អន្តរជាតិ
មហាធៀ ដាស់តឿនយុវជនម៉ាឡេស៊ីឲ្យរៀន«ចេះខ្មាសអៀនដូចជប៉ុន» បើចង់ជោគជ័យ
×![]()
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ស្នើឲ្យយុវជនរៀនសូត្រតាមគុណតម្លៃដ៏ខ្ពង់ខ្ពស់របស់ជនជាតិជប៉ុន ប្រសិនបើពួកគេចង់ទទួលជោគជ័យក្នុងជីវិត។ មេដឹកនាំវ័យចំណាស់ជាងគេលើពិភពលោករូបនេះ និយាយថា ជាគោលការណ៍ ប្រជាជនជប៉ុន ជឿជាក់ថា ពួកគេនឹងរងភាពអាម៉ាស់ ប្រសិនបើពួកគេបរាជ័យក្នុងការអនុវត្តភារកិច្ចណាមួយនោះ។
ប្រជាជនជប៉ុនកសាងប្រទេសឡើងវិញយ៉ាងរហ័ស ក្រោយខ្ទេចខ្ទាំព្រោះសង្គ្រាមលើកលើកទីពីរ។ បច្ចុប្បន្ននេះ ជប៉ុនក្លាយខ្លួនជាមហាអំណាចសេដ្ឋកិច្ចពិភពលោក ដ្បិតប្រជាជនជប៉ុនចេះអាម៉ាស់ពេលបរាជ័យ។ ។ លោក មហាធៀ និយាយបែបនេះពេលផ្តល់សុន្ទរកថាបើកកម្មវិធីមួយទាក់ទងនឹងយុវជនឈ្មោះថា “Search for the Federal Territories Youth Icon” នៅថ្ងៃទី១៦ ខែមីនា នាទីក្រុង Putrajaya ។
យោងតាមទីភ្នាក់ងារព័ត៌មានម៉ាឡេស៊ី Bernama លោកនាយករដ្ឋមន្ត្រីវ័យ៩៣ឆ្នាំរូបនេះ បានគូសបញ្ជាក់ថា ៖ «យើងត្រូវការឧទាហរណ៍, និមិត្តរូប ឬបុគ្គលដែលលាតត្រដាងពីភាពជោគជ័យ ដូចជាករណីនៅជប៉ុនជាដើម ដែលក្លាយជាមហាអំណាចសេដ្ឋកិច្ចលំដាប់ទីពីរក្នុងពិភពលោក និងនៅពីក្រោយមហាអំណាចអាមេរិក ដែលបានបំបាក់ធ្មុងខ្លួនក្នុងសង្គ្រាមលោកលើកទីពីរ»។
លោក មហាធៀ បកស្រាយទៀតថា ដោយសារកត្តានេះហើយ រដ្ឋាភិបាលលោកចាប់ផ្តើមអនុវត្តគោលនយោបាយ «សម្លឹងទៅទិសខាងកើត» ជាថ្មីម្តងទៀត ក្នុងគោលបំណងធានាឲ្យបានថា គុណតម្លៃដ៏ខ្ពង់ខ្ពស់ដែលសង្គមម៉ាឡេស៊ីប្រកាន់ខ្ជាប់ អាចត្រូវបានរៀនសូត្រ និងអនុវត្តក្នុងប្រទេស។ គោលនយោបាយ «សម្លឹងទៅទិសខាងកើត» ត្រូវបានដាក់ចេញ នៅពេលលោក មហាធៀ ដឹកនាំរដ្ឋាភិបាលចន្លោះពីឆ្នាំ ១៩៨១ ដល់ឆ្នាំ ២០០៣។
យុវជន ដែលប្រកាន់ខ្ជាប់នូវគុណតម្លៃដ៏ខ្ពង់ខ្ពស់របស់ជនជាតិជប៉ុន រួមមាន ខ្មាសអៀននឹងការបរាជ័យ និងសកម្មក្នុងការប្រកបការងារជាដើម នឹងក្លាយជាអ្នកបន្តវេនអភិវឌ្ឍប្រទេសជាតិឆ្ពោះទៅមុខ និងអាចជួយឲ្យម៉ាឡេស៊ីក្លាយជាប្រទេសអភិវឌ្ឍមួយលើពិភពលោក ត្រឹមឆ្នាំ២០២៥ ដូចគោលដៅរបស់រដ្ឋាភិបាល។ នេះបើតាមការបញ្ជាក់លោក មហាធៀ ដែលគេទទួលស្គាល់ថាជា «បិតានៃម៉ាឡេស៊ីសម័យទំនើប» ៕
Tag:
ម៉ាឡេស៊ី
មហាធៀ
© រក្សាសិទ្ធិដោយ thmeythmey.com
