អន្តរជាតិ
នយោបាយអន្តរជាតិ
លោក ប្រាយុទ្ធ ចន្ទអូចា ឈរថ្លែងលើវេទិកា។ រូបភាព Bangkok Post
×![]()
ដោយ: តន ចាន់រិទ្ធារ៉ា
បក្សនយោបាយនៅថៃ នៅថ្ងៃទី២២ ខែមីនា បានបើកយុទ្ធនាការទ្រង់ទ្រាយធំរៀងៗខ្លួនសម្រាប់ការបោះឆ្នោតនៅថ្ងៃទី២៤ ខែមីនា។ ចលនានយោបាយនៅថៃ មានពីរក្រុម គឺបក្សនយោបាយដែលគាំទ្រឲ្យលោក ប្រាយុទ្ធ ចន្ទអូចា ធ្វើជានាយករដ្ឋមន្ត្រី និងបក្សនយោបាយមាននិន្នការប្រឆាំងការដឹកនាំបែបយោធា។ និយាយឲ្យខ្លី គឺប្រឆាំងលោក ប្រាយុទ្ធ តែម្ដង។ បក្សទាំងអស់សុទ្ធតែរំពឹងថា នឹងទទួលជ័យជម្នះដូចគ្នា។
ថ្ងៃទី២២ ខែមីនា ជាថ្ងៃចុងក្រោយនៃយុទ្ធនាការឃោសនារកសំឡេងឆ្នោតនៅថៃ។ បក្សធំៗចំនួនបួនមានបក្សភឿថៃ, ប្រជាធិបតេយ្យ, អនាគតឈានមុខ និងកម្លាំងប្រជារាស្ត្រ បានប្រមូលផ្ដុំអ្នកគាំទ្ររបស់ខ្លួនជាច្រើន។ បក្សភឿថៃដែលស្និទ្ធអតីតនាយករដ្ឋមន្ត្រីត្រកូល ស៊ីណាវ៉ាត់ និងបក្សប្រជាធិបតេយ្យ ជាបក្សនយោបាយមានបទពិសោធចំណាស់ រំពឹងទទួលបានអាសនៈច្រើនក្នុងការបោះឆ្នោតថ្ងៃទី២៤ ខែមីនា ខណៈបក្សអនាគតឈានមុខ ជាបក្សបង្កើតថ្មីដោយអ្នកនយោបាយវ័យក្មេង។
អ្វីគួរឲ្យចាប់អារម្មណ៍ គឺបក្សកម្លាំងប្រជារាស្ត្រ (Phalang Pracharat) ដែលគាំទ្ររបបយោធា។ បក្សនេះបានស្នើលោក ប្រាយុទ្ធ ចន្ទអូចា ជាបេក្ខជននាយករដ្ឋមន្ត្រីរបស់ខ្លួន។ នៅថ្ងៃឃោសនាចុងក្រោយ លោក ប្រាយុទ្ធ ក៏បានចេញមុខឡើងឆាកដើម្បីទាក់ទាញប្រជាប្រិយភាពរបស់ខ្លួនដែរ។ វាជាលើកដំបូងដែលលោក ប្រាយុទ្ធ បង្ហាញមុខលើវេទិកាបក្សនយោបាយបែបនេះ ខណៈលោកកំពុងកាន់តំណែងនាយករដ្ឋមន្ត្រីស្រាប់។
ចំពោះមុខអ្នកគាំទ្រជាច្រើន លោក ប្រាយុទ្ធ មេដឹកនាំរដ្ឋប្រហារឆ្នាំ២០១៤ បានសន្យារក្សាសន្តិភាព និងសណ្ដាប់ធ្នាប់ក្នុងប្រទេស ដឹកនាំថៃឲ្យដើរទៅមុខ និងលើកកម្ពស់ជីវភាពរស់នៅរបស់ប្រជាជនថៃគ្រប់រូប។ បើតាមកាសែតបាងកកប៉ុស្តិ៍ មេដឹកនាំរដ្ឋាភិបាលយោធារូបនេះថែមទាំងហ៊ានប្រកាសថា បើប្រជាជនថៃមិនចង់ឃើញបញ្ហាទាំងនោះ គួរបោះឆ្នោតឲ្យបក្សរបស់លោក ដោយសន្យាតបស្នងវិញ ហើយសុខចិត្តស្លាប់ដើម្បីប្រទេសទៀតផង។
សូមបញ្ជាក់ថា ប្រជាជនថៃលើស ៥១ លាននាក់ឯណោះ ដែលមានសិទ្ធិចូលរួមក្នុងការបោះឆ្នោតសាកលថ្ងៃ ២៤ ខែមីនាខាងមុខនេះ។ វាជាការបោះឆ្នោតប្រជាធិបតេយ្យលើកដំបូងបំផុតរាប់ចាប់ពីពេលដែលក្រុមយោធាដឹកនាំដោយលោក ប្រាយុទ្ធ ដណ្តើមអំណាចកាលពីខែឧសភាឆ្នាំ ២០១៤ និងមានការពន្យារពេលបោះឆ្នោតជាច្រើនលើកមកនោះ។
គូប្រជែងសំខាន់របស់លោក ប្រាយុទ្ធ មានលោកស្រី Khunying Sudarat Keyuraphan ជាបេក្ខជននាយករដ្ឋមន្ត្រីបក្សភឿថៃ លោក Abhisit Vejjajiva ជាបេក្ខជនរបស់បក្សប្រជាធិបតេយ្យ និងលោក Thanathorn Juangroongruangkit ជាបេក្ខជនរបស់បក្សអនាគតឈានមុខ។ បក្សទាំងបីសុទ្ធតែមិនច់ឃើញក្រុមយោធាបន្តដឹកនាំប្រទេសក្រោយបោះឆ្នោតឡើយ ប៉ុន្តែគេមិនទាន់ដឹងថា បក្សទាំងបីនឹងបង្កើតសម្ព័ន្ធភាពដើម្បីកាន់កាប់សំឡេងភាគច្រើនក្នុងសភាឬយ៉ាងណាឡើយ៕
Tag:
ថៃ
ប្រាយុទ្ធ ចន្ទអូចា
បោះឆ្នោត
© រក្សាសិទ្ធិដោយ thmeythmey.com
