ក្រៅពីបញ្ហាបសុសត្វ ឧទ្យានមួយនេះ ក៏នៅមានខ្វះខាតចំណីសម្រាប់សត្វដែរ ក្រសួងកសិកម្ម និងភាគីពាក់ព័ន្ធទាំងអស់ កំពុងប្រឹងប្រែងឱ្យអស់ពីលទ្ធភាព ដើម្បីផ្គត់ផ្គង់ចំណីដល់សត្វ ដែលកំពុងមានវត្តមាននៅក្នុងសួនសត្វដ៏ធំមួយនេះ។ កញ្ញា អ៊ឹម​ រចនា បន្ថែមដូច្នេះថា៖« យើងនឹងព្យាយាមឱ្យអស់ពីលទ្ធភាព ដើម្បីផ្គត់ផ្គង់ចំណីដល់សត្វ ដែលកំពុងមានវត្តមាននៅទីនេះ។ ប៉ុន្តែ ប្រសិន បើមានសាធារណជនមានចិត្តសប្បុរស​ ហើយគិតថា ការជួយសង្រ្គោះសត្វគឺជាបុណ្យមួយ លោកអាចបរិច្ចាគ ឬអញ្ជើញមកទស្សនាផ្ទាល់ ដែលនេះគឺជាការចូលរួមដ៏ធំធាងផងដែរ»។ 
 

សព្វថ្ងៃ ឧទ្យានសួនសត្វភ្នំតាម៉ៅ មានសត្វព្រៃប្រមាណ៣ពាន់ក្បាល និង១១៦ប្រភេទ ដែលភាគច្រើនជាសត្វដែល ត្រូវបានជួយសង្រ្គោះពីការជួបអន្ទាក់ តាមព្រៃធម្មជាតិនានា។ ចាប់តាំងពីឆ្នាំ២០១៦ ដល់២០២៤ មានសត្វព្រៃជាង១ម៉ឺនក្បាល ដែលត្រូវបានជួយសង្រ្គោះ និងលែងចូលព្រៃធម្មជាតិវិញ។ ចំណែក សត្វព្រៃដែលទទួលបានការព្យាបាលហើយ ហើយវាពិបាកបន្សំខ្លួន ឬគ្មានលទ្ធរស់តាមធម្មជាតិ នឹងត្រូវបានគេបន្តថែរក្សាពួកវានៅឧទ្យានដដែល ដើម្បីទុកឱ្យភ្ញៀវទេសចរទស្សនា។ 
 

យោងតាមព្រះរាជក្រឹត្យ ការបង្កើតឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ»នេះ ក្នុងគោលដំណងអភិវឌ្ឍន៍សួនភូតគាមសាស្រ្តដែលមានពូជឈើប្រណិត និងមានតម្លៃសេដ្ឋកិច្ចខ្ពស់, អភិវឌ្ឍន៍ ទៅជាតំបន់គោលដៅទេសចរណ៍ធម្មជាតិ វប្បធម៌ និងប្រវត្តិសាស្ត្រ ដែលផ្ដល់ការថែរក្សាសង្គ្រោះសត្វព្រៃ ព្យាបាល និងស្តារលទ្ធភាពសត្វព្រៃ,ការធ្វើវិបុលកម្មសត្វព្រៃ ប្រភេទសត្វ និងរុក្ខជាតិកម្រជិតផុតពូជ។ 
 

មិនតែប៉ុណ្ណោះ ឧទ្យាននេះ នឹងជាមូលដ្ឋានសម្រាប់ការសិក្សាស្រាវជ្រាវ អប់រំផ្សព្វផ្សាយអន្តរអំពើ រវាងមនុស្ស-សត្វព្រៃ និងព្រៃឈើ។ បង្កើតគម្របបៃតង និងបង្កើនសោភ័ណ្ឌភាពក្នុងតំបន់។ លើកកម្ពស់ការថែរក្សាធនធានសេនេទិចរុក្ខជាតិ-សត្វព្រៃនិងការអភិវឌ្ឍធនធានធម្មជាតិប្រកបដោយនិរន្តរភាព។  
 

ឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ មានផ្ទៃដីទំហំសរុប ២ ០២៥ ហិកតា ស្ថិតនៅក្នុងភូមិសាស្ត្រ ស្រុកបាទី ខេត្តតាកែវ ដូចមានផែនទីបញ្ជាក់ទីតាំង និង ចំណុចនិយាមកា ភ្ជាប់ជាឧបសម្ព័ន្ធនៃព្រះរាជក្រឹត្យ។
 

ឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ» នេះ ត្រូវបានបែងចែកជា ៣តំបន់ ដោយ ទី១ ជាតំបន់ព្រៃការពារសម្រាប់ស្ដារលទ្ធភាពសត្វព្រៃ ជាតំបន់សម្រាប់ធានាការធ្វើវិបុលកម្មសត្វព្រៃ ការអភិរក្ស និងការអភិវឌ្ឍធនធានធម្មជាតិប្រកបដោយនិរន្តរភាព ដែលមានផ្ទៃដីទំហំ ១០២១ហិកតា។   
 

ទី២ តំបន់សួនភូតគាមឈើប្រណិតភ្នំតាម៉ៅ ជាតំបន់សម្រាប់ធានាថែរក្សាកូនឈើ និងអភិវឌ្ឍជាសួន ភូតគាម មានពូជឈើប្រណិត និងសោភ័ណភាព ដែលមានផ្ទៃដីទំហំ ៥៣០ហិកតា និងទី៣ តំបន់ឧទ្យានសួនសត្វភ្នំតាម៉ៅជាតំបន់សម្រាប់ថែរក្សាសត្វព្រៃ ព្យាបាល សង្គ្រោះសត្វព្រៃ អប់រំផ្សព្វ ផ្សាយ និងបម្រើសេវាទេសចរណ៍ ដែលមានផ្ទៃដីទំហំ ៤៧៤ហិកតា។
 

ព្រះរាជក្រឹត្យដដែល បញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ មានភារកិច្ចគ្រប់គ្រងតំបន់ឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ» ហើយត្រូវរៀបចំផែនការ និងគ្រប់គ្រងឱ្យមានប្រសិទ្ធភាព និងនិរន្តរភាព៕