លោក ថង ខាំ ជាកសិករជនជាតិទំពួនដែលមានគំនិតធ្វើកសិកម្មបែបទំនើបមុនគេ

ជាតិ

លោក ថង ខាំ ជាកសិករជនជាតិទំពួនដែលមានគំនិតធ្វើកសិកម្មបែបទំនើបមុនគេ

27, Jan 2015 , 7:00 pm

រូបភាព

ដោយ:

ភ្នំពេញ៖ លោក ថង ខាំ ជាកសិករជនជាតិភាគតិចទំពួនប្រចាំខេត្តរតនគិរី ដែលទទួលជោគជ័យលើការធ្វើកសិកម្មបែបបច្ចេកទេសទំនើបមុនគេ។ លោកបានបង្កើតសួនបន្លែ ផ្លែឈើ ជីកស្រះចិញ្ចឹមត្រី ចិញ្ចឹមសត្វមាន់ ទា និងមានកន្លែងសម្ងួតចំណីអាហារស្រូបពន្លឺព្រះអាទិត្យ ប្រចាំគ្រួសារថែមទៀតផង។

ជនជាតិភាគតិចខេត្តរតនគិរីភាគច្រើននៅតែមានទម្លាប់រកអនុប្បផលធម្មជាតិតាមព្រៃភ្នំក្នុង តំបន់ ដើម្បីចិញ្ចឹមជីវិតរស់នៅប្រចាំថ្ងៃរបស់ពួកគេ។ ផ្ទុយពីទម្លាប់រស់នៅបែបបុរាណរបស់ជន ជាតិភាគតិចទាំងនោះ លោក ថង ខាំ បានងាកមកស្វែងយល់ និងទទួលយករបៀបធ្វើកសិកម្ម និង ចិញ្ចឹមសត្វតាមបែបបច្ចេកទេសទំនើបវិញម្តង។

បន្ទាប់ពីទទួលបានការបណ្តុះបណ្តាលបច្ចេកទេសកសិកម្មជនជាតិភាគតិចខេត្តរតនគិរីក្នុង គម្រោងអាណាឌីយ៉ា នៅក្នុងអំឡុងឆ្នាំ ២០១៣រួចមក លោក ថង ខាំ បានប្តូរផ្នត់គំនិតបុរាណចោលដោយសារទម្លាប់ចិញ្ចឹមជីវិតបែបបុរាណមិនអាចចិញ្ចឹមជីវិតយូរអង្វែងបាន។លោកប្រាប់ថា៖«ឥឡូវសត្វព្រៃ និងព្រៃឈើក្នុងតំបន់អត់សំបូរដូចមុន...យើងមិនអាចរស់នៅ តាមសម័យបុរាណទេ»។

និយាយមិនលាក់លៀម លោករម្លឹកអតីតកាលជាង ៥ឆ្នាំមុនថា លោកក៏នៅតែជាកសិករជនជាតិភាគតិចម្នាក់ ដែលប្រកបចិញ្ចឹមជីវិតប្រចាំថ្ងៃក្នុងគ្រួសារ ដោយការដើរបេះបន្លែ ផ្លែឈើ និងបរបាញ់សត្វក្នុងព្រៃភ្នំផងដែរ។

ប៉ុន្តែបច្ចុប្បន្ននេះ កសិករជនជាតិទំពួនវ័យ៣៧ឆ្នាំរូបនេះ បានក្លាយជាកសិករគំរូប្រចាំខេត្តភូមិ ភាគឦសានប្រទេសកម្ពុជា។ លោកបានបង្កើតជាសួនបន្លែ ជីកស្រះចិញ្ចឹមត្រី និងសត្វចិញ្ចឹម ផ្សេងទៀតដូចជា មាន់ ទានិងជ្រូកជាដើម។ ជាពិសេសនោះគឺ បង្កើតកន្លែងសម្ងួតបន្លែ ផ្លែឈើ ដែលដើរដោយប្រព័ន្ធអគ្គិសនីស្រូបពន្លឺព្រះអាទិត្យថែមទៀតផង។

បុរសសម្បុរសខ្មៅស្រអែមរូបនេះ បានលើកឡើងថា ការប្រើប្រាស់បច្ចេកទេស ធ្វើកសិកម្ម និងការចិញ្ចឹមបែបសម័យទំនើបនេះ គឺបានលើកស្ទួយជីវភាពគ្រួសារលោកច្រើន។
លោកថា៖«ខ្ញុំអាចផ្គត់ផ្គង់ចិញ្ចឹមគ្រួសារគ្រប់គ្រាន់ មានត្រី បន្លែសម្រាប់ហូបគ្រប់រដូវ គឺមិនដូច ពីមុនទេ ត្រូវដើរចូលព្រៃភ្នំ...និងចាំតែដើរសុំបន្លែពីអ្នកដទៃ»។

បន្ទាប់ពីគម្រោងត្រូវបញ្ចប់នៅក្នុងឆ្នាំ២០១៥នេះ កសិករជនជាតិទំពួនបង្គោលខេត្តរតនគិរី លោក ថង ខាំ ក៏បានប្តេជ្ញាចិត្តថា នឹងបន្តជួយផ្សព្វផ្សាយដល់កសិករក្នុងតំបន់ឲ្យយល់ដឹង ពីអត្ថប្រយោជន៍នៃការធ្វើកសិកម្មបែបសម័យទំនើបនេះផងដែរ៕