កីឡាអន្តរជាតិ
អន្តរជាតិ
FIFA ឲ្យប្រេស៊ីល១០០លានដុល្លារ ក្រោយរៀបចំ World Cup អស់១៥ពាន់លានដុល្លារ
× សហព័ន្ធកីឡាបាល់ទាត់ពិភពលោក FIFA បានប្រកាសផ្ដល់មូលនិធិជាទឹកប្រាក់ប្រមាណជា ១០០ លានដុល្លារ ទៅឲ្យប្រទេសប្រេស៊ីលសម្រាប់ការរៀបចំព្រឹត្តិការណ៍ កីឡាបាល់ទាត់ពិភពលោក World Cupកាលពីឆ្នាំ២០១៤ កន្លងទៅនេះ។ ខណៈពេលដែលប្រទេសនេះបានចំណាយថវិកាអស់ប្រមាណជា ១៥ ពាន់លានដុល្លារសម្រាប់ការកសាងហេដ្ឋារចនាសម្ព័ន្ធ ដើម្បីរៀបចំព្រឹត្តិការណ៍កីឡាបាល់ទាត់ដ៏ធំមួយនេះ។
យោងតាមការផ្សាយរបស់ទីភ្នាក់ងារព័ត៌មាន AP ការផ្ដល់មូលនិធិខាងលើនេះ គឺត្រូវបាន លោក SeppBlatterប្រធាន FIFAបានសន្យាកាលពី ២ ឆ្នាំមុន ដើម្បីផ្តល់នូវមូលនិធិមួយផ្នែកនៃប្រាក់ចំណូលដែលបានមកពីការប្រកួត World Cup ឆ្នាំ ២០១៤ ។ស្របពេលជាមួយគ្នានេះដែរ ប្រទេសប្រេស៊ីល ក៏នឹងត្រូវធ្វើជាម្ចាស់ផ្ទះនៃការរៀបចំកីឡាអូឡាំពិកឆ្នាំ ២០១៦ នៅទីក្រុង Rio de Janeiro ផងដែរ ដោយគ្រោងនឹងចំណាយថវិកាអស់ប្រមាណជា ១៥ពាន់លានដុល្លារបន្ថែមទៀត។
សហព័ន្ធ FIFA ដែលមានមូលដ្ឋាននៅប្រទេសស្វ៊ីស បានប្រកាសថាខ្លួនរកចំណូលបានជាង ៤ពាន់លានដុល្លារពីការប្រកួតបាល់ទាត់ពិភពលោកឆ្នាំ ២០១៥ នៅប្រទេសប្រេស៊ីលហើយស្ថាប័ននេះរំពឹងថា ប្រាក់ចំណូលនេះនឹងកើនឡើងដល់ ៥ពាន់លានដុល្លារសម្រាប់ការប្រកួត World Cup នៅប្រទេសរុស្ស៊ី ក្នុងឆ្នាំ ២០១៨ខាងមុខនេះ។
ក្រុមអ្នកវិភាគបានឱ្យដឹងថាប្រទេសប្រេស៊ីលបានចំណាយប្រាក់ប្រហែល៣ពាន់លានដុល្លារសម្រាប់ការតុបតែងកីឡដ្ឋានថ្មីហើយ ៩០ ភាគរយនៃទឹកប្រាក់ទាំងនោះគឺជាការចំណាយសាធារណៈរបស់រដ្ឋាភិបាលប្រេស៊ីល។ ប៉ុន្តែអតីតប្រធានាធិបតីប្រេស៊ីលលោក LuizInacio Lula da Silva បានសន្យាថា កីឡដ្ឋានទាំងអស់នេះគឺទទួលបានពីការផ្តល់ហិរញ្ញប្បទានឯកជន។
ក្រោយពីការចំណាយប្រាក់ដ៏ច្រើនក្នុងការសាងសង់ កីឡាដ្ឋានទាំងនោះរួចមកមានកីឡាដ្ឋាន ៤ ក្នុងចំណោម ១២ ត្រូវបានគេដាក់ជួលសដើម្បីរៀបចំព្រឹត្តិការណ៍នានា ដូចជាការៀបចំពិធីអាពាហ៍ពិពាហ៍ និងពិធីនានាផ្សេងទៀត ដើម្បីរកប្រាក់ចំណូល ខ្លះមកវិញ៕
© រក្សាសិទ្ធិដោយ thmeythmey.com