ពីសន្និបាតប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) ដែលត្រូវបានរៀបចំឡើងនៅទីក្រុងបាងកក ប្រទេសថៃ សម្តេចនាយករដ្ឋមន្រ្តី ហ៊ុន ម៉ាណែត បានលើកឡើងពីសារៈសំខាន់ជាច្រើននៃបច្ចេកវិទ្យាឌីជីថល ពាក់ព័ន្ធនឹងការដោះស្រាយបញ្ហាប្រឈម ដូចជាដំណើរការអភិវឌ្ឍសង្គម។ 

 

«ដូចបណ្តាប្រទេសផ្សេងទៀតដែរ កម្ពុជា បានចាត់ទុកបច្ចេកវិទ្យាឌីជីថល ជាយន្តការដ៏សំខាន់ ក្នុងការអភិវឌ្ឍសង្គម-សេដ្ឋកិច្ច ក្នុងបរិបទបដិវត្តន៍ឧស្សាហកម្ម ៤.០»។ សម្តេច បានសង្កត់ធ្ងន់បែប​នេះ នៅចំពោះមុខអ្នកចូលរួម ក្នុងថ្ងៃទី២២ ខែមេសា ដោយបន្តថា បច្ចេកវិទ្យាឌីជីថល នឹងជំរុញ និងផ្សព្វផ្សាយពីការទទួលបានសេវាសាធារណៈ រួមទាំងចូលរួមចំណែកក្នុងការកសាងសង្គមស៊ីវិល័យ។​

 

ក្នុងវេទិការៀបចំនៅក្រុងបាងកកដដែល ប្រមុខរដ្ឋាភិបាលកម្ពុជា បានលើកឡើងថា នវានុវត្តន៍ឌីជីថល គឺមានសារៈសំខាន់ និងមានភាពធន់ ជាពិសេសក្នុងការដោះស្រាយវិសមភាព ដែលបង្កដោយជំងឺកូវីដ-១៩ និងអាចឆ្លើយតបយ៉ាងរហ័សចំពោះកំណើនតម្រូវការរបស់ប្រជាជន។ 

 

ប្រមុខរដ្ឋាភិបាលកម្ពុជា មិនភ្លេចរម្លឹកឡើយ ពាក់ព័ន្ធនឹងការយកចិត្តទុកដាក់របស់កម្ពុជាលើវិស័យឌីជីថល ជាពិសេសការកំណត់បច្ចេកវិទ្យាជាផ្នែកមួយដ៏សំខាន់នៅក្នុងការអភិវឌ្ឍសង្គម ក្នុងយុទ្ធសាស្រ្តបញ្ចកោណ-ដំណាក់កាលទី១។ យុទ្ធសាស្រ្តបញ្ចកោណ-ដំណាក់កាលទី១ បានកំណត់អាទិភាពចំនួន៥ ក្នុងនោះមានដូចជា មនុស្ស ផ្លូវ ទឹក ភ្លើង និងបច្ចេកវិទ្យា។ 

 

ក្រៅពីប្រធានបទបច្ចេកវិទ្យា នាយករដ្ឋមន្រ្តី បានចាត់ទុកការបោសសម្អាតមីន និងសំណល់ជាតិផ្ទុះពីសង្គ្រាម នៅតែជាឧបសគ្គធំរបស់ប្រទេស ក្នុងការអភិវឌ្ឍជារួម និងបន្ថយគម្លាតឌីជីថល និងការទទួលបានសេវាអ៊ីនធឺណិតប្រកបដោយគុណភាព៕