អន្តរជាតិ
បក្សសេដ្ឋីវ័យក្មេងថៃ ដាក់លក្ខខណ្ឌបីធំៗ មុនចាប់ដៃបង្កើតសម្ព័ន្ធភាពនយោបាយ ប្រធានគណបក្សអនាគតឈានមុខ លោក Thanathorn Juangroongruangkit (រូបថត៖ The Nation ថៃ)
× គណបក្សអនាគតឈានមុខ (Future Forward) របស់អ្នកនយោបាយជំនាន់ក្រោយថៃ លោក Thanathorn Juangroongruangkit បានដាក់លក្ខខណ្ឌចំនួនបីធំៗ មុនរួមដៃជាមួយបក្សផ្សេងទៀត ដើម្បីបង្កើតសម្ព័ន្ធភាពនយោបាយ។ ប៉ុន្តែអ្វីដែលគួរឲ្យចាប់អារម្មណ៍នោះ ក្នុងចំណោមលក្ខខណ្ឌទាំងបីគ្មានការស្នើសុំឲ្យមេដឹកនាំខ្លួនធ្វើជានាយករដ្ឋមន្ត្រី ឬចរចាសុំកៅអីរដ្ឋមន្ត្រីណាមួយនោះឡើយ។
គណបក្សអនាគតឈានមុខ ដែលទទួលកៅអីយ៉ាងហោចណាស់៨០ ពីសំឡេងឆ្នោតប្រមាណ ៥,៨លានសន្លឹកនោះ ឈរជាបក្សធំបំផុតលំដាប់ទីបី បន្ទាប់ពីបក្សភឿថៃ និងបក្សកម្លាំងប្រជារាស្ត្រគាំទ្ររបបយោធា។ នេះបើតាមលទ្ធផលបោះឆ្នោតបឋម ដែលចុះផ្សាយនាថ្ងៃចន្ទទី២៥ ខែមីនា។
ប្រធានគណបក្សអនាគតឈានមុខ លោក Thanathorn បានសារភាពថា បក្សភឿថៃដែលស្និទ្ធនឹងត្រកូលស៊ីណាវ៉ាត់ បានចូលមកចរចាជាមួយបក្សលោក ដើម្បីរួមគ្នាបង្កើតសម្ព័ន្ធភាពនយោបាយ។ យោងតាមការចុះផ្សាយរបស់សារព័ត៌មាន Bangkok Post លក្ខខណ្ឌទាំងបីរបស់បក្សនេះ គឺផ្អែកលើសន្យាដែលលើកឡើងអំឡុងពេលឃោសនារកសំឡេងឆ្នោត។
ថ្លែងនៅសន្និសីទព័ត៌មានមួយកាលពីរសៀលថ្ងៃចន្ទ អគ្គលេខាធិការបក្សអនាគតឈានមុខ លោក Piyabutr Saengkanokkul គូសបញ្ជាក់ថា លក្ខខណ្ឌទីមួយរបស់បក្សលោកសម្រាប់ចូលរួមសម្ព័ន្ធភាពនោះ គឺចង់ឲ្យមានការធ្វើវិសោធនកម្មលើរដ្ឋធម្មនុញឆ្នាំ២០១៧ ដែលបង្កើតឡើងដោយរបបយោធា និងដាក់បន្ថែមកថាខណ្ឌថ្មីមួយ ដែលបើកទ្វារសម្រាប់បង្កើតឡើងនូវ ក្រុមប្រឹក្សាមួយដែលប្រសូត្រឡើងដោយការបោះឆ្នោត និងមានតួនាទីបង្កើតសេចក្តីព្រាងរដ្ឋធម្មនុញ។ ដូចគ្នានឹងរដ្ឋធម្មនុញឆ្នាំ១៩៩៧ មុននឹងសេចក្តីព្រាងរដ្ឋធម្មនុញថ្មី អាចចូលជាធរមានបាននោះ គេត្រូវធ្វើប្រជាមតិជាមុនសិន។
បើតាមលោក Piyabutr ដដែល សម្រាប់លក្ខខណ្ឌទីពីរវិញ គណបក្សលោក ចង់ឲ្យមានការធ្វើវិសោធនកម្មលើវាក្យខណ្ឌ ២៧៩ នៃរដ្ឋធម្មនុញឆ្នាំ២០១៧ ដែលផ្តល់សិទ្ធិស្របច្បាប់ដល់រាល់បទបញ្ជានិងសេចក្តីប្រកាសរបស់ប្រធាន និងបណ្តាមន្ត្រីរបស់ក្រុមប្រឹក្សាជាតិដើម្បីសន្តិភាព និង សណ្តាប់ធ្នាប់ (NCPO) ព្រមទាំងផ្តល់អភ័យឯកសិទ្ធិសម្រាប់ពួកគេផងដែរ។ សម្រាប់លក្ខខណ្ឌចុងក្រោយ បក្សអនាគតឈានមុខ ចង់ជំរុញធ្វើកំណែទម្រង់ប្រព័ន្ធដឹកនាំយោធា ឲ្យស្របជាមួយលទ្ធិប្រជាធិបតេយ្យ ក្នុងគោលដៅទប់ស្កាត់រដ្ឋប្រហារនៅពេលខាងមុខ។
ដោយឡែក ប្រធានបក្សអនាគតឈានមុខ Thanathorn អះអាងថា គណបក្សដែលឈ្នះកៅអីច្រើនបំផុត ត្រូវតែអនុញ្ញាតឲ្យបង្កើតរដ្ឋាភិបាលចម្រុះមុន ដោយផ្អែកលើប្រពៃណីនយោបាយ ដែលថៃអនុវត្តជាយូរមកហើយនោះ។ ម្យ៉ាងវិញទៀត អ្នកនយោបាយវ័យក្មេងរូបនេះ ក៏ប្រកាសទៀតថា បក្សលោកនឹងមិនស្នើដាក់បេក្ខភាពនាយករដ្ឋមន្ត្រី (ខ្លួនលោកផ្ទាល់) ជាបេក្ខភាពនាយករដ្ឋមន្ត្រីសម្រាប់សម្ព័ន្ធភាពនោះឡើយ ដោយសារតែបក្សលោកមិនមែនជាបក្សដែលទទួលកៅអីច្រើនជាងគេ៕
Tag:
Thanathorn Juangroongruangkit
នយោបាយថៃ
បោះឆ្នោតថៃ
© រក្សាសិទ្ធិដោយ thmeythmey.com