ជាតិ
រដ្ឋាភិបាល ចំណាយថវិកា១៥លានដុល្លារ ទិញរថពាសដែកបញ្ជូនទៅម៉ាលី ជំនួសUN ដែលជួបវិបត្តិហិរញ្ញវត្ថុ
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋាភិបាល បានចំណាយថវិកាអស់១៥លានដុល្លារ ដើម្បីទិញរថពាសដែកសម្រាប់យកទៅប្រើប្រាស់ក្នុងយុទ្ធនាការនានា នៅប្រទេសម៉ាលី ជំនួសអង្គការសហប្រជាជាតិ ដែលកំពុងខ្វះខាតថវិកាជំនួយសប្បុរសធម៌។
ក្នុងពិធីចែកសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ សម្ដេចនាយករដ្ឋមន្ត្រី ហ៊ុន សែន បាននិយាយថា កម្ពុជាចំណាយថវិកាទាំងនេះ គឺចង់បង្ហាញពីតួនាទីយ៉ាងសំខាន់មួយ ក្នុងនាមជាអ្នកចូលរួមថែរក្សាការពារសន្តិសុខពិភពលោក ជាមួយអង្គការសហប្រជាជាតិអស់រយៈពេលជាង១០ឆ្នាំមកនេះ។
សូមស្ដាប់ប្រសាសន៍ប្រមុខរដ្ឋាភិបាល៖
«បញ្ហានេះ ខ្ញុំក៏ចង់បញ្ជាក់ដែរ។ ឯកឧត្តម ប៉ុល សារឿន ប្រហែលជាបានដឹងហើយ ។ អាទិត្យមុននេះ (រដ្ឋាភិបាល) បានបញ្ចេញប្រាក់១៥លានដុល្លារអាមេរិក ព្រោះអង្គការសហប្រជាជាតិ តម្រូវឲ្យបំពាក់មធ្យោបាយដូចជារថពាសដែកទៅប្រទេសម៉ាលី ។ ពីមុនកម្ពុជាស្នើឲ្យអង្គការសហប្រជាជាតិជាអ្នកដោះស្រាយបញ្ហានេះ ប៉ុន្តែឥឡូវអង្គការសហប្រជាជាតិកំពុងជួបវិបត្តិថវិកា អ៊ីចឹងបន្ទុកនេះ យើងមិនដកកងទ័ពចេញដោយខ្វះការទទួលខុសត្រូវទេ ហើយយើងក៏មិនទុកឲ្យកងទ័ពយើងដៃទទេរដែរ គឺត្រូវមានរថពាសដែកការពារខ្លួន»។ នេះជាការបញ្ជាក់របស់សម្ដេច ហ៊ុន សែន។
ក្រៅពីតួនាទីជាអ្នកប្រតិបត្តិការការពារសន្តិភាពរបស់អង្គការសហប្រជាជាតិ រដ្ឋាភិបាលក៏កំពុងបញ្ជ្រាបមន្ត្រីយោធាកម្ពុជាចូលទៅក្នុងក្របខណ្ឌធំៗនៅក្នុងស្ថាប័នអន្តរជាតិផងដែរ។ បើតាមសម្ដេច ហ៊ុន សែន រដ្ឋាភិបាលកំពុងជំរុញយោធាឲ្យចូលទៅក្នុងក្របខណ្ឌថ្នាក់ដឹកនាំ ឬសេនាធិការរបស់អង្គការសហប្រជាជាតិជាដើម។
រយៈពេល១៣ឆ្នាំមក កម្ពុជាបានបញ្ជូនកងទ័ពមួកខៀវ ទៅក្រៅប្រទេស ដើម្បីចូលរួមកិច្ចសហប្រតិបត្តិការថែរក្សាសន្តិភាពរបស់អង្គការសហប្រជាជាតិ មានចំនួន ៥,៧៨៣ នាក់ហើយ ។កងកម្លាំងទាំង ៥៧៨៣ នាក់(ស្ត្រីចំនួន ២៧៧ នាក់) ដែលទៅបំពេញការងារនៅក្នុងប្រទេសចំនួន ៨ រួមមាន ស៊ូដង់ ស៊ូដង់ខាងត្បូង ឆាដ អាហ្វ្រិកកណ្តាល លីបង់ ស៊ីប ស៊ីរី និងម៉ាលី។ ហើយបច្ចុប្បន្នកងកម្លាំងកម្ពុជា កំពុងបំពេញបេសកកម្មមានចំនួន ៧៩៩ នាក់ (ស្ត្រីចំនួន៦២ នាក់) នៅប្រទេសស៊ូដង់ ស៊ូដង់ខាងត្បូង លីបង់ ម៉ាលី និងអាហ្វ្រិកកណ្តាល។ នេះបើតាមរបាយការណ៍របស់ក្រសួងការបរទេស និងសហប្រតិបត្តិការអន្តរជាតិ ប្រចាំឆ្នាំ២០១៨។
នៅក្នុងប្រតិបត្តិការរក្សាសន្តិភាពនៅក្រៅប្រទេសនេះ កងទ័ពមួកខៀវកម្ពុជា ក៏ធ្លាប់ជួបប្រទះបញ្ហាវាយប្រហារពីក្រុមពួកឧទ្ទាមនៅក្នុងតំបន់នៃប្រទេសនីមួយៗដែរ។ កាលពីខែឧសភា ឆ្នាំ២០១៧កន្លងមក កងទ័ពមួកខៀវកម្ពុជា ចំនួន៤នាក់បានស្លាប់ ដោយសារត្រូវក្រុមពួកឧទ្ទាម Anti-Balaka បានពួនស្ទាក់វាយប្រហារទៅលើក្បួនកងកម្លាំងរក្សាសន្តិសុខនៃអង្គការសហប្រជាជាតិ នៅប្រទេសអាហ្វ្រិកកណ្តាល។
ដ្បិតធ្លាប់មានសោកនាដកម្ម មកលើកងទ័ពកម្ពុជាបែបនេះក្តី ប៉ុន្តែវាមិនបានធ្វើឲ្យកម្ពុជាចុះញ៉មនឹងបញ្ហានេះទេ។ ប្រមុខរដ្ឋាភិបាលកម្ពុជា នៅតែប្រកាសជំហរបញ្ជូនកងទ័ចូលរួមប្រយុទ្ធប្រឆាំងបញ្ហាប្រឈមនានាក្នុងពិភពលោក ក្រោមកិច្ចសហប្រតិបត្តិការថែរក្សាសន្តិភាពរបស់អង្គការសហប្រជាជាតិ ដែលកម្ពុជាបានចាប់ផ្ដើមអនុវត្តតាំងពីឆ្នាំ ២០០៦មកនេះ៕
Tag:
ហ៊ុន សែន
UN
© រក្សាសិទ្ធិដោយ thmeythmey.com
