កីឡាជាតិ
ជាតិ
ក្រុម President's Cup 2014 ពូលC ជាមួយស្វាយរៀង មានប្រវត្តិល្អមិនគួរមើលរំលង
× ពានរង្វាន់បាល់ទាត់ AFC President's Cup 2014 ឆ្នាំនេះមានក្រុមចូលរួមសរុបចំនួន ១១ក្រុម ចែកជា ៣ ពូលខុសគ្នា ដើម្បីជម្រុះស្វែងរកក្រុមខ្លាំង ៦ ឡើងទៅប្រកួតជុំផ្ដាច់ព្រ័ត្រ។ ចំពោះក្រុមខេត្តស្វាយរៀង នឹងតំណាងឱ្យកម្ពុជា ប្រកួតក្នុងពូល C ជាមួយក្រុម ២ ផ្សេងទៀត ដែលជាជើងឯកមកពីប្រទេសនេប៉ាល់ និង ជើងឯករបស់ម្ចាស់ផ្ទះ ម៉ុងហ្គោលី កាលពីឆ្នាំចាស់។ វគ្គជម្រុះតាមពូលនេះនឹងចាប់ផ្ដើមប្រកួតពីថ្ងៃទី ១ ដល់ ១១ ខែ ឧសភា ខាងមុខ។
តើអ្នកដឹងពីប្រវត្តិរបស់ក្រុមទាំង ៣ ដល់កម្រិតណា?
១) Erchim FC (ម៉ុងហ្គោលី)
ក្លិប Erchim FC ជាម្ចាស់ផ្ទះក្នុងវគ្គជម្រុះតាមពូល នៅពូល C នេះ ខណៈក្លិបជើងឯកលីកកំពូលម៉ុងហ្គោលី ៨ ជំនាន់នេះ មានឱកាសឡើងមកលេង AFC President's Cup ២ លើកមកហើយ ដោយនៅ ឆ្នាំ ២០១២ ធ្លាក់វគ្គជម្រុះតាមពូល និងឆ្នាំ ២០១ថ្មីៗនេះ ធ្លាក់ត្រឹមជុំផ្ដាច់ព្រ័ត្រ។
សម្រាប់ប្រវត្តិ កន្លងមក Erchimធ្លាប់ឈ្នះជើងឯកលីក ចំនួន ៨ សម័យកាល ( ១៩៩៦, ១៩៩៨, ២០០០, ២០០២, ២០០៧, ២០០៨, ២០១២ និង ២០១៣), ជើងឯក Mongolia Cup ៤សម័យ (១៩៩៨, ១៩៩៩, ២០០០ និង ២០១២) ខណៈឈ្នះជើងឯករង២សម័យ (២០០១ និង ២០០២) ជើងឯក Mongolia Super Cup ៣ លើក (២០១១, ២០១២ និង ២០១៣) ។
២) ManangMarshyangdi Club (នេប៉ាល់)
ManangMarshyangdi Club ធ្លាប់ឡើងមកលេងក្នុងពានរង្វាន់ AFC President's Cup ឆ្នាំ ២០០៦ ម្ដង តែពេលនោះធ្លាក់ត្រឹមវគ្គ ជម្រុះតាមពូល។ កាលពីក្នុងលីករដូវកាល ២០១៣ ក្លិបជើងឯកមួយនេះ ដណ្ដើមបានទាំងពានរង្វាន់គ្រូបង្វឹកល្អ, អ្នកចាំទីល្អ, ខ្សែការពារល្អ, ខ្សែបម្រើល្អ និង ខ្សែប្រយុទ្ធល្អ ប្រចាំឆ្នាំ។
អតីតកាលរបស់ក្លិបធ្លាប់ឈ្នះពានរង្វាន់ក្នុងស្រុកជាច្រើនដូចជា ជើងឯក Nepal A-Division League ៧សម័យ (១៩៨៦, ១៩៨៧, ១៩៨៩, ២០០០, ២០០៣, ២០០៦ និង ២០១៣), ជើងឯក Buddha Subba Gold Cup ២០០៤, ជើងឯក Khukuri Gold Cup ២០០៣, ជើងឯក San Miguel Itahari Gold Cup ២០០៧, ជើងឯក Aaha Gold Cup ៣សម័យ (២០០៤, ២០០៥ និង ២០១២), ជើងឯក Aadarsha Cup ២០១១, ជើងឯក Simar Gold Cup ២០១២, ជើងឯក Ncell Cup ២០១២, ជើងឯក Pokhara Cup ២០១២ ។
៣) ក្លិបបាល់ទាត់ខេត្តស្វាយរៀង (កម្ពុជា)
នេះជាលើកដំបូងហើយដែលខេត្តស្វាយរៀងឡើងទៅលេងក្នុងពានរង្វាន់លំដាប់ទី៣ ទ្វីបអាស៊ី ក្រោយដណ្ដើមបានជើងឯកលីកកំពូលកម្ពុជារដូវកាល ២០១៣ កន្លងទៅ ខណៈដើមរដូវកាល ២០១៤ នេះបង្ហាញទម្រង់លេងមិនសូវល្អបន្តិច។
ងាកទៅមើលប្រវត្តិរបស់ក្លិបស្វាយរៀង ធ្លាប់ឈ្នះជើងឯក Hun Sen Cup ២សម័យ គឺនៅរដូវកាល ២០១១ និង ២០១២ ខណៈឆ្នាំ ២០១៣ ឈ្នះជើងឯកមិត្តហ្វូនខេមបូឌានលីក។
ក្នុងចំណោម ៣ ក្រុមនេះ តើ ២ ក្រុមណាមានឱកាសឡើងទៅលេងជុំផ្ដាច់ព្រ័ត្រ?
© រក្សាសិទ្ធិដោយ thmeythmey.com