ជាតិ
លោក ហ៊ុន ម៉ានី លើកទឹកចិត្តឲ្យមន្ត្រីរាជការសម្រួចជំនាញដើម្បីជួយប្រទេសជាតិនៅថ្ងៃអនាគត
× លោក ហ៊ុន ម៉ានី បានជួបជាមួយសមាជិកសហភាពសហព័ន្ធយុវជនកម្ពុជាដែលជាមន្ត្រីរាជការតាមក្រសួងនានាជាង២០០០នាក់ នាព្រឹកថ្ងៃទី២៣ខែមីនានេះ នៅទីស្នាក់ការកណ្តាលសហភាពសហព័ន្ធយុវជនកម្ពុជារាជធានីភ្នំពេញ។ ប្រធានសហភាពសហព័ន្ធយុវជនកម្ពុជា អរគុណចំពោះការចូលរួមរបស់មន្ត្រីរាជការ ក្នុងសហភាពសហព័ន្ធយុវជនកម្ពុជា ប៉ុន្តែលោកជំរុញឲ្យសមាជិក ស.ស.យ.ក ដែលមានតួនាទីក្នុងស្ថាប័នរដ្ឋ ត្រូវបំពេញភារកិច្ចខ្លួននៅក្នុងអង្គភាពរដ្ឋឲ្យបានគត់មត់។
សមាជិកសមាជិកា នៃសហភាពសហព័ន្ធយុវជនកម្ពុជា (ស.ស.យ.ក) នៅតាមក្រសួងមន្ទីរ ត្រូវបំពេញភារកិច្ចរបស់ខ្លួននៅក្នុងអង្គភាពរបស់រដ្ឋនោះ ឲ្យបានមធ្យ័ត។ នេះជាសារដែលបញ្ជាក់ដោយ លោក ហ៊ុន ម៉ានី ទៅកាន់សមាជិកសមាជិការបស់ខ្លួន។
ជាលើកទីមួយដែលប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានជួបសំណេះសំណាលជាមួយសមាជិករបស់ខ្លួន ដែលមានតួនាទីនៅតាមបណ្តាក្រសួង និងអង្គភាពរបស់រដ្ឋ។ វាក៏ជាឱកាសដែលប្រធានចលនាយុវជនដ៏ធំជាងគេបានរំឭក និងបញ្ជាក់យ៉ាងច្បាស់ប្រាប់សមាជិកទាំងនោះថា ក្បាលម៉ាស៊ីនរបស់ ស.ស.យ.ក បានលើកទឹកចិត្តឲ្យសមាជិករបស់ពួកគេ នៅតាមក្រសួងមន្ទីរ ឱ្យបំពេញភារកិច្ច និងបង្កើនចំណេះជំនាញរបស់ខ្លួនថែមទៀតផង។ បើតាមប្រសាសន៍របស់លោក ហ៊ុន ម៉ានី ថ្នាក់ដឹកនាំកំពូលរបស់ ស.ស.យ.ក បានយល់យ៉ាងច្បាស់ ថាពួកគេមិនត្រូវដាក់សម្ពាធការងារនានា ដែលនាំឲ្យរំខានដល់ការបំពេញការងាររដ្ឋរបស់សមាជិក ស.ស.យ.ក នៅតាមក្រសួងមន្ទីរនានានោះឡើយ។
លោក ហ៊ុន ម៉ានី បានបញ្ជាក់យ៉ាងដូច្នេះថា៖«ខ្ញុំសូមលើកទឹកចិត្តឱ្យបន្តបំពេញភារកិច្ចជាចម្បង ធ្វើយ៉ាងណាកុំឱ្យប្រាសចាកពីការងារប្រចាំថ្ងៃរបស់ខ្លួនដែលប្រធានស្ថាប័នដាក់ឱ្យ។ ហើយអ្វីដែលជាការចាំបាច់ និងជាកត្តាដាច់ខាត គឺការសម្រួចជំនាញរបស់ខ្លួនថែមទៀត»។
ចំពោះប្រធានសហភាពសហព័ន្ធយុវជនកម្ពជា ការបំពេញការងាររដ្ឋឲ្យបានត្រឹមត្រូវ និងពេញលេញនោះហើយ ដែលជាការចូលរួមចំណែកក្នុងការអភិវឌ្ឍសេដ្ឋកិច្ចរបស់ប្រទេស។ វានៅសល់តែការពង្រឹង និងសម្រួចជំនាញរបស់ពួកគេថែមទៀតតែប៉ុណ្ណោះ សម្រាប់ការឆ្លើយតបនឹងបញ្ហានានានៅថ្ងៃអនាគតដែលកម្ពុជាអាចជួបប្រទះ។
នៅក្រោយពិធីសំណេះសំណាលជាមួយសមាជិក ស.ស.យ.ក លោក ហ៊ុន ម៉ានី បានឆ្លើយបញ្ជាក់បន្ថែមប្រាប់សារព័ត៌មានថ្មីៗយ៉ាងដូច្នេះ៖«ផលិតភាព និងផលិតផលពេលនេះមានហើយ តែយើងត្រូវត្រៀមខ្លួនសម្រាប់១០ឆ្នាំ ទៅ២០ឆ្នាំទៀត ដើម្បីប្រទេសជាតិ ប្រជាជនផង និងខ្លួនឯងផង។ ចំពោះបរិយាកាសនៃទំនាក់ទំនងអន្តរជាតិ, ការប្រកួតប្រជែងពាណិជ្ជកម្ម តើយើងត្រូវត្រៀមខ្លួនយ៉ាងណា?»។
ដោយសារតែជាការជួបជុំជាមួយសមាជិកសមាជិការដែលមកវិស័យ និងជំនាញផ្សេងៗ ប្រធានសហភាពសហព័ន្ធយុវជនកម្ពុជាបានលើកឡើងនូវពិសោធន៍នានា នៅតាមវិស័យនានាដែលកម្ពុជាបានជួបប្រទះក្នុងអតីតកាល និងអាចប្រឈមនៅថ្ងៃអនាគត ប្រាប់សមាជិក ដែលទាមទារឱ្យធនធានជំនាញនៅតាមក្រសួង ត្រូវរួមគ្នាដោះស្រាយ។ ការដោះស្រាយបញ្ហាប្រឈមនានា រាប់តាំងពីវិស័យសន្តិសុខជាតិ ទំនាក់ទំនងការបរទេស និងបញ្ហាសេដ្ឋកិច្ចនៅថ្ងៃអនាគត បើតាមការអះអាងរបស់លោក ហ៊ុន ម៉ានី គេត្រូវត្រៀមខ្លួនចាប់ពីពេលថ្ងៃនេះទៅ៕
Tag:
សសយក
ហ៊ុន ម៉ានី
មន្ត្រី
រាជការ
© រក្សាសិទ្ធិដោយ thmeythmey.com