ជាតិ
នយោបាយជាតិ
សង្គមស៊ីវិលស្នើឲ្យរដ្ឋាភិបាលបញ្ចប់និទណ្ឌភាព និងពង្រឹងឯករាជភាពតុលាការ
×
អង្គការសង្គមស៊ីវិលចំនួន៩ បានចេញសេចក្តីថ្លែងការណ៍រួមគ្នាមួយដោយបានបង្ហាញក្តីបារម្ភចំពោះវិធានការដែលហាមឃាត់បុគ្គលិកអង្គការសង្គមស៊ីវិលក្នុងការផ្តល់បទសម្ភាសន៍ទៅប្រព័ន្ធផ្សព្វផ្សាយ ឬសេចក្តីថ្លែងការណ៍ផ្សេងៗដែលអាច«ជេរប្រមាថ»ដល់គណបក្សនយោបាយក្នុងអំឡុងពេលបោះឆ្នោត។ក្រៅពីការបារម្ភចំពោះវិធានការនេះសង្គមស៊ីវិលទាំងនោះបានទាមទារ ឲ្យរដ្ឋាភិបាល និងថ្នាក់ដឹកនាំគណបក្សនយោបាយទាំងអស់ធ្វើការរួមគ្នាដើម្បីបញ្ចប់និទណ្ឌភាព ពង្រឹងឯករាជ្យភាពប្រព័ន្ធតុលាការ និងធ្វើវិសោធនកម្មលើច្បាប់ផ្សេងៗ ដែលគំរាម និងរឹតបន្តឹងទៅលើសកម្មជនអង្គការសង្គមស៊ីវិល។
មានសំឡេង
វិធានការដែលហាមឃាត់បុគ្គលិកអង្គការសង្គមស៊ីវិលក្នុងការផ្តល់បទសម្ភាសន៍ទៅប្រព័ន្ធផ្សព្វផ្សាយ ឬសេចក្តីថ្លែងការណ៍ផ្សេងៗដែលអាច«ជេរប្រមាថ»ដល់គណបក្សនយោបាយក្នុងអំឡុងពេលបោះឆ្នោតនោះ បានធ្វើឲ្យអង្គការសង្គមស៊ីវិលចំនួន៩ បានចេញសេចក្តីថ្លែងការណ៍រួមបង្ហាញក្តីព្រួយបារម្ភយ៉ាងខ្លាំង។សេចក្តីថ្លែងការណ៍នេះធ្វើឡើងបន្ទាប់ពី លោកប៊ិនឈិន ប្រធានក្រុមការងារគណបក្សប្រជាជនកម្ពុជានិងលោកគួយ ប៊ុនរឿនអ្នកតំណាងរាស្ត្រគណបក្សសង្គ្រោះជាតិ បានពិភាក្សាគ្នានៅកំឡុងពេលនៃការចរចាអំពីកំណែទម្រង់នៃការបោះឆ្នោតកាលពីពេលថ្មីៗនេះថា គណបក្សទាំងពីរនឹងពិចារណាពីវិធានការនេះដើម្បីធានានូវឯករាជ្យភាពរបស់អង្គការមិនមែនរដ្ឋាភិបាល។
អង្គការសង្គមស៊ីវិលទាំងនោះលើកឡើងថា ការរឹតបន្តឹងបែបនេះស្មើនឹងការរំលោភបំពានសេរីភាពខាងការបញ្ចេញមតិ។
សេចក្តីថ្លែងការណ៍ចុះថ្ងៃទី៤ខែកុម្ភៈបានសរសេរថាការដាក់ទោសចំពោះការ«ជេរប្រមាថ»ទៅលើបេក្ខជនឬគណបក្សនយោបាយ ហាក់មានភាពទូលាយពេកដែលអាចឲ្យអាជ្ញាធរបង្ក្រាបដោយស្របច្បាប់ទៅលើសម្លេងប្រឆាំង។
