Messi បំបែកកំណត់ត្រា Xavi ក្នុងនាមអ្នកជួយ Barca ឈ្នះច្រើនជាងគេ

កីឡាអន្តរជាតិ

អន្តរជាតិ

Messi បំបែកកំណត់ត្រា Xavi ក្នុងនាមអ្នកជួយ Barca ឈ្នះច្រើនជាងគេ

18, Mar 2019 , 2:53 pm

រូបភាព

ដោយ: ទេព ពិទូរ្យ

ខ្សែប្រយុទ្ធឆ្មើម Lionel Messi បានបំបែកកណត់ត្រារបស់អតីមិត្តរួមក្រុម Xavi Hernandez ដើម្បីក្លាយជាកីឡាករដែលជួយឲ្យ Barcelona ទទួលបានជ័យជម្នះច្រើនជាងគេបំផុតក្នុងប្រវត្តិសាស្ត្រក្លិប។

Messi រិតតែបង្កើនទម្រង់លេងដ៏គួរឲ្យភ្ញាក់ផ្អើលជាមួយនឹងការធ្វើបាន Hat-Trick ជាញឹកញាប់ក្នុងរយៈពេលចុងក្រោយនេះ។ ក្នុងជំនួបក្របខណ្ឌ La Liga នៅយប់ថ្ងៃទី១៧ ខែមីនា រូបគេបានបន្តស៊ុតបាល់បញ្ចូលទី៣គ្រាប់ម្នាក់ឯងទៀតក្នុងការប្រកួតដែល Barcelona យកឈ្នះ Real Betis ៤-១ ដើម្បីជួយក្រុមរក្សាកំពូលតារាងនិងនាំមុខគូប្រជែង១០ពិន្ទុ។

Messi និង Xavi កាលនៅរួមក្រុម Barca ជាមួយគ្នា

ក្នុងការបង្ហាញខ្លួនលើកទី ៦៧៤ប្រកួតសម្រាប់ក្រុមរហស្សនាមអ្នកមានបុណ្យនេះ បានធ្វើឲ្យខ្សែប្រយុទ្ធសញ្ជាតិអាហ្សង់ទីនវ័យ៣១ឆ្នាំខាងលើ តាមស្មើការបង្ហាញខ្លួនរបស់ Andres Iniesta និងជាការឈ្នះលើកទី៤៧៧ក្នុងប្រវត្តិសាស្ត្រក្លិបផង។

ជ័យជម្នះលើក្រុម Real Betis នៅឯកីឡដ្ឋាន Benito Villamarin មានន័យថា Messi បានបំបែកកំណត់ត្រាក្នុងនាមកីឡាករជួយក្រុមឈ្នះច្រើនជាងគេពីអតីតមិត្តរួមក្រុម Xavi ដែលបានជួយ Barca រកជ័យជម្នះ៤៧៦ដង។ Xavi វ័យ៣៩ឆ្នាំ ជាកីឡាករតែម្នាក់គត់ដែលបានបង្ហាញខ្លួនឲ្យក្លិបមានមូលដ្ឋានក្នុងតំបន់កាតាឡូនានេះច្រើនជាងគេរហូត៨៦៩ប្រកួត។

4⃣7⃣7⃣ A new club record for the number of wins in a Barça shirt!
And he does it by scoring a hat-trick!
Messi, you BEAUTY! pic.twitter.com/pGgBCDCSev
— FC Barcelona (@FCBarcelona) March 17, 2019

Messi ដែលជាម្ចាស់ពាន Ballon d'Or ៥សម័យ បានជួយ Barca ឆ្លងចូលទៅកាន់វគ្គ ១/៤ ផ្តាច់ព្រ័ត្រពានរង្វន់ UEFA Champions League សម្រាប់រដូវកាល ២០១៨-១៩ នេះ ក្រោយស៊ុត២គ្រាប់ក្នុងជ័យជម្នះលើ Lyon ៥-១ នាជំនួបជើងទី២ វគ្គ១៦ក្រុម។

Barca នឹងត្រូវធ្វើដំណើរទៅទឹកដី Old Trafford ដើម្បីតទល់ជាមួយក្រុមបិសាចក្រហម Manchester United សម្រាប់ជំនួបជើងទី១ វគ្គ៨ក្រុមចុងក្រោយនៅថ្ងៃទី១១ ខែមេសា ឆ្នាំ២០១៩៕