កីឡាអន្តរជាតិ
អន្តរជាតិ
ទីបំផុត Mbappe និង PSG ត្រូវចែកផ្លូវគ្នា ក្រោយបញ្ចប់រដូវកាលនេះ
× Kylian Mbappe ប្រកាសថាខ្លួន នឹងចាកចេញពី Paris St-Germain នៅចុងបញ្ចប់រដូវកាល ២០២៣-២៤ នេះ។ Real Madrid ជាក្លិបនាំមុខគេ ក្នុងការទទួលបានខ្សែប្រយុទ្ធឆ្នើមសញ្ជាតិបារាំងនេះ។
ខ្សែប្រយុទ្ធបារាំង វ័យ២៥ឆ្នាំ បានបង្ហាញពីការសម្រេចចិត្តចាកចេញពីក្រុមយក្សបារាំង នៅក្នុងវីដេអូដែលបានបង្ហោះលើប្រព័ន្ធផ្សព្វផ្សាយសង្គម X របស់ខ្លួន នៅថ្ងៃទី១១ ខែឧសភា។
នៅក្នុងឃ្លីបវីដេអូដែលមានរយៈជិត៤នាទីនោះ Mbappe បាននិយាយថា៖»ខ្ញុំបាននិយាយហើយថា ខ្ញុំនឹងប្រាប់អ្នកទាំងអស់គ្នានៅពេលដែលពេលវេលាមកដល់។ នេះជារដូវកាលចុងក្រោយរបស់ខ្ញុំនៅ Paris St-Germain។ ខ្ញុំនឹងមិនបន្តកិច្ចសន្យាទៀតឡើយ យើងមានពេលជាមួយគ្នាតែពីរបីសប្តាហ៍ទៀតប៉ុណ្ណោះ»។
ស្របពេលកិច្ចសន្យារបស់ Mbappe ជាមួយ PSG នឹងផុតកំណត់នៅខែមិថុនា ឆ្នាំ២០២៤ កាសែត BBC ធ្លាប់បានចេញផ្សាយកាលពីខែកុម្ភៈថារូបគេបានយល់ព្រមលើកិច្ចព្រមព្រៀងផ្ទាល់ខ្លួនទៅចូលរួមជាមួយ Real Madrid នៅរដូវក្រោយ ដោយគ្មានតម្លៃផ្ទេរ។
Mbappe ដែលជួយបារាំងឈ្នះជើងឯក FIFA World Cup ឆ្នាំ២០១៨ និងជាកីឡាករស៊ុតបញ្ចូលទីច្រើនជាងគេក្នុងកំណត់ត្រារបស់ PSG ចំនួន ២២៥គ្រាប់ នឹងបង្ហាញខ្លួនក្នុងដី Parc des Princes ចុងក្រោយទល់នឹង Toulouse ក្នុងជំនួប Ligue 1 យប់ថ្ងៃទី១២ ខែឧសភា។
បន្ទាប់ពីនោះ PSG មានការប្រកួតក្រៅដីទល់ Nice ទី១៥ ខែឧសភា និងជួប Metz នៅ៤ថ្ងៃបន្ទាប់ មុនពេលការប្រកួតវគ្គផ្តាច់ព្រ័ត្រ French Cup ជាមួយ Lyon នៅកីឡដ្ឋាន Stade Pierre-Mauroy ក្នុងទីក្រុង Lille នៅថ្ងៃទី២៥ ខែឧសភា។
Mbappe ដែលបានផ្លាស់ពី Monaco ទៅចូលរួមជាមួយក្លិបអ្នកមានបារាំង PSG ក្នុងតម្លៃជិត ២០០លាដុល្លារ ការពីខែសីហា ឆ្នាំ២០១៧ រៀបរាប់ថាខ្លួន ទទួលបានបទពិសោធន៍ និងសម្ពាធខ្លាំងពីក្លិប ទើអាចរីកចម្រើនដូចសព្វថ្ងៃ។ ក្នុងរយៈពេល៧ឆ្នាំ Mbappe ជួយ PSG ឈ្នះជើងឯកលីគកំពូលបារាំង ចំនួន៦លើក ពោលគឺខកខានតែ១រដូវកាលប៉ុណ្ណោះ ក្រៅពីនោះមាន French Cup ៤លើក និងពានផ្សេងៗទៀត៕
© រក្សាសិទ្ធិដោយ thmeythmey.com