កីឡាជាតិ
ជាតិ
លោក Felix ៖ការប្រកួតប៉ះក្រុមខ្លាំងៗ ជាឱកាសល្អសម្រាប់U23 កម្ពុជា បង្ហាញភាពរីកចម្រើន លោក Felix Dalmas គ្រូបង្វឹកក្រុមជម្រើសជាតិកម្ពុជាថ្លែងក្នុងសន្និសីទសារព័ត៌មានមុនការប្រកួត AFC U23
× ភ្នំពេញ៖គ្រូបង្វឹកក្រុមជម្រើសជាតិកម្ពុជាលោក Felix Dalmas បានបង្ហាញក្តីបារម្ភលើសមត្ថភាព និងគុណភាពលេងកម្រិតខ្ពស់របស់គូប្រកួត នាជំនួបវគ្គជម្រុះ AFC U23 Championship ។ ដ្បិតមានក្តីព្រួយបារម្ភក្តី ប៉ុន្តែលោក ចាត់ទុកថា វាជាឱកាសល្អមួយ សម្រាប់កីឡាករកម្ពុជាក្នុងការបង្ហាញភាពរីកចម្រើនខ្លួន។
ក្នុងជំនួបវគ្គជម្រុះ AFC U23 Championship ក្រុមជម្រើសជាតិក្រោមអាយុ២៣ឆ្នាំកម្ពុជា ស្ថិតនៅក្នុងពូល H ដែលត្រូវប៉ះគ្នាជាមួយក្រុមអូស្ត្រាលី កូរ៉េខាងត្បូង និងឆាយនីសតៃប៉ិ។ វាមានទាំងក្តីកង្វល់ផង និងភាពសប្បាយរីករាយផង សម្រាប់លោក Felix Dalmas គ្រូបង្វឹកក្រុមជម្រើសជាតិកម្ពុជា។
ក្តីកង្វល់លោក Felix នោះ គឺកម្ពុជាត្រូវប្រកួតប៉ះសុទ្ធតែក្រុមខ្លាំង និងមានគុណភាពលេងខ្ពស់ជាងកូនក្រុមខ្លួន ដែលអាចជាផលពិបាកមួយ សម្រាប់កម្ពុជាក្នុងការប្រកួតនីមួយៗ។ ប៉ុន្តែវាក៏ជាផលវិជ្ជមានសម្រាប់កម្ពុជាវិញដែរ។ សម្រាប់គ្រូបង្វឹកកម្ពុជាសញ្ជាតិអាហ្សង់ទីនរូបនេះ ការប្រកួតក្នុងវគ្គជម្រុះAFC U23 Championship នេះ វាគឺជាការប្រកួតដ៏អស្ចារ្យសម្រាប់ក្រុមកម្ពុជា ក្នុងការបង្ហាញពីភាពរីកចម្រើនរបស់ខ្លួន ដែលបានខិតខំអភិវឌ្ឍ នាពេលកន្លងមកនេះ។
លោក Graham Arnold គ្រូបង្វឹក U23 អូស្ត្រាលី
ជាមួយការប្តេជ្ញាចិត្តដឹកនាំការលេងរបស់កូនក្រុម ឲ្យអស់សមត្ថភាពដើម្បីស្វែងរកជ័យជម្នះនេះ លោក Felix បាននិយាយដូច្នេះថា៖«ទោះបីយើងត្រូវប្រឈមជាមួយក្រុមខ្លាំងៗ តែយើងរីករាយនឹងប្រកួតជាមួយក្រុមខ្លាំងទាំងនេះ។ វាជាឱកាសល្អសម្រាប់កម្ពុជា ក្នុងការបង្ហាញពីភាពរីកចម្រើន ដែលបានហ្វឹកហាត់ត្រៀមនាពេលកន្លងមក។ ខ្ញុំរីករាយ និងរំភើបក្នុងការត្រៀមសម្រាប់ការប្រកួតនៅថ្ងៃស្អែក»។
ក្រុមជម្រើសជាតិអាយុក្រោម២៣ឆ្នាំកម្ពុជា ក្រោមការដឹកនាំរួមគ្នារវាងអ្នកចាត់ការទូទៅ Keisuke Honda និងគ្រូបង្វឹក Felix ត្រូវបើកទ្វារពហុកីឡដ្ឋានជាតិស្វាគមន៍ U23 អូស្ត្រាលី នាជំនួបវគ្គជម្រុះពូល H នៃព្រឹត្តិការណ៍ AFC U23 Championship នៅម៉ោង៨យប់ថ្ងៃទី២២ ខែមីនា ឆ្នាំ២០១៩។ ការប្រកួតនេះធ្វើឡើងក្រោយជំនួបរវាង U23 កូរ៉េខាងត្បូង ជាមួយឆាយនីសតៃប៉ិ ដែលធ្វើឡើងនៅម៉ោង៥រសៀល។
លោក Hag Bum Kim គ្រូបង្វឹក U23 កូរ៉េខាងត្បូង, Canhum Von គ្រូបង្វឹក U23 ចិន, Felix Dalmas គ្រូ U23 កម្ពុជា និង Graham Arnold គ្រូ U23 អូស្ត្រាលី (រាប់ពីឆ្វេងទៅស្តា)
នាសន្និសីទសារព័ត៌មានមុនការប្រកួតនៅថ្ងៃទី២១ ខែមីនា ឆ្នាំ២០១៩ លោក Graham Arnold គ្រូបង្វឹកក្រុមជម្រើសជាតិអាយុក្រោម២៣ឆ្នាំអូស្ត្រាលីបាននិយាយថា គ្មានអ្វីជាបញ្ហាប្រឈមសម្រាប់ក្រុមលោកនោះទេ ពោលគឺត្រៀមខ្លួនបានយ៉ាងល្អសម្រាប់ការប្រកួតមួយនេះ។ ព្រោះមុនមកកាន់ទឹកដីកម្ពុជាក្រុម U23 អូស្ត្រាលី បានទៅបោះជំរុំហ្វឹកហាត់រយៈពេលមួយសប្តាហ៍នៅម៉ាឡេស៊ី ដើម្បីបន្ស៊ាំនឹងអាកាសធាតុ។
សម្រាប់ការប្រកួតវគ្គជម្រុះ AFC U23 Championship 2020 ក្នុងពូល H រៀបចំចន្លោះពីថ្ងៃទី២២-២៦ ខែមីនា ឆ្នាំ២០១៩ ដោយមានម្ចាស់ផ្ទះ U23 កម្ពុជា អូស្ត្រាលី កូរ៉េខាងត្បូង និងឆាយនីសតៃប៉ិ៕
Tag:
បាល់ទាត់
Felix Dalmas
AFC U23 Championship
© រក្សាសិទ្ធិដោយ thmeythmey.com