ជាតិ
បទយកការណ៍ / បទសម្ភាសន៍
លោក ខាណាតាក សុំឲ្យពលរដ្ឋប្រើប្រាស់សមិទ្ធផលពីគម្រោងជប៉ុន ដោយក្ដីស្រលាញ់
× ភ្នំពេញ៖ ស្ថានទូតជប៉ុនប្រចាំកម្ពុជា និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នឹងរៀបចំកម្មវិធីទស្សនកិច្ចអ្នកសារព័ត៌មានស្ដីពីហិរញ្ញប្បទានអភិវឌ្ឍផ្លូវការឆ្នាំ២០១៩ ដែលប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ខែមីនា។ ក្រុមអ្នកសារព័ត៌មាន នឹងត្រូវនាំទៅកាន់ខេត្តកំពង់ឆ្នាំង ពោធិ៍សាត់ បាត់ដំបង សៀមរាប ព្រះសីហនុ និងខេត្តកំពត ដើម្បីទស្សនាគម្រោងពាក់ព័ន្ធនឹងទឹកស្អាត សុខាភិបាល ផ្លូវថ្នល់ ស្ពាន និងកំពង់ផែជាដើម។ តាមរយៈកម្មវិធីនេះ ជប៉ុនចង់ឲ្យអ្នកសារព័ត៌មាន ជួយផ្សព្វផ្សាយបន្តដល់ប្រជាពលរដ្ឋ ដើម្បីឲ្យពួកគាត់បានយល់ បានស្គាល់ពីគម្រោងនានាដែលជប៉ុនកំពុងអនុវត្តនៅកម្ពុជា ក្រោមហិរញ្ញប្បទានអភិវឌ្ឍផ្លូវការ ដែលហៅកាត់ជាភាសាអង់គ្លេសថា ODA ។
សូមស្ដាប់កិច្ចសម្ភាសរវាង លោក ញ៉ុង ហេង នៃសាព័ត៌មានថ្មីៗ និងលោក តូម៉ូហ៊ីរ៉ុ ខាណាតាក លេខាទី១ស្ថានទូតជប៉ុនប្រចាំកម្ពុជា និងជាប្រធានផ្នែកសេដ្ឋកិច្ច និងហិរញ្ញប្បទានអភិវឌ្ឍផ្លូវការរបស់ស្ថានទូតជប៉ុន ដែលមានប្រែសម្រួលជាភាសាខ្មែរ ដូចតទៅនេះ៖
ហិរញ្ញប្បទានអភិវឌ្ឍផ្លូវការ (ODA) របស់រដ្ឋាភិបាលជប៉ុនត្រូវបែងចែកជា៣ប្រភេទ គឺកម្ចីសម្បទាន ជំនួយឥតសំណង និងហិរញ្ញប្បទានកិច្ចសហការបច្ចេកទេស។ គិតពីឆ្នាំ១៩៩១ ដល់បច្ចប្បន្ន ជប៉ុនបានបញ្ចេញកម្ចីសម្បទានចំនួន ១២៧៥លានដុល្លារ ជំនួយឥតសំណង ១៨៣៦លានដុល្លារ និងហិរញ្ញប្បទានកិច្ចសហការបច្ចេកទេសមានចំនួន ៧៨៤លានដុល្លារដល់កម្ពុជា។ ហិរញ្ញប្បទានទាំងនេះ ត្រូវបានប្រើប្រាស់សម្រាប់អភិវឌ្ឍន៍សំខាន់ៗដូចជា ហេដ្ឋរចនាសម្ព័ន្ធផ្លូវថ្នល់ស្ពាន ផ្នែកសុខាភិបាល អប់រំ និងទឹកស្អាតជាដើម។
លោក ខាណាតាក លើកឡើងថា គម្រោងទាំងនោះពិតជាផ្ដល់ប្រយោជន៍ក្នុងជីវភាពរស់នៅរបស់ប្រជាពលរដ្ឋកម្ពុជា និងសេដ្ឋកិច្ចជាតិ។ ជាមួយគ្នានេះ លោកបានស្នើឲ្យពលរដ្ឋចូលរួមថែរក្សា និងប្រើប្រាស់សមិទ្ធផលកើតចេញពីគម្រោងទាំងនោះមិនថាផ្លូវថ្នល់ សាលារៀន ឬមន្ទីរពេទ្យ ប្រកបដោយក្ដីស្រឡាញ់ ដើម្បីឲ្យស្ថិតនៅយូរអង្វែង៕
Tag:
ODA
តូម៉ូហ៊ីរ៉ុ ខាណាតាក
© រក្សាសិទ្ធិដោយ thmeythmey.com