«ត្រេកអរ ដែលបានឃើញសំពត់ហូល បានយកមកតាំងនៅសារមន្ទីរ ឃើញតាំងពិតៗមែន ខ្ញុំសប្បាយរីករាយ ទុកឱ្យកូនចៅជំនាន់ក្រោយបានស្គាល់ ព្រោះខ្ញុំចាស់ហើយ អាយុជិត៨០ទៅហើយ»។ អ្នកស្រីរៀបរាប់ពីអារម្មណ៍ផ្ទាល់ខ្លួន មកកាន់អ្នកសារព័ត៌មានថ្មីៗ អំឡុងអ្នកស្រីមកទស្សនាសារមន្ទីរវាយភនភណ្ឌប្រពៃណីអាស៊ី ដែលជាកន្លែងដាក់តាំងពិព័រណ៍ហូលអ្នកស្រី រួមជាមួយសំពត់ហូលផាមួង អ្នកស្រុកព្រៃកប្បាស ខេត្តតាកែវឯទៀត។ 
  

អ្នកស្រី លី ស្រមុំ ជាស្ត្រីមួយរូបទៀត ដែលបានបរិច្ចាគហូលមកកាន់សារមន្ទីរ ដើម្បីដាក់ពិព័រណ៍ និងរក្សាទុក ហើយអ្នកស្រី ជាប្អូនស្រីបង្កើតរបស់អ្នកស្រី ណៃស្រ៊ីម។ អ្នកស្រីក៏រីករាយ មិនចាញ់អ្នកស្រី ណៃស្រ៊ីមប៉ុន្មានឡើយ នៅពេលហូលជាទីស្រឡាញ់ខ្លួន ត្រូវបានសារមន្ទីរយកមកតាំងបង្ហាញជាសាធារណៈ។ អ្នកស្រី ស្រីមុំ បានបរិច្ចាគសំពត់ហូលចំនួន៣ ដែលមានអាយុកាលប្រមាណ៤០ឆ្នាំមកហើយ។ 
  

បច្ចុប្បន្នសំពត់ហូលស្ត្រីទាំង២នេះ កំពុងដាក់ពិព័រណ៍ជាមួយហូល ផាមួង អាវប៉ាក់ ស្នាដៃអ្នកស្រុកព្រៃកប្បាស ខេត្តតាកែវ ផ្សេងទៀត ក្នុងសារមន្ទីរវាយភណ្ឌ័ប្រពៃណីអាស៊ី ក្រុងសៀមរាប។ សមុច្ច័យទាំង២១នេះ មានអាយុកាលចន្លោះពី៤០ ទៅ៦០ឆ្នាំ។ ការពិព័រណ៍នេះមានរយៈពេល៦ខែ ចាប់ផ្ដើមពីថ្ងៃទី៩ ខែកុម្ភៈ ឆ្នាំ២០២៤ តទៅ៕