃ Busadee Santipitaks ក៏ប្រកាសថា លោក Plasai បានបាត់បង់ជីវិតហើយក្នុងវ័យ៥៨ឆ្នាំ។
មន្ត្រីការទូតជើងចាស់រូបនេះ ជាអគ្គរាជទូតថៃប្រចាំរដ្ឋធានីវ៉ាស៊ីនតោនតាំងពីខែមិថុនា ឆ្នាំ២០១៨ ។ មុនត្រូវបានតែងតាំងជាអគ្គរាជទូតថៃនៅអាមេរិក លោក Plasai ធ្លាប់កាន់តំណែងតំណាងថៃនៅអង្គការសហប្រជាជាតិនៅឆ្នាំ២០១៥ ។ ពីឆ្នាំ២០០៩ ដល់ឆ្នាំ២០១៥ លោកជាអគ្គរាជទូតថៃប្រចាំហូឡង់ ដែលពេលនោះហើយក្លាយជាមន្ត្រីសំខាន់ក្នុងប្រតិភូរបស់ថៃដើម្បីតតាំងក្ដីប្រាសាទព្រះវិហារជាមួយកម្ពុជា។
លោក Plasai ជាប្រធានក្រុមផ្នែកច្បាប់របស់ថៃក្នុងសំណុំរឿងដែលក្លាយជាចំណុចប្រទាំងប្រទើសរវាងអ្នកជិតខាងពីរ ពិសេសក្រុមជាតិនិយម។ ទោះចាញ់ក្ដីកម្ពុជាមែនពិត មន្ត្រីថៃរូបនេះពេញចិត្តនឹងការសម្រេចរបស់តុលាការយុត្តិធម៌អន្តរជាតិ (ICJ) ។ បើតាមកាសែតបាងកកប៉ុស្តិ៍ លោក Plasai ចាត់ទុកសាលក្រមដែលរក្សាកម្មសិទ្ធិលើប្រាសាទព្រះវិហារឲ្យកម្ពុជាដដែល ជាសាលក្រមមានតុល្យភាព ដ្បិតតុលាការប្រាប់ភាគីទាំងពីរដោះស្រាយបញ្ហាព្រំដែនទ្វេភាគី៕
Tag:
ថៃ
ប្រាសាទព្រះវិហារ
Virachai Plasai
© រក្សាសិទ្ធិដោយ thmeythmey.com