អន្តរជាតិ
វៀតណាម ខឹងសម្បារចិន និងតៃវ៉ាន់ជុំវិញការបំពានដែនសមុទ្រចិនខាងត្បូង
× រដ្ឋាភិបាលក្រុងហាណូយ បានប្រតិកម្មខ្លាំងទៅនឹងរដ្ឋាភិបាលក្រុងតៃប៉ិ ដែលបានធ្វើសមយុទ្ធយោធានៅក្នុងដែនសមុទ្រចិនខាងត្បូង ដែលស្ថិតក្បែរតំបន់ក្រុងហាណូយគ្រប់គ្រង។ ជាមួយគ្នានោះ ក្រុងហាណូយ ឆ្លៀតឱកាសទាមទារឲ្យក្រុងប៉េកាំងផ្តល់សំណងចំពោះការបំផ្លាញទូកនេសាទរបស់វៀតណាម ដែលបង្កដោយក្រុមល្បាតរបស់ចិនផងដែរ។
តាមរយៈសន្និសីទសារព័ត៌មានប្រចាំថ្ងៃនៅថ្ងៃ២១ មីនា អ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng បានប្រកាសជំទាស់ដាច់ខាតចំពោះសកម្មភាពរបស់តៃវ៉ាន់ ដែលធ្វើសមយុទ្ធយោធាបាញ់គ្រាប់ពិតនៅជុំកោះអ៊ីទូអាប៉ា (Itu Aba) ដែលស្ថិតនៅក្នុងប្រជុំកោះស្ព្រាតលី នៃសមុទ្រចិនខាងត្បូង ដែលជាតំបន់វៀតណាម អះអាងថាខ្លួនមានអធិបតេយ្យគ្រប់គ្រង។
តាមការចុះផ្សាយរបស់ភ្នាក់ងារព័ត៌មានវៀតណាម Vietnam News លោកស្រីអ្នកនាំពាក្យ ក៏បានទាមទារឲ្យឲ្យតៃវ៉ាន់ ចៀសវាងការប្រព្រឹត្តសកម្មភាពបែបនេះជាថ្មីទៀត ដ្បិតសកម្មភាពនេះ វៀតណាម ចាត់ទុកថាជាការបំពានបូរណភាពទឹកដីរបស់វៀតណាមយ៉ាងធ្ងន់ធ្ងរ ហើយវា ក៏បង្កើតជាការគំរាមកំហែងសន្តិភាព ស្ថិរភាព និងសន្តិសុខ ក៏ដូចជាបង្កើតឲ្យមានភាពតានតឹង និងស្មុគស្មាញដល់តំបន់។
ក្នុងវេទិកាតែមួយនោះ អ្នកនាំពាក្យ ក៏បានឆ្លៀតឱកាសក្រើនរម្លឹកចិន ដែលតែងតែអះអាងថាជារដ្ឋាភិបាលតែមួយគត់របស់តៃវ៉ាន់ផងនោះ ពាក់ព័ន្ធឧប្បទ្ទវហេតុ នៅដើមខែមីនាកន្លងទៅ ដែលបង្កឡើងដោយក្រុមនាវាល្បាតចិនដែលបានបាញ់ទឹកទៅលើទូកនេសាទពលរដ្ឋវៀតណាមដោយធ្វើឲ្យទូនោះលិចតែម្តង ។ តាមអ្នកនាំពាក្យ ឧប្បទ្ទវហេតុនោះ ក៏បានកើតឡើងនៅតំបន់នៃប្រជុំកោះស្ព្រាត់លីនៃសមុទ្រចិនខាងត្បូងដូចគ្នាផងដែរ។
ខណៈអះអាងពីការធ្វើកំណត់ហេតុការទូតបណ្តឹងប្រឆាំងសកម្មភាពរបស់ចិន រដ្ឋាភិបាលវៀតណាម តាមរយៈអ្នកនាំពាក្យដដែលនោះ បានទទូចឲ្យរដ្ឋាភិបាលចិនផ្តល់សំណងឲ្យបានសមស្របទៅលើជនរងគ្រោះ និងការបំផ្លាញដោយក្រុមល្បាតខ្លួនចំពោះហេតុការណ៍នេះ។
សូមជម្រាបផងដែរថា បើនិយាយក្នុងក្របខណ្ឌទូលាយ សមុទ្រចិនខាងត្បូង គឺជាដែនអធិបតេយ្យមានវិវាទមួយ ដែលមានភាគីពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន វៀតណាម តៃវ៉ាន់ និងចិន។ ភាគីទាំងនេះ សុទ្ធសឹងតែបានគ្រប់គ្រងលើផ្នែកមួយចំនួននៃប្រជុំកោះស្ព្រាត់លី និងប៉ារ៉ាសែល ដែលជាប្រជុំកោះដ៏ធំរបស់សមុទ្រចិនខាងត្បូង ខណៈផ្នែកខ្លះទៀតនៃសមុទ្រនេះ ភាគីពាក់ព័ន្ធទាំងនេះ បានទាមទារសិទ្ធិគ្រប់គ្រងត្រួតស៊ីគ្នា។ ហេតុនេះហើយ ធ្វើឲ្យសមុទ្រនេះ ក្លាយជាដែនអធិបតេយ្យជម្លោះ៕
Tag:
វៀតណាម
ចិន
តៃវ៉ាន់
© រក្សាសិទ្ធិដោយ thmeythmey.com