Giroud វ័យ ៣៧ឆ្នាំ នឹងទៅចូលរួមជាមួយអតីតប្រធានក្រុមជម្រើសជាតិបារាំង អ្នកចាំទី Hugo Lloris ដែលបានចូលរួមក្រុម LAFC កាលពីដើមរដូវកាល ២០២៤។ បើតាមសម្តីអ្នកចាត់ការក្រុម LAFC លោក John Thorrington ក្លិបស្ថិតក្នុងលីគ MLS មានបំណងចង់បានខ្សែប្រយុទ្ធសញ្ជាតិបារាំង​តាំងពីរដូវកាលមុនមកម្ល៉េះ។ យ៉ាងណាក្លិប LAFC ម្ចាស់ពាន ​MLS Cup ឆ្នាំ ២០២២ និងជើងឯករងឆ្នាំ ២០២៣ បែរជាសម្រេចចិត្តរង់ចាំ Giroud រហូតដល់គេផុតកិច្ចសន្យាជាមួយ AC Milan ក្នុងរដូវកាលនេះ។
 

បើតាមប្រភពពីក្លិប LAFC ប្រាប់ទូរទស្សន៍ ESPN កីឡាករវ័យ ៣៧ឆ្នាំ មានកុងត្រារយៈពេល ១រដូវកាល ដោយទទួលបានប្រាក់ថ្លៃពលកម្មចំនួន ៣លានអឺរ៉ូ (៣,២លានដុល្លារ)។ Giroud ដែលជាកីឡាកររកបានគ្រាប់បាល់ច្រើនជាងគេប្រចាំក្រុមជម្រើសជាតិបារាំង សម្រេចចិត្តផ្លាស់មកកាន់ក្រុម LAFC ក្រោយជួយក្រុម AC Milan ឈ្នះពានលីគ Serie A ក្នុងឆ្នាំ ២០២២។ 
 

រដូវកាល ២០២៣-២៤ Giroud បានជួយរកគ្រាប់បាល់ ១៣គ្រាប់ ជាមួយការបញ្ជូនបាល់ ៨លើក ក្នុងការបង្ហាញខ្លួន ៣០លើកក្នុងលីគ Serie A។ សម្រាប់ការផ្លាស់ទៅកាន់ក្លិប LAFC ខ្សែប្រយុទ្ធសញ្ជាតិបារាំង ថារូបគេរីករាយចំពោះឱកាសបន្តនៅក្នុងលីគ MLS។
 

«អាជីពរបស់ខ្ញុំនឹងបន្តនៅក្នុងលីគ MLS។ ខ្ញុំពិតជាមានមោទកភាពចំពោះរឿងគ្រប់យ៉ាង ខ្ញុំបានធ្វើការងាររួចរាល់នៅ AC Milan រយៈពេល ៣រដូវកាល​ ​[…] រឿងរ៉ាវជាមួយ Milan បានបញ្ចប់ឆ្នាំនេះ។ ប៉ុន្តែ Milan ក៏នឹងស្ថិតនៅក្នុងបេះដូងខ្ញុំជានិច្ច។»។ ​Giroud បាននិយាយបែបនេះមុនការប្រកួតចំនួន ២លើក ដែលនៅសល់ក្នុងក្របខណ្ឌ Serie A។
 

Giroud នឹងធ្វើដំណើរទៅកាន់ប្រទេសអាម៉េរិក ក្រោយពេលដែលព្រឹត្តិការណ៍ពានរង្វាន់អឺរ៉ុប UEFA Euro 2024 នៅក្នុងប្រទេសអាល្លឺម៉ង់បញ្ចប់៕