ONE Championship
កីឡាជាតិ
ជាតិ
កីឡាការិនីគុនចម្រុះឆ្នើមកម្ពុជា៣រូបបង្ហាញអារម្មណ៍មិនអាចបំភ្លេចបាននៅ One Championship (ពីឆ្វេងទៅស្តាំ) សំ ថារ័ត្ន, នៅ ស្រីពៅ និង វី ស្រីខួច
×
ដោយ៖ ស៊ីធី
នៅកម្ពុជា នារីហាត់ក្បាច់គុនមិនសូវសម្បូរដូចបុរសនោះទេ។ ប៉ុន្តែកីឡាការិនីហាត់ក្បាច់គុន ៣ រូបដូចជា សំ ថារ័ត្ន នៅ ស្រីពៅ និង វី ស្រីខួច សុទ្ធតែបង្ហាញពីមោទកភាពផ្ទាល់ខ្លួនក្រោយបានទៅប្រកួតលើឆាកអន្តរជាតិ។ ជាមួយគ្នានោះ ពួកគេទាំង៣បានបង្ហាញចំណាប់អារម្មណ៍ប្លែកៗ ដែលមិនអាចបំភ្លេចបាននៅសង្វៀន One Championship នាពេលកន្លងមក។
កីឡាការិនី សំ ថារ័ត្ន ដែលហាត់ក្បាច់គុនគ្រឹះល្បុក្កតោនោះបានបង្ហើបថា៖« រឿងចម្លែកក្នុងចិត្តរបស់ខ្ញុំ...ខ្ញុំនឹកស្មានមិនដល់ថាអាចឈានទៅរកការវ៉ៃជាលក្ខណៈអន្តរជាតិបែបនេះឡើយពីមុននៅ One Championship ដែលរៀបចំនៅស្រុកខ្មែរនាឆ្នាំ ២០១៤។ ក្នុងនោះខ្ញុំក៏រន្ធត់ និង តក់ស្លុតខ្លួនឯងខ្លាំងដែរ ពេលគាប វី ស្រីឆាយ ឲ្យធ្លាក់ស្មា ព្រោះខ្លាចគេបាត់បង់អាជីព និង មានវិប្បដិសារី។» លើសពីនេះទៅទៀត កីឡាការិនីគុនល្បុក្កតោ មិនអាចបំភ្លេចបានមួយទៀតពេលប្រកួតគុនចម្រុះជាមួយកីឡាករការិនីឥណ្ឌា Jeet Tosihi កាលឆ្នាំ ២០១៥ ដែលពេលនោះ គេដកដង្ហើមសឹងមិនដល់គ្នា ប៉ុន្តែមានអ្នកគាំទ្រជាច្រើនបានស្រែកឲ្យរូបគេ «ស៊ូៗ,..ថារ័ត្នប្រឹងឡើង»។ នេះជាមូលហេតុដែលធ្វើឲ្យ ថារ័ត្ន អាចតស៊ូរហូតដល់បញ្ចប់ទឹកទោះមានការវ៉ៃសន្ធាប់ពីសំណាក់ Tosihi ក៏ដោយ។ ទាំងនេះសុទ្ធតែជារឿងដែល កីឡាការិនីគុនល្បុក្កតោរូបនេះ ចងចាំមិនអាចភ្លេចឡើយ។
បើឯកមកកីឡាការិនី វី ស្រីខួច ដែលមានអាយុ ២៥ ឆ្នាំឯណោះវិញ មានរឿងរ៉ាវគួរឲ្យចងចាំថា One Championship ជាព្រឹត្តិការណ៍ធំអស្ចារ្យណាស់ ហើយ មានមោទនភាពសម្រាប់ខ្លួនឯងដោយបានឈានជើងចូលរួមលើកឆាកអន្តរជាតិបែបនេះ។ ទន្ទឹមគ្នានោះ វី ស្រីខួច ថាមិនអាចភ្លេចងាយៗទេចំពោះបរាជ័យទល់នឹង កីឡាការិនីម្ចាស់ផ្ទះ សិង្ហបុរី May Ooi កាលឆ្នាំ ២០១៧។ ស្រីខួច សង្កត់ធ្ងន់យ៉ាងដូច្នេះ ៖«ខ្ញុំចាញ់ May Ooi ដោយសារភ្លេចខ្លួនមួយភ្លែតឲ្យចូលក្បាច់ក្លេរ របស់គេត្រឹមទឹកទី១។ ក្បាច់ក្លេរជាបញ្ហាធំរបស់ខ្ញុំព្រោះយើងមិនទាន់សុំាខ្លាំងដោយកន្លងមក ខ្ញុំហ្វឹកហាត់តែប្រដាល់ប៉ុណ្ណោះ។ នេះជាការចងចាំរឿងជូរចត់ក្នុងការប្រកួតនេះ។»
បើនិយាយអំពី កីឡាការិនី នៅ ស្រីពៅ ដែលមានវ័យ ២៤ ឆ្នាំកំពុងធ្វើឲ្យអ្នកគាំទ្រប្រដាល់នៅកម្ពុជាជក់ភ្នែកក្នុងការតាមដានជាពិសេសការចេញទៅប្រកួតលើឆាកអន្តរជាតិតំណាងឲ្យកម្ពុជា។ កំណត់ត្រាក្នុងជីវិតគួរឲ្យចងចាំបំផុតថ្មីៗនេះ គឺពេលឈ្នះកីឡាការិនីម្ចាស់ផ្ទះថៃ Rika Ishige កាលខែមុននៅសង្វៀន One Championship ដែលជារឿងលើសពីការស្មានទុក។ កីឡាការិនីរហស្សនាម "TinyDoll” មានបទពិសោធន៍លើសង្វៀននេះរហូតដល់ ៨ ដង ខណៈដែល ស្រីពៅ ទើបឡើងវ៉ៃលើកដំបូង។ ស្រីពៅ សង្កត់ធ្ងន់បែបនេះ៖ «ខ្ញុំរំភើបខ្លាំងមែនទែន វ៉ៃក្នុងដីគេ ហើយអាចឈ្នះក្នុងការប្រកួតទី១ របស់ខ្ញុំនៅថៃ។ នេះជាសកម្មភាពអស្ចារ្យរបស់ខ្ញុំ បំភ្លេចមិនបាន។»
គួររំលឹកថា សំ ថារ័ត្ន ធ្លាប់វ៉ៃក្នុងព្រឹត្តិការណ៍គុនចម្រុះចំនួន ៦ លើកដែលក្នុងនោះ ឈ្នះ ៤ លើក និង ចាញ់ ចំនួន ២ លើក។ រីឯ វី ស្រីខួច វិញ វ៉ៃក្នុងព្រឹត្តិការណ៍គុនចម្រុះបានចំនួន ៤ ដងដោយឈ្នះ ២ដង និង ចាញ់ ២ ដង។ ហើយ នៅ ស្រីពៅ ចេញទៅប្រកួតជាលក្ខណៈអន្តរជាតិផ្លូវការចំនួន ៣ ដងដោយឈ្នះទាំងបីដងពោល ឈ្នះនៅ មីយ៉ាន់ម៉ា ២ ដង និង ឈ្នះនៅប្រទេសថៃចំនួន ១ ដង៕
Tag:
One Championship
សំ ថារ័ត្ន
នៅ ស្រីពៅ
វី ស្រីខួច
© រក្សាសិទ្ធិដោយ thmeythmey.com