សេចក្តីថ្លែងការណ៍បន្តថាទោះបីជាសិទ្ធិសេរីភាពខាងការបញ្ចេញមតិមិនមែនជាសិទ្ធិដាច់ខាត តែការរឹតបន្តឹងអាចធ្វើទៅបានក្នុងលក្ខខណ្ឌចាំបាច់បំផុតដើម្បីបម្រើប្រយោជន៍ផ្នែកច្បាប់។ ផ្ទុយទៅវិញការហាមឃាត់ការផ្តល់បទសម្ភាសន៍ទៅប្រព័ន្ធផ្សព្វផ្សាយបែបនេះហាក់មានបំណងការពាររដ្ឋាភិបាល និងសមាជិកគណបក្សនយោបាយពីការរិះគន់ ជាងការពារផលប្រយោជន៍សង្គម។
ការលើកឡើងពីវិធានការបែបនេះនឹងអាចជាឧបសគ្គរារាំងការជជែកពិភាក្សាជាសាធារណៈកាត់បន្ថយសិទ្ធិចូលរួមក្នុងនយោបាយ និងធ្វើឲ្យប៉ះពាល់ដល់តួនាទីរបស់អង្គការសង្គមស៊ីវិល ព្រមទាំងជាទង្វើប្រឆាំងនឹងនិទណ្ឌភាពដែលបានកើតឡើងជាបន្តបន្ទាប់នៅក្នុងប្រទេសកម្ពុជា។នេះបើតាមសេចក្តីថ្លែងការណ៍ដដែល។
គណៈកម្មការសិទ្ធិមនុស្សក៏បានលើកឡើងនៅក្នុងសេចក្តីថ្លែងការណ៍នោះដែរថា៖«នៅក្នុងបរិបទនៃការវែកញែកផ្នែកនយោបាយ កតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ(ក.អ.ស.ព.ន) បានឲ្យតម្លៃខ្ពស់ចំពោះការបញ្ចេញមតិដោយគ្មានការហាមឃាត់ »។ បើតាមគណៈកម្មការសិទ្ធិមនុស្សដដែលនោះ បុគ្គលសាធារណៈទាំងអស់ រួមទាំងអ្នកមានអំណាចនយោបាយជាន់ខ្ពស់ផង គឺជាកម្មវត្ថុសម្រាប់ការរិះគន់និងប្រឆាំងផ្នែកនយោបាយដោយស្របច្បាប់ហើយគណៈកម្មការសិទ្ធិមនុស្សនឹងត្រួតពិនិត្យពីការបំពេញកាតព្វកិច្ចរបស់កម្ពុជាចំពោះ ក.អ.ស.ព.ននៅក្នុងសម័យប្រជុំលើកទី១១៣ នៅក្នុងខែមីនា ឆ្នាំ២០១៥ខាងមុខ»។
ក្រៅពីការបារម្ភចំពោះការហាមឃាត់នេះសង្គមស៊ីវិលទាំងនោះបានទទូចទាមទារ ឲ្យរដ្ឋាភិបាល និងថ្នាក់ដឹកនាំគណបក្សនយោបាយទាំងអស់ធ្វើការរួមគ្នាដើម្បីបញ្ចប់និទណ្ឌភាព ពង្រឹងឯករាជ្យភាពប្រព័ន្ធតុលាការ និងធ្វើវិសោធនកម្មលើច្បាប់ផ្សេងៗ ដែលគំរាម និងរឹតបន្តឹងទៅលើសកម្មជនអង្គការសង្គមស៊ីវិល ដូចជាច្បាប់ស្តីពីអង្គការមិនមែនរដ្ឋាភិបាល ដើម្បីឲ្យច្បាប់នេះស្របតាមស្តង់ដារសិទ្ធិមនុស្សអន្តរជាតិ៕
© រក្សាសិទ្ធិដោយ thmeythmey.com