រដ្ឋាភិបាលនៅក្នុងតំបន់ដែលរងគ្រោះដោយគ្រោះរាំងស្ងួត ដូចជាអាម៉េរិកខាងលិច និងអេមីរ៉ាតអារ៉ាប់រួម បានវិនិយោគលើបច្ចេកវិទ្យាបណ្តុះពពក ដោយសង្ឃឹមថានឹងទទួលបានទឹកភ្លៀងធា្លក់ និងដោះស្រាយបញ្ហាកង្វះទឹក។ ប្រទេសមួយចំនួននៅអាស៊ី និងមជ្ឈិមបូព៌ាក៏ប្រើប្រាស់ បច្ចេកវិទ្យាបណ្ដុះពពកនេះដូចជាម៉ាឡេស៊ីជាដើម ដែលមានបំណងចង់ជំរុញទឹកភ្លៀង ដើម្បីដោះស្រាយគុណភាពខ្យល់ពុល។

 

តើ​ការ​បណ្ដុះ​ពពក​មាន​តួនាទី​ក្នុងការបង្កភ្លៀងធ្លាក់ខ្លាំង និងព្យុះនៅអេមីរ៉ាតអារ៉ាប់រួមបច្ចុប្បន្ន ដែរឬទេ?

 

ការបញ្ជាក់ភាគច្រើនដោយអ្នកវិទ្យាសាស្ត្រ បានបង្ហាញថាភ្លៀងធ្លាក់ខ្លាំងដែលបង្កឱ្យមានទឹកជំនន់ ដែលមិនធ្លាប់មានពីមុនមកក្នុងអេមីរ៉ាតអារ៉ាប់រួម មិនមែនបណ្ដាលមកពីការបណ្ដុះពពកនោះឡើយ។ អ្នកជំនាញបញ្ជាក់ផងដែរថា វិធីសាស្ត្រនេះមានឥទ្ធិពលតិចតួចបំផុតលើព្យុះដែល កើតមានឡើងនៅទីក្រុងឌូបៃដែលបានបណ្ដុះពពករយៈពេលពីរថ្ងៃជាប់គ្នាមុនពេលដែលភ្លៀងធ្លាក់ បង្កទឹកជំនន់កើតឡើងនៅថ្ងៃបន្ទាប់។

 

«ទោះបីជាការបណ្ដុះពពកបានជំរុញឱ្យពពកនៅជុំវិញទីក្រុងឌូបៃទម្លាក់ទឹកភ្លៀងក៏ដោយ បរិយាកាសទំនងពាំនាំពពកផ្ទុកទឹកភ្លៀងជាស្រាច់ទៅហើយ ដោយសារតែការប្រែប្រួលអាកាសធាតុ»។ សាស្ត្រាចារ្យជាន់ខ្ពស់ផ្នែកវិទ្យាសាស្ត្រអាកាសធាតុនៅ Imperial College London លោកស្រី Friederike Otto បានបញ្ជាក់បែបនេះ៕