ឥណ្ឌូណេស៊ី, ម៉ាឡេស៊ី ក្តៅស្លឹកត្រចៀក ដោយសារសហភាពអឺរ៉ុប ដាក់រនាំងពាណិជ្ជកម្មលើផលិតផលដូងប្រេង

អន្តរជាតិ

ឥណ្ឌូណេស៊ី, ម៉ាឡេស៊ី ក្តៅស្លឹកត្រចៀក ដោយសារសហភាពអឺរ៉ុប ដាក់រនាំងពាណិជ្ជកម្មលើផលិតផលដូងប្រេង

26, Mar 2019 , 8:39 am

រូបភាព

រូបភាព៖ Malay Mail

ដោយ:

ផែនការនៃការរឹតត្បិត និងដាក់លក្ខខណ្ឌលើការនាំចូលផលិតផលដូងប្រេងពីឥណ្ឌូណេស៊ី និងម៉ាឡេស៊ីរបស់សហភាពអឺរ៉ុប ទំនងជាមិនមានការដើរថយក្រោយវិញឡើយ ដែលទំនោរនេះ កំពុងតែធ្វើឲ្យរដ្ឋាភិបាលនៃប្រទេសនាំចេញដូងប្រេងធំបំផុតរបស់ពិភពលោកទាំងពីរនេះកើតទុកមិនសុខឡើយ។ នៅមិនសុខនោះក៏ព្រោះតែ ផលិតផលនេះនឹងត្រូវស្ទះ ខណៈអ្នកដាំដូងប្រេងត្រូវខាតបង់ និងប៉ះពាល់ដល់សេដ្ឋកិច្ចផងដែរ។

រដ្ឋាភិបាលក្រុងហ្សាការតា និងរដ្ឋាភិបាលក្រុងកូឡាឡាំពួរ ថ្មីៗនេះ បានព្រមានជាបន្តបន្ទាប់លើផែនការរឹតត្បិតលើការនាំចូលផលិតផលដូងប្រេងដែលដាក់ដោយសហភាពអឺរ៉ុបទៅកាន់អង្គការពាណិជ្ជកម្មពិភពលោក (WTO)។ រដ្ឋាភិបាលទាំងពីរ ក៏បានត្រៀមភស្តុតាងដើម្បីបង្ហាញពីការស្តង់ដារ និងអាជ្ញាបណ្ណអន្តរជាតិ នៃការដាំដុះ និងផលិតផលិតផលនេះ ដែលសហភាពអឺរ៉ុបចោទថាបានបំផ្លាញបរិស្ថាន។

តាមការចុះផ្សាយរបស់សារព័ត៌មាន Jakarta Post នៅថ្ងៃ២៣ មីនា រដ្ឋាភិបាលឥណ្ឌូណេស៊ី បន្តរិះគន់ខ្លាំងទៅលើសហភាពអឺរ៉ុប បន្ទាប់ពី ក្រុងហ្សាការតា បានដឹងបន្ថែមថា ផែនការរឹតត្បិតរបស់សហភាពអឺរ៉ុបផ្អែកលើទិន្ន័យដែលជាការស្រាវជ្រាវចន្លោះឆ្នាំ២០០៨-២០១៥ ដែលពេលនោះ ស្ថានភាពនៃការកាប់ព្រៃឈើដើម្បីដាំដូងប្រេងមានកម្រិតខ្ពស់មែន ក៏ប៉ុន្តែមិនឆ្លុះបញ្ចាំងស្ថានភាពបច្ចុប្បន្នឡើយ។

តាមប្រភពព័ត៌មានដដែលនោះ មន្ត្រីជាន់ខ្ពស់នៃក្រសួងបរិស្ថាន និងជលផលឥណ្ឌូណេស៊ី Ruandha Agung Sugardiman បានហៅផែនការរបស់សហភាពអឺរ៉ុបគឺជាចំណាត់ការដ៏ប្រថុយប្រថានបំផុត ដោយមន្ត្រីជាន់ខ្ពស់រូបនេះ លើកជាសំណួរខ្លីមួយ «តើសហភាពអឺរ៉ុបអាចប្រើប្រាស់របាយការណ៍នោះដោយរបៀបណា បើស្ថានភាពបរិស្ថានរបស់ឥណ្ឌូណេស៊ីនិងម៉ាឡេស៊ីចាប់ផ្តើមល្អប្រសើរវិញតាំងពីឆ្នាំ២០១៦-២០១៨វិញហើយនោះ?»

