កីឡាអន្តរជាតិ
អន្តរជាតិ
Messi និង Ronaldo ចូលជម្រើសជាតិវិញហើយ ក្រោយអវត្តមានតាំងពី World Cup នៅរុស្ស៊ី
× កំពូលកីឡាករឆ្មើមពីររូប Lionel Messi និង Cristiano Ronaldo បានត្រលប់ចូលក្រុមជម្រើសជាតិរបស់ពួកគេរៀងខ្លួនវិញហើយក្រោយអវត្តមានតាំងពីក្រោយការប្រកួត World Cup នៅរុស្ស៊ី ឆ្នាំ២០១៨មក។
Messi អាចនឹងលេងឲ្យជម្រើសជាតិអាហ្សង់ទីនសម្រាប់ការប្រកួតមិត្តភាពអន្តរជាតិទល់នឹងវ៉េណេស៊ុយអេឡាក្នុងទីក្រុងម៉ាឌ្រីត ខណៈ Ronaldo ក៏មានឈ្មោះឲ្យព័រទុយហ្គាល់ពេលប៉ះអ៊ុយក្រែនក្នុងការប្រកួតជម្រុះ Euro ឆ្នាំ២០២០ ក្នុងក្រុង Lisbon នៅរាត្រីថ្ងៃទី២២ ខែមីនានេះ។
នេះជាការបង្ហាញខ្លួនលើកដំបូងរបស់ Messi និង Ronaldo ក្រោយអ្នកទាំងពីរបាត់មុខពីជម្រើសជាតិ៦ប្រកួតចុងក្រោយដូចគ្នាចាប់តាំងពីព្រឹត្តិការណ៍បាល់ទាត់ពិភពលោកនៅរុស្ស៊ីមក។
Messi ខ្សែបម្រើឆ្នើមក្រុម Barcelona វ័យ៣១ឆ្នាំ បានស៊ុតបញ្ចូលទី ៦៥គ្រាប់ក្នុងការបង្ហាញខ្លួន១២៨ប្រកួតឲ្យអាហ្សង់ទីន ដោយនាំមុខមិត្តរួមជាតិ Sergio Aguero របស់ Manchester City ដែលរកបាន៣៩គ្រាប់ក្នុង៨៩ប្រកួត Gonzalo Higuain របស់ Chelsea ៣១គ្រាប់ក្នុង៧៥ប្រកួត។
គ្រូបង្វឹកក្រុមជម្រើសជាតិអាហ្សង់ទីនលោក Lionel Scaloni ក៏បានបង្ហាញអារម្មណ៍រីករាយដែល Messi ត្រលប់ទៅរួមក្រុមវិញដែរ។ លោកថា៖«នេះជារឿងល្អសម្រាប់ខ្ញុំ និងសម្រាប់អ្នកគ្រប់គ្នាដែលគាត់ត្រលប់មកវិញ។ យើងទាំងអស់គ្នាពិតជារីករាយណាស់»។
ចំណែកព័រទុយហ្គាល់អាចឈានដល់វគ្គពាក់កណ្តាលផ្តាច់ព្រ័ត្រនៃពានរង្វាន់ UEFA Nations League ដោយគ្មាន Ronaldo ឡើយ។
ខ្សែប្រយុទ្ធឆ្នើម Juvenutus វ័យ៣៤ឆ្នាំដែលស៊ុតបញ្ចូលទីបាន ៨៥គ្រាប់ក្នុងការបង្ហាញខ្លួនឲ្យព័រទុយហ្គាល់ ១៥៤ប្រកួត ត្រូវបានគេជឿជាក់ថានឹងចូលលេងបាន១០០ភាគរយពេលព័រទុយហ្គាល់ ប៉ះស៊ែប៊ីក្នុងវគ្គជម្រុះ Euro ពូល B នៅថ្ងៃទី២៥ ខែមីនា។
ការត្រលប់របស់ Ronaldo ត្រូវបានខ្សែការពារ Joao Cancelo ដែលជាមិត្តរួមជាតិ និងរួមក្រុម Juventus សម្តែងការរីករាយផងដែរ។ Cancelo ថា៖« Ronaldo អាចបន្ថែមគុណភាពលេងដល់ក្រុម។ ខ្ញុំពិតជារីករាយដែលបានលេងជាមួយគាត់ ហើយគាត់គឺកីឡាករសំខាន់ណាស់សម្រាប់យើង»៕
Tag:
បាល់ទាត់
Lionel Messi
Cristiano Ronaldo
© រក្សាសិទ្ធិដោយ thmeythmey.com