អន្តរជាតិ
ហ្វីលីពីនចេញ តែម៉ាឡេស៊ីចូលជាសមាជិកតុលាការព្រហ្មទណ្ឌអន្តរជាតិផ្លូវការ
×![]()
ដោយ: តន ចាន់រិទ្ធារ៉ា
ថ្ងៃដែលហ្វីលីពីនចាកចេញពីតុលាការព្រហ្មទណ្ឌអន្តរជាតិ គឺជាថ្ងៃដែលម៉ាឡេស៊ីក្លាយជាសមាជិកតុលាការនេះផ្លូវការ។ ហ្វីលីពីន ប្រកាសដកខ្លួនតាំងពីខែមីនា ឆ្នាំ២០១៨ បន្ទាប់ពីតុលាការមួយនេះផ្ដើមការស៊ើបអង្កេតបឋមលើករណីសម្លាប់មនុស្សក្នុងយុទ្ធនាការបោសសម្អាតគ្រឿងញៀន។ ខុសពីហ្វីលីពីន ម៉ាឡេស៊ីចូលរួមជាមួយតុលាការអន្តរជាតិមួយនេះដើម្បីប្រយុទ្ធប្រឆាំងឧក្រិដ្ឋកម្មប្រឆាំងមនុស្សជាតិ និងសន្តិភាពពិភពលោក។
នៅថ្ងៃទី១៧ ខែមីនា ម៉ាឡេស៊ី បានក្លាយជាសមាជិកទី១២៣ របស់តុលាការព្រហ្មទណ្ឌអន្តរជាតិ (ICC) ខណៈថ្ងៃដដែលនោះ ហ្វីលីពីនឯណោះបានដកខ្លួនជាផ្លូវការ។ វត្តមានរបស់ម៉ាឡេស៊ី នឹងធ្វើឲ្យសមាជិកអាស៊ាននៅស្ថាប័នយុត្តិធម៌ពិភពលោកមួយនេះមានចំនួនពីរដដែល គឺម៉ាឡេស៊ី និងកម្ពុជា។ ចំណែកឯការដកខ្លួនរបស់ហ្វីលីពីន ធ្វើឡើងបន្ទាប់ពីរដ្ឋាភិបាលក្រុងម៉ានីលបានជូនដំណឹងពីការដើរចេញតាំងពីខែមីនា ឆ្នាំ២០១៨ មក។
ការក្លាយជាសមាជិកពេញសិទ្ធិរបស់ម៉ាឡេស៊ី កើតឡើងក្រោយរដ្ឋាភិបាលម៉ាឡេស៊ី នៅថ្ងៃ៤ មីនាកន្លងទៅ បានសម្រេចតម្កល់លិខិតូបករណ៍ផ្តល់សច្ចាប័ននៅអគ្គលេខាធិការដ្ឋានរបស់អង្គការសហប្រជាជាតិជាផ្លូវការដើម្បីក្លាយជាភាគីរបស់លក្ខន្តិកៈក្រុងរ៉ូមស្តីពីតុលាការព្រហ្មទណ្ឌអន្តរជាតិ។ ក្រសួងការបរទេសម៉ាឡេស៊ីលើកឡើងថា ការចូលរួមជាមួយ ICC បង្ហាញពីការប្ដេជ្ញាចិត្តរបស់ម៉ាឡេស៊ីក្នុងការប្រយុទ្ធឧក្រិដ្ឋកម្ម។
ជាមួយគ្នានេះ ម៉ាឡេស៊ី ក៏ត្រៀមខ្លួនជាស្រេចដើម្បីធ្វើការជាមួយរដ្ឋភាគីផ្សេងទៀតក្នុងការគោរពគោលការណ៍ការពិត សិទ្ធិមនុស្ស នីតិរដ្ឋ យុត្តិធម៌ និងគណនេយ្យភាព។ ការចូលរួមរបស់ម៉ាឡេស៊ី ធ្វើឲ្យស្ថាប័នយុត្តិធម៌អចិន្ត្រៃយ៍មួយនេះសាទរយ៉ាងខ្លាំង ស្របគ្នានឹងការបាត់បង់សមាជិកថ្មីៗផងនោះ។ ប្រធាន ICC លោក Chile Eboe-Osujisaid និយាយថា វត្តមានរបស់ម៉ាឡេស៊ី បង្ហាញពីការទទួលស្គាល់តម្លៃរបស់លក្ខន្តិកៈទីក្រុងរ៉ូម និងតុលាការព្រហ្មទណ្ឌអន្តរជាតិផងដែរ។
ហ្វីលីពីនដែលដកខ្លួនចេញពីតុលាការមួយនេះ មិនពេញចិត្តនឹងការចាប់ផ្ដើមការស៊ើបអង្កេតបឋមរបស់រដ្ឋអាជ្ញាតុលាការអន្តរជាតិលើសង្គ្រាមគ្រឿងញៀនរបស់ប្រធានាធិបតី រ៉ូឌ្រីហ្គោ ឌូទើតេ ឡើយ។ មុនការប្រកាសដកខ្លួនរបស់ហ្វីលីពីន លោកស្រីរដ្ឋអាជ្ញា Fatou Bensouda អះអាងថា មានភស្តុតាងសមល្មមដើម្បីឈានទៅរកការស៊ើបអង្កេតយុទ្ធនាការបង្ក្រាបគ្រឿងញៀនដែលសម្លាប់មនុស្សរាប់ពាន់នាក់មកហើយ។
បច្ចុប្បន្ននេះ ICC មានសមាជិក ឬភាគី សរុបទាំងអស់ ១២៣ ប្រទេស ។ ក្នុងមាត្រា ៥ នៃលក្ខន្តិកៈក្រុងរ៉ូម បទល្មើសព្រហ្មទណ្ឌដែលស្ថិតក្នុងយុត្តាធិការតុលាការមានដូចជា បទល្មើសឧក្រិដ្ឋកម្មប្រល័យពូជសាសន៍ , បទល្មើសឧក្រិដ្ឋកម្មប្រឆាំងនឹងមនុស្សជាតិ, បទល្មើសឧក្រិដ្ឋកម្មសង្គ្រាម និងបទល្មើសឧក្រិដ្ឋនៃការឈ្លានពានជាដើម ។ រាល់រដ្ឋភាគីទាំងអស់ នឹងត្រូវប្រឈមមុខជាមួយនឹងតុលាការ ប្រសិនបើបានប្រព្រឹត្តបទល្មើសទាំងនោះ ។
ក្នុងចំណោមបណ្តាប្រទេសជាច្រើន ដែលកំពុងស្ថិតនៅក្នុងការវាយតម្លៃបឋម និងការស៊ើបអង្កេតរបស់តុលាការព្រហ្មទណ្ឌអន្តរជាតិពាក់ព័ន្ធនឹងបទឧក្រិដ្ឋធ្ងន់ធ្ងរនោះ។ នៅតំបន់អាស៊ានរដ្ឋអាស៊ានពីរ ក្រៅពីហ្វីលីពីន មីយ៉ាន់ម៉ាក៏ស្ថិតក្រោមការតាមដានដោយសារវិបត្តិជនភៀសខ្លួនរ៉ូហ៊ីងយ៉ា៕
Tag:
ម៉ាឡេស៊ី
ហ្វីលីពីន
ICC
© រក្សាសិទ្ធិដោយ thmeythmey.com
