ជាតិ
ដើមឆ្នាំ២០១៩ រដ្ឋាភិបាលចំណាយជិត១០០លានដុល្លារ សម្រាប់ផ្ដល់សំណងលើផលប៉ះពាល់នៃគម្រោងសាងសង
× ភ្នំពេញ៖ គិតត្រឹមរយៈពេល៣ខែ នៅដើមឆ្នាំ២០១៩នេះ រដ្ឋាភិបាល បានចំណាយថវិកាជិត១០០លានដុល្លារហើយ សម្រាប់ផ្តល់សំណងលើផលប៉ះពាល់ នៃគម្រោងសាងសង់នានា នៅក្នុងប្រទេសកម្ពុជា។
ថ្លែងក្នងពិធីបើកការដ្ឋានផ្លូវល្បឿនលឿនភ្នំពេញ-ព្រះសីហនុ កាលពីថ្ងៃទី២២ មីនា សម្ដេច ហ៊ុន សែន បាននិយាយថា ថវិកាទាំងនោះ គឺយកទៅផ្តល់សំណងថ្លៃអភិវឌ្ឍ ដែលប៉ះចំទ្រព្យសម្បត្តិរបស់ប្រជាពលរដ្ឋ នៅតាមគម្រោងទាំងនោះ។ ត្រង់ចំណុចនេះ សម្ដេច ហ៊ុន សែន បានពន្យល់ថា បើគម្រោងមួយ អភិវឌ្ឍអស់១០០លានដុល្លារនោះ ដូច្នេះរាជរដ្ឋាភិបាលត្រូវចេញថវិកា ចំនួន៣០លានដុល្លារអាមេរិក ដើម្បីធ្វើបដិភាគជាមួយក្រុមហ៊ុន ក្នុងការចេញថ្លៃសំណងដែលប៉ះពាល់ដល់ប្រជាពលរដ្ឋ។
« គ្រាន់ដើមឆ្នាំនេះ មិនទាន់គ្រប់បីខែផង ខ្ញុំហត្ថលេខាចេញថវិកាប្រមាណជិត ១០០លានដុល្លារអាមេរិក យកទៅធ្វើថវិកាបដិភាគផ្លូវមួយខ្សែ។ កន្លែងខ្លះ៣លាន កន្លែងខ្លះ៥លាន កន្លែងខ្លះ៦លាន ជីកប្រឡាយទឹកឱ្យគាត់ហើយត្រូវទិញដីគាត់ថែមទៀត ត្រូវចេញលុយជិត១០០លានដុល្លារ អ៊ីចឹងបានជាខ្ញុំនិយាយថា ដើម្បីអភិវឌ្ឍគម្រោងមួយបានចាំបាច់ត្រូវតែមានទុនក្នុងដៃធ្វើថវិកាបដិភាគ»។ នេះជាការបញ្ជាក់របស់សម្ដេច ហ៊ុន សែន។
និយាយបែបនេះហើយ ប្រមុខរដ្ឋាភិបាលរូបនេះ មិនភ្លេចលើកពីគុណសម្បត្តិខ្លួន ក្នុងការដឹកនាំប្រទេសឡើយ។ សម្ដេច ហ៊ុន សែន សង្កត់ធ្ងន់ថា ការអភិវឌ្ឍប្រទេសបច្ចុប្បន្ននេះ បានមកដោយសារការខិតខំរបស់រដ្ឋាភិបាល ក្នុងការរៀបចំសណ្ដាប់ធ្នាប់ និងគិតគូពីប្រយោជន៍ជាតិ៕
Tag:
ហ៊ុន សែន
សេដ្ឋកិច្ច
© រក្សាសិទ្ធិដោយ thmeythmey.com