ប្រធានាធិបតីហ្វីលីពីនសុំយោបល់ពីសិង្ហបុរីដើម្បីដោះស្រាយវិបត្តិខ្វះទឹកធ្ងន់ធ្ងរ

អន្តរជាតិ

ប្រធានាធិបតីហ្វីលីពីនសុំយោបល់ពីសិង្ហបុរីដើម្បីដោះស្រាយវិបត្តិខ្វះទឹកធ្ងន់ធ្ងរ

21, Mar 2019 , 3:31 pm

រូបភាព

ដោយ: ថ្មីៗ

កង្វះទឹកប្រើប្រាស់កំពុងក្លាយជាញ៉ាំញ៉ីជីវភាពរស់នៅរបស់ប្រជាជនហ្វីលីពីនរាប់លាននាក់ជាពិសេសអ្នករស់នៅរដ្ឋធានីម៉ានីល។ រដ្ឋាភិបាលហ្វីលីពីនកំពុងស្វែងរកដំណោះស្រាយដើម្បីឆ្លើយតបនឹងវិបត្តិដ៏ធ្ងន់ធ្ងរនេះ ហើយរដ្ឋមួយនេះកំពុងស្នើសុំយោបល់ពីរដ្ឋាភិបាលសិង្ហបុរីផងដែរក្នុងការទាញយកទឹកពីសមុទ្រ។

ក្នុងពេលជួបជាមួយឯកអគ្គរដ្ឋទូតសិង្ហបុរីថ្មីប្រចាំហ្វីលីពីន Gerard Ho ដែលចូលថ្លែងសារតាំងនៅថ្ងៃ ១៩ ខែមីនា ប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ បានលើកឡើងពីចំណាប់អារម្មណ៍របស់លោកក្នុងការស្នើសុំយោបល់ពីសិង្ហបុរីដើម្បីដោះស្រាយវិបត្តិខ្វះខាតទឹកបច្ចុប្បន្ន។

យោងតាមសារព័ត៌មានសិង្ហបុរី Straits Times ប្រធានាធិបតីហ្វីលីពីន បានប្រាប់ទៅកាន់ឯកអគ្គរដ្ឋទូតសិង្ហបុរីដូច្នេះថា៖ យើងត្រូវការយោបល់ច្រើនពីសិង្ហបុរី ហើយខ្ញុំច្បាស់ណាស់ថា យោបល់ទាំងនោះនឹងជួយយើងដោះស្រាយបញ្ហានេះបានក្នុងរយៈពេលវែងជាពិសេសបញ្ហាទឹកនេះ»។

ក្នុងជំនួបដដែលនោះលោក ឌូទើតេ បានបន្តទៀតថា លោកជឿជាក់លើសិង្ហបុរីដ្បិតប្រទេសនេះមានវិធីសាស្ត្រដែលមានប្រសិទ្ធភាពក្នុងការទាញយកទឹកសាបពីសមុទ្រដើម្បីផ្គត់ផ្គង់តម្រូវការក្នុងស្រុកកន្លងមក។ ហ្វីលីពីនក៏ស្ថិតក្នុងស្ថានភាពដូចសិង្ហបុរីដែលហ៊ុមព័ទ្ធទៅដោយសមុទ្រ។

បើតាម Straits Times សិង្ហបុរី មានម៉ាស៊ីនចម្រោះទឹកស្អាតពីសមុទ្របីគ្រឿងដែលអាចផលិតទឹកបាន ៤៩០ លានលីត្រក្នុងមួយថ្ងៃ ហើយវាអាចផ្គត់ផ្គង់បាន ៣០ភាគរយលើតម្រូវការទឹកសរុបក្នុងប្រទេសដែរ។ ប៉ុន្តែទោះជាបែបនេះក្តី ម៉ាស៊ីនទាំងនេះមានតម្លៃថ្លៃហួសស្មាន ដោយទឹកមួយម៉ែត្រគូបមានតម្លៃប្រហែល ២ដុល្លារឯណោះ។ អ្នកជំនាញជឿជាក់ថា ហ្វីលីពីនមិនទាន់មានលទ្ធភាពនឹងប្រើប្រាស់ម៉ាស៊ីនបែបនេះឡើយ។