ជុំវិញបញ្ហាដដែលនោះ ម៉ាឡេស៊ី ដែលជាប្រទេសនាំចេញផលិតផលដូងប្រេងលំដាប់ទីពីររបស់ពិភពលោកបន្ទាប់ពីឥណ្ឌូណេស៊ីនោះ ក៏បានចេញថ្លែងការណ៍ប្រតិកម្មខ្លាំងដូចគ្នា ដោយម៉ាឡេស៊ី គំរាមលើកយកបញ្ហានេះដើម្បីតទល់ជាមួយនឹងសហភាពអឺរ៉ុប តាមរយៈអង្គការពាណិជ្ជកម្មពិភពលោក។ សម្រាប់រដ្ឋាភិបាលម៉ាឡេស៊ី ផែនការរបស់សហភាពអឺរ៉ុប មានលាយលំជាមួយនឹងនយោបាយ និងជារនាំពាណិជ្ជកម្មដ៏ឃោរឃៅមួយទៅលើម៉ាឡេស៊ី។

ហេតុអ្វីសហភាពអឺរ៉ុប ដាក់រនាំង ឬចង់បិទនាំចូលផលិតផលដូងប្រេង?

សហភាពអឺរ៉ុប នៅឆ្នាំមុនបានពិនិត្យឡើងវិញ និងបានឯកភាពគ្នាក្នុងការអនុម័តលើបទបញ្ជាថ្មីពាក់ព័ន្ធនឹងការប្រើប្រាស់ថាមពលកើតឡើងវិញ និងថាមពលស្អាតស្អំ ពោលគឺថាមពលដែលមិនប៉ះពាល់ដល់បរិស្ថាន។ តាមរយៈបទបញ្ជាថ្មីនេះ រដ្ឋសហភាពអឺរ៉ុប តម្រូវឲ្យកាត់បន្ថយការនាំចូលផលិតផលដែលកើតចេញពីការបំផ្លាញបរិស្ថាន ជាពិសេសនោះការកាប់បំផ្លាញព្រៃឈើតែម្តង។

ដើម្បីធានាពីប្រសិទ្ធភាព និងប្រសិទ្ធផលនៃការបទបញ្ជាថ្មីនេះ សហភាពអឺរ៉ុប បានសម្រេចចាប់ផ្តើមរឹតត្បិតលើមុខទំនិញពាក់ព័ន្ធទាំងនេះចាប់ពីឆ្នាំ ២០១៩នេះតទៅ និងកាត់បន្ថយបរិមាណជាបន្តបន្ទាប់នៅឆ្នាំ២០២៣ និងឈានទៅដល់ការបិទការនាំចូលតែម្តងនៅក្នុងឆ្នាំ២០៣០។ ផលិតផលដូងប្រេង ដែលកន្លងមកត្រូវបានអឺរ៉ុបនាំចូល និងប្រើប្រាស់ជាប្រេងឥន្ធនៈ គឺជាគោលដៅចម្បងមួយដែលត្រូវហាមឃាត់។

សម្រាប់សហភាពអឺរ៉ុប ដែលជាបណ្តុំប្រទេសជឿនលឿនរបស់ពិភពលោក ចំណាត់ការនេះ ក៏ជាជំហាននាំមួយគេមួយក្នុងបណ្តាតំបន់របស់ពិភពលោកពាក់ព័ន្ធវិធានការកាត់បន្ថយការឡើងកំដៅពិភពលោក ដោយសារតែការបំផ្លាញបរិស្ថាន និងការកាប់បំផ្លាញព្រៃឈើ។ ក៏ប៉ុន្តែចំណាត់ការនេះ ស្របជាមួយគ្នា ក៏បានសម្លាប់ប្រទេសកំពុងអភិវឌ្ឍដែលអាស្រ័យលើផលិតផលដូងប្រេង។

ហេតុអ្វីបងធំអាស៊ានឥណ្ឌូណេស៊ី និងម៉ាឡេស៊ីប្រតិកម្មខ្លាំង?

វិធានការរបស់សហភាពអឺរ៉ុប ពិតប្រាកដណាស់ថា កំពុងតែសម្លាប់ដល់ប្រទេសដែលនាំចេញផលិតផលដូងប្រេងរបស់ពិភលោកដែលមានទាំងនៅក្នុងប្រទេសក្រីក្របំផុតរបស់ពិពភលោកអាហ្វ្រិកផង។ ប៉ុន្តែអ្នករងផលប៉ះពាល់បំផុតនោះគឺ ឥណ្ឌូណេស៊ី និងម៉ាឡេស៊ី ដែលជានាំចេញធំបំផុនៃផលិតនេះ ដែលស្មើនឹង៨៥ភាគរយ នៃផលិតសរុបរបស់ពិភពលោក។

ទាំងម៉ាឡេស៊ី និងឥណ្ឌូណេស៊ី ធ្លាប់បានអះអាងថារួចមកហើយថា វិធានការនេះ នឹងសម្លាប់ដល់ប្រជាជនរបស់ប្រទេសទាំងពីរ ដ្បិត៤០ភាគរយនៃអ្នកនាំដូងប្រេង ឬទទួលផលពីដូងប្រេង គឺជាប្រជាជនធម្មតា ហើយអត្រាកាត់បន្ថយភាពក្រីក្ររបស់ពួកគេ ក៏ជាចំណែកមួយពីចំណូលនៃផលិតផលនេះផងដែរ៕