កីឡាជាតិ
ជាតិ
លីក ២០១៤៖ ម៉ោង ៣:៣០ ថ្ងៃនេះ ណាហ្គា ប៉ះ ស្វាយរៀង ដណ្ដើមកៅអីលេខ៣
× ក្រុមបាល់ទាត់ណាហ្គាខប និង ក្រុមខេត្តស្វាយរៀង ត្រូវប៉ះគ្នាបង្រ្គប់សប្ដាហ៍ទី ២០ នៃពានរង្វាន់មិត្តហ្វូនខេមបូឌានលីក ២០១៤ (MCL 2014) នៅម៉ោង ៣:៣០ នាទីរសៀលថ្ងៃទី ១៦ កក្កដា នេះលើកកីឡដ្ឋានជាតិ ដើម្បីប្រជែងយកកៅអីចំណាត់ថ្នាក់លេខ៣ មុនរដូវកាលបញ្ចប់នៅ ២ ប្រកួតទៀត។
ណាហ្គាខប៖
ចាប់ពីចូលកម្មវិធីប្រកួតជើងទី ២ មកក្រុមណាហ្គាខប ហាក់ធ្លាក់ទម្រង់ប្រកួតបន្តិច ស្របពេលកីឡាករឆ្នើមៗ មួយចំនួនញាំញីដោយសាររបួស។ បរាជ័យចុងក្រោយពេលប៉ះក្រុមជើងឯកភ្នំពេញក្រោន ១ ទល់ ០ បានធ្វើឱ្យក្រុមលោក ប្រាក់ សុវណ្ណារ៉ា កាន់ដុនដាបរឿងរក្សាកៅអីលេខ៣។ តួរសំខាន់ៗ របស់ក្រុមដូចជា An Jing Yong, Massa, ទៀប វឌ្ឍនៈ, ជួន ជុំ សុទ្ធតែកូនសោរទម្លុះដៃអ្នកចាំទីរបស់ខេត្តស្វាយរៀង។
ឆ្លងកាត់ ១៩ ប្រកួតណាហ្គា ឈ្នះ ៩ ស្មើ ៦ និង ចាញ់ ៤ ហើយទាត់ចូលទីគេ ៣១ គ្រាប់ គេទាត់ចូលវិញតែ ១៤ គ្រាប់ប៉ុណ្ណោះ ពោលគឺតិចជាងក្រុមដទៃ មាន ៣៣ ពិន្ទុក្នុងដៃ ឈរចំណាត់ថ្នាក់លេខ៣ បណ្ដោះអាសន្ន ខណៈក្រុមភ្នំពេញក្រោនលេខ១ មាន ៥១ ពិន្ទុ និង ក្រុមលេខ២ ចម្ការកៅស៊ូបឹងកេត មាន ៤៤ ពិន្ទុ។
ក្រុមខេត្តស្វាយរៀង
ទោះជាការពារតំណែងជើងឯកមិនបាន តែលោក សំ វ៉ាន់ដេត ចង់ដឹងនាំក្រុមឱ្យអស់ពីសមត្ថភាព ទទួលបានចំណាត់ថ្នាក់កាន់តែ កាន់តែប្រសើរសម្រាប់ក្រុមជើងឯកចាស់មួយនេះ។ អ្នកចាំទី ស សុភា, ខ្សែបម្រើ ប្រាក់ មុន្នីឧត្តម, ខ្សែប្រយុទ្ធ Bata ទំនងជាធ្វើបានល្អដូចប៉ុន្មានប្រកួតចុងក្រោយនេះ។
បើនិយាយពី Bata ពេលនេះគេបានឈរនៅកំពូលតារាងអ្នកស៊ុតបាល់បញ្ជូលទីច្រើនជាងគេ ដោយរកបាន ២១ គ្រាប់ម្នាក់ឯង ខណៈកីឡាករ Bisan Goerge របស់ភ្នំពេញក្រោនទើបតែបាន ១៨ គ្រាប់ប៉ុណ្ណោះ។
ស្វាយរៀង ប្រកួតបាន ១៩ លើកឈ្នះ ៩ ស្មើ ៥ និង ចាញ់ ៥ ប្រកួតមាន ៣២ ពិន្ទុនៅក្នុងដៃបណ្ដោះអាសន្ន។
ចំណែកប្រវត្តិប្រកួតកាលពីជើងទី១ ណាហ្គាខប បានយកឈ្នះស្វាយរៀង ក្នុងលទ្ធផល ១ ទល់ ០ លើទីលានស្ដាតចាស់៕
តើស្វាយរៀង ឬ ណាហ្គា នឹងដណ្ដើមបានកៅអីលេខ៣ នៅរសៀលនេះ?
© រក្សាសិទ្ធិដោយ thmeythmey.com