តាមពិតទៅ ប្រជាជនហ្វីលីពីនមិនតិចជាង ៦លាននាក់ឡើយដែលរងគ្រោះដោយសារការខ្វះខាតទឹកប្រើប្រាស់នៅរដូវក្តៅ។ ស្ថាប័នជំនាញ ជាពិសេសរដ្ឋាករទឹកព្យាយាមស្វែងរកដំណោះស្រាយ ប៉ុន្តែវិធានការបណ្តោះអាសន្នគឺត្រូវកាត់ផ្តាច់ទឹករៀងរាល់ថ្ងៃយ៉ាងតិច ៦ម៉ោងដើម្បីឲ្យគ្រប់គ្នាមានទឹកប្រើប្រាស់។

ដើមសប្តាហ៍នេះ សភាហ្វីលីពីនក៏បានបើកប្រជុំដើម្បីពិភាក្សាគ្នាជាមួយរដ្ឋាភិបាលដើម្បីស្វែងរកដំណោះស្រាយសមស្របឆ្លើយតបនឹងបញ្ហាដ៏អាក្រក់នេះដែរ។ រដ្ឋាករទឹកក្រុងម៉ានីលបញ្ជាក់ច្បាស់ថា បច្ចុប្បន្ននេះ ខ្លួនស្ថិតក្នុងស្ថានភាពខ្វះខាតទឹកសម្រាប់ផ្គត់ផ្គង់តម្រូវការជារួម។

រដ្ឋាករម៉ានីលទាញទឹកបាន ១,៦ពានលានលីត្រមួយថ្ងៃពីទំនប់ Angat ដែលស្ថិតនៅខេត្ត Bulacan មិនឆ្ងាយប៉ុន្មានពីរដ្ឋធានីម៉ានីលឡើយ។ ប៉ុន្តែប៉ុន្មានឆ្នាំចុងក្រោយនេះ កំណើនតម្រូវការទឹកកើនឡើង ហើយរដ្ឋាករទឹកត្រូវផ្គត់ផ្គង់ទឹកឲ្យបាន ១,៧៥ ពាន់លានលីត្រឯណោះ ហើយរដូវក្តៅ និងកម្រិតទឹកទាប ធ្វើឲ្យស្ថាប័ននេះប្រឈមបញ្ហាកាន់តែធំ។

កន្លងមករដ្ឋាភិបាលលោក រ៉ូឌ្រីហ្គោ ឌូទើតេ រងការទិតៀនខ្លាំងជុំវិញការបន្តការពន្យារពេលសាងសង់ទំនប់ និងហេដ្ឋារចនាសម្ព័ន្ធនានាដើម្បីស្តុកទឹកសម្រាប់រដូវក្តៅដែរ។ យ៉ាងណាមិញក្នុងកាលៈទេសៈដ៏លំបាកនេះ ហ្វីលីពីនក៏ស្វះស្វែងរកជំនួយពីចិនផងដែរក្នុងការឈានទៅសាងសង់អាងស្តុកទឹកនិងទំនប់វារីអគ្គិសនី។ ក្នុងនោះហ្វីលីពីនព្យាយាមពន្លឿនការសុំខ្ចីហិរញ្ញវត្ថុដើម្បីឈានទៅសាងសង់ទំនប់វារីអគ្គិសនី Kaliwa និងសាងសង់គម្រោងធារាសាស្ត្រផ្សេងទៀតដែលអាចរួមចំណែកដោះស្រាយបញ្ហាខ្វះទឹកបាននៅពេលខាងមុខ។