ជាតិ
សេដ្ឋកិច្ច
ពន្ធដារនឹងបង្កើតប្រព័ន្ធថ្មីៗមួយ ដោយមិនបាច់ចុះធ្វើសវនកម្មក្រុមហ៊ុននោះទេ លោក គង់ វិបុល អគ្គនាយកនៃអគ្គនាយកដ្ឋានពន្ធដារ(រូបពន្ធដារ)
× ភ្នំពេញ៖ លោក គង់ វិបុល បានអះអាងថា ស្ថាប័នលោកនឹងបង្កើតប្រព័ន្ធថ្មីមួយតភ្ជាប់ទៅក្រុមហ៊ុន ដែលប្រព័ន្ធនេះអនុញ្ញាតឲ្យពន្ធដារទទួលបានទិន្នន័យដែលកត់ត្រាពីចំណូលលក់របស់ក្រុមហ៊ុន។ ដូចនេះពន្ធដារមិនបាច់ទៅធ្វើសវនកម្មដូចសព្វថ្ងៃទៀតទេ។ អគ្គនាយកនៃអគ្គនាយកដ្ឋានពន្ធដាររូបនេះបានលើកឡើងពីគម្រោងថ្មីនេះ ក្នុងសិក្ខាសាលាមួយនៅថ្ងៃទី១៩ខែមីនា។
ប្រសាសន៍លោក គង់ វិបុល ៖
«បន្តិចទៀត ខ្ញុំនឹងធ្វើប្រព័ន្ធមួយភ្ជាប់ Cash Register មកពន្ធដារទាំងអស់។ មានន័យថា កត់ត្រា Cash Registration (ទាក់ទងការកត់ត្រាការលក់ បញ្ចូលក្នុងប្រព័ន្ធកុំព្យូទ័រ) ទាំងអស់ លក់បានប៉ុន្មាន មួយថ្ងៃឃើញប៉ុណ្ណឹងហើយ តម្លាភាពទាំងអស់គ្នា លែងទៅធ្វើសវនកម្ម»។ នេះជាប្រសាសន៍លោក គង់ វិបុល ។
ប្រព័ន្ធថ្មីនេះនឹងជួយឲ្យមានតម្លាភាព ហើយចំណេញពេលដោយមិនបាច់ធ្វើសវនកម្ម។ លោក គង់ វិបុល ថ្លែងដូច្នេះថា៖«យើងខ្ញុំអត់ចង់ទៅទេ ចង់ឲ្យតម្លាភាពទាំងអស់គ្នា ទុកពេលវេលាធ្វើអ្វីផ្សេងទៀត ព្រោះសវនកម្មនេះចំណាយពេលយូរ។ ដូចនេះម្នាក់ៗត្រូវប្រឹងពង្រឹងសមត្ថភាពរបស់ខ្លួនដើម្បីទៅឌីជីថលទាំងអស់គ្នា»។
លោក គង់ វិបុល បញ្ជាក់ថា លោកចង់ធ្វើប្រព័ន្ធនេះយូរហើយ ដែលចាប់ផ្ដើមជាមួយក្រុមហ៊ុនសេវាទូរសព្ទ តែមិនអាចធ្វើទៅបាន ដោយពុំអាចពិភាក្សាបានរលូន ជាមួយក្រសួងប្រៃសណីយ និងទូរគមនាគមន៍។
បើតាមលោក គង់ វិបុល បច្ចុប្បន្នក្រុមហ៊ុននៅកម្ពុជាមានប្រមាណជាង ១០ម៉ឺនក្រុមហ៊ុន ហើយពន្ធដារមានលទ្ធភាពធ្វើសវនកម្មប្រមាណ ៣ ទៅ៤ពាន់ក្រុមហ៊ុន។ ជាមួយគ្នានេះ លោកជំរុញឲ្យក្រុមហ៊ុនជាប់ពន្ធទាំងអស់ ត្រូវប្រកាសបង់ពន្ធឲ្យបានត្រឹមត្រូវ បើមិនដូច្នោះទេនឹងក្លាយជាកម្មវត្ថុនៃការចុះធ្វើសវនកម្ម ដែលជាយន្តការធ្វើឲ្យមានតម្លាភាពទាំងអស់គ្នា៕
Tag:
គង់ វិបុល
សវនកម្ម
ពន្ធ
© រក្សាសិទ្ធិដោយ thmeythmey